Read Nzema Hib 6 Bible Online

Hib 6 - Nzema bible

Hib 6

¹Zɔhane ati, bɛmaa yɛhɔ zolɛ yɛzukoa yɛyɛ mgbanyinli na yɛgyakyi Kelaese ɛdoavolɛ nwo ɛzukoalɛdeɛ ne mɔ mɔɔ lumua la. Tɛ bɔ zo mɔɔ eza yɛbɔ ɔ bo yɛazukoa kɛ ɔwɔ kɛ yɛfi ninyɛndane nwo na yɛdie Nyamenle yɛdi ɔ, anzɛɛ ngilehilelɛ mɔɔ fane ɛzɔnenlɛ ngakyile nwo,

²ɛsalɛ mɔɔ bɛfa bɛgua bɛ nwo zo, ewudwazo ne nee ndɛnebualɛ mɔɔ ɛnlɛ awieleɛ la anwo ɔ. Bɛmaa yɛzukoa yɛhɔ yɛ nyunlu,

³na ɛhye yɛɛ saa Nyamenle maa adenle a ɔwɔ kɛ yɛyɛ a.

⁴Ɔluakɛ ɔyɛ se ɔmaa bɛdabɛ mɔɔ anrɛɛ bɛlɛ diedi na bɛgyakyi nu la kɛ bɛkɛzia bɛkɛnlu bɛ nwo bieko. Ɛnee anrɛɛ bɛwɔ Nyamenle wienyi ne anu, bɛnyia Nyamenle nu ahyɛlɛdeɛ, na bɛnyia Sunsum Nwuanzanwuanza ne bie;

⁵bɛze ye bɔkɔɔ kɛ Nyamenle Edwɛkɛ ne le kpalɛ, yɛɛ bɛnwu kɛ tumi ne mɔɔ bara la ɛzulolɛ si de la, noko bɛgyakyi bɛ diedi ne anu.

⁶Ɔyɛ se kɛ awie kɛhola kɛmaa bɛkɛnlu bɛ nwo bieko a, ɔboalekɛ bɛbɔ Nyamenle Ara ne meanubaka nu dahuu na bɛgua ɔ nyunlu aze wɔ menli nu.

⁷Nyamenle yila azɛlɛ mɔɔ meme nzule mɔɔ kɛdɔ zo la na ɔmaa zolɛ aleɛ yɛ kpalɛ maa menli mɔɔ yɛ zolɛ egyinli la.

⁸ Na saa azɛlɛ zɛhae azo fifi mbowule nee ndile a, nvasoɛ biala ɛnle zo; ɔle kɛ asɛɛ Nyamenle ɛwa ye amonle ɛwie na bɛbava senle bɛazɛkye ye la.

⁹Noko ayi mɔ, saa yɛtendɛ zɛhae bɔbɔ a, yɛ adwenle si pi wɔ bɛ nwo. Yɛze kɛ nyilalɛ kpalɛ bie wɔ ɛkɛ mɔɔ beta ngoanelielɛ nwo a.

¹⁰Nyamenle ɛnli nzisi. Ɔ rɛle ɛnrɛvi gyima mɔɔ bɛyɛle nee ɛhulolɛ mɔɔ bɛhile wɔ ɔ nwo nee nyele mɔɔ kɛkala bɛtɛbɔ nwo bɛtɛkile bɛtɛmaa bɛ mediema mɔɔ doa Kelaese abo zo la.

¹¹Yɛ kunlu a anrɛɛ bɛ nuhua ko biala bagyinla kpundii ahɔ awieleɛ, amaa mɔɔ bɛ nye la zolɛ la bɛ sa aha ye.

¹²Yɛngulo kɛ bɛkɛyɛ mgbovonle. Yɛkulo kɛ bɛsukoa menli mɔɔ bɛlua bɛ diedi nee abotane zo bɛnyia mɔɔ Nyamenle ɛva ɛbɔ ɛwɔkɛ la.

¹³Mekɛ mɔɔ Nyamenle bɔle Ebileham ɛwɔkɛ ne la, ɔvuale ɔhilele ye kɛ ɔbali ɛwɔkɛ ne azo. Kɛmɔ awie biala ɛnle ɛkɛ mɔɔ le kpole tɛla ye la ati, Nyamenle vale ɔdaye ɔ ngome ye duma a vuale a.

¹⁴ Ɔse, “Mebɔ wɔ ɛwɔkɛ kɛ mebayila wɔ na meamaa ɛ bo zo amra ayɛ dɔɔnwo.”

¹⁵Ebileham zile abotane, na ɔnyianle ɛwɔkɛ ne mɔɔ Nyamenle bɔle ye la.

¹⁶Saa sonla ka ndane a, ɔfa awie mɔɔ tɛla ye la duma a ɔka ndane ne a, yɛɛ ndane ne pɛ kpolerazulɛ biala azo.

¹⁷Nyamenle kpondɛ kɛ bɛdabɛ mɔɔ ɔwɔ kɛ bɛnyia ɛwɔkɛ ne bie la nwu kɛ ɔnrɛhakyi ye adwenle ɛlɛ; ɛhye ati ɔvale ndane ɔbokale ye ɛwɔkɛ ne anwo.

¹⁸Ɛhye ati, ninyɛne nwiɔ ɛhye mɔ a wɔ ɛkɛ mɔɔ ɛngakyi na ɔkile kɛ Nyamenle ɛnrɛbɔ adalɛ ɛlɛ a, amaa yɛdayɛ mɔɔ yɛnriandi yɛahɔvea ye nu la yɛanyia akɛnrasesebɛ yɛazɔ anyelazo ɛhye mɔɔ bɛva bɛzie yɛ nyunlu la anu kpalɛ.

¹⁹ Anyelazo ɛhye le kɛ sɛkɛ maa yɛ ɛkɛla. Ɔgyi pi, na ɔgyi ye kpundii ɔkɔpe anwuma lɔ ɛzonlenlɛ sua ne mgbɛnu ɛdanlɛ ne anu na ɔkɔdua ɔ nwo wɔ ɛleka nwuanzanwuanza ne.

²⁰ Ɛleka ɛhye yɛɛ Gyisɛse, ɔlua yɛdayɛ yɛ ti, yelumua lɔ, yehɔyɛ Sɛlɛvolɛ Kpanyinli, kɛmɔ Mɛlekezidɛke la a.