Read Nzema Hib 7 Bible Online

Hib 7 - Nzema bible

Hib 7

¹ Mɛlekezidɛke ɛhye, anrɛɛ ɔle belemgbunli wɔ Salɛm, eza ɔle Anwuma Anwuma Nyamenle ne Sɛlɛvolɛ. Mɔɔ Ebileham vi konle ne mɔɔ ɔlile arelemgbunli nna bie anwo zo konim la anloa ɛlɛba la, Mɛlekezidɛke yiale ye na ɔyilale ye,

²na Ebileham hyɛle mɔɔ ɔnyianle ye wɔ konle ne anu la amuala anu bulu na ɔdule ɛkpɔ ko ɔmanle ye. (Mɛlekezidɛke duma ne abo ngilenu mɔɔ lumua la a le “Pɛlepɛlelilɛ Belemgbunli” yɛɛ kɛmɔ ɛnee ɔle belemgbunli wɔ Salɛm la, ye duma ne abo eza kile “Anzonudwolɛ Belemgbunli.”)

³Mɛlekezidɛke ɛhye, debie biala ɛnle ɛkɛ mɔɔ kile yɛ ɔ ze anzɛɛ ɔ nli a, na yeayɛ ye abusua. Zɔhane ala yɛɛ debie ɛnle ɛkɛ mɔɔ kile yɛ ye awolɛ kenle anzɛɛ ye ewule kenle a. Ɔle kɛ Nyamenle Ara ne ala la; ɔle Sɛlɛvolɛ dahuu.

⁴Bɛdabɛ bɛkola bɛnwu kɛ ɛnee ɔle sonlakpole kpalɛ. Ebileham, yɛ nlenya kpanyinli ne, hyɛle ye ninyɛne mɔɔ ɔnyianle bɛ konle nu la anu bulu na ɔdule ɛkpɔ ko ɔmanle ye.

⁵ Livae abo zo amra noko mɔɔ le sɛlɛvolɛma la, mɛla ne kile kɛ Yizilayɛma ɛhyɛ mɔɔ bɛkɛnyia ye biala la anu bulu na bɛdu ɛkpɔ ko bɛmaa bɛ. Ɛhye kile kɛ ɔwɔ kɛ sɛlɛvolɛma ne die zɛhae debie fi bɛdabɛ bɛ maanle nu amra lɔ, wɔ mekɛ mɔɔ bɛ muala bɛle Ebileham abo zo amra la.

⁶Mɛlekezidɛke ɛnle Livae anlɔnra, noko ɔliele Ebileham, mɔɔ Nyamenle ɛbɔ ye ɛwɔkɛ la ninyɛne ne mɔɔ ɔhyɛle nu bulu na ɔdule ko ɔmanle ye la na ɔyilale ye.

⁷Kpolerazulɛ biala ɛnle nwo kɛ mɔɔ maa nyilalɛ la le kpole tɛla mɔɔ die nyilalɛ ne la.

⁸Ewiade ye anu, bɛdabɛ mɔɔ bɛdie ngyɛnu bulu ne anu ɛkpɔ ko la le menli mɔɔ wu a, na anwuma lɔ, sonla mɔɔ die ngyɛnu bulu ne anu ɛkpɔ ko ne la de aze dahuu.

⁹Eza saa yɛka ye kpalɛ a, yɛkɛze kɛ mekɛ mɔɔ Ebileham duale ye ngyɛnu bulu ne anu ɛkpɔ ko ne la, ɛnee ɔkile kɛ Livae, (mɔɔ ɔ bo zo amra a die zɛhae ngyɛnu bulu ye anu ɛkpɔ ko ne la) ɔdaye yedua.

¹⁰Ɔluakɛ saa bɔbɔ bɛtɛwole Livae a, ɛnee ɔwɔ ɔ nlenya Ebileham akunlu wɔ mekɛ mɔɔ Mɛlekezidɛke yiale ye la.

¹¹Ɔlua Livae abusua ne sɛlɛvolɛlilɛ gyima ngyehyɛlɛ ne azo yɛɛ bɛvale mɛla ne bɛrɛlɛle Yizilayɛma a. Na saa Livae abusua ne sɛlɛvolɛlilɛ gyima ne lile munli a, anrɛɛ Aalɔn yɛɛ ɔwɔ kɛ bɛsie ɔ gyakɛ anu a, na ɔnrɛhyia kɛ eza bɛkɛva sɛlɛvolɛ ngakyile bie bɛkɛzie Mɛlekezidɛke agyakɛ anu.

¹²Ɔluakɛ saa bɛkakyi sɛlɛvolɛlilɛ ne a, ɛnee ɔwɔ kɛ eza bɛkakyi mɛla ne noko.

¹³Yɛ Awulae ne mɔɔ ɔ nwo edwɛkɛ a bɛka la, vi abusua gyɛne nu; ye busuanli bie ɛtɛdile sɛlɛvolɛ ɛlɛ.

¹⁴Yɛze kɛ bɛwole ye wɔ Dwuda abusua nu, yɛɛ Mosisi noko ambɔ abusua ɛhye duma wɔ mekɛ mɔɔ ɔyɛ sɛlɛvolɛma ngyehyɛlɛ ne la.

¹⁵Edwɛkɛ ne anye la ɛkɛ ne wienyi, kɛ sɛlɛvolɛ fofolɛ mɔɔ le kɛ Mɛlekezidɛke la ɛvinde.

¹⁶Tɛ sonla ngyehyɛlɛ nee amaamuo zo a ɔlua mɔɔ bɛyɛle Mɛlekezidɛke sɛlɛvolɛ a, na ɔlua tumi mɔɔ ngoane mɔɔ ɛnlɛ awieleɛ la lɛ ye la azo a bɛwulale ye sɛlɛvolɛ a.

¹⁷ Ɔluakɛ Nyamenle Edwɛkɛ ne se, “Ɛle sɛlɛvolɛ dahuu kɛ Mɛlekezidɛke la.”

¹⁸Ɛhye kile kɛ ɛnee bɛzie ngyehyɛlɛ dɛba ne ahane, ɔboalekɛ ɔnli munli yɛɛ nvasoɛ biala ɛnle zolɛ.

¹⁹Ɔluakɛ Mosisi Mɛla ne angola ammaa ɛhwee anli munli. Na kɛkala, bɛva anyelazo kpalɛ bie bɛra, mɔɔ yɛlua zo a yɛbikye Nyamenle a.

²⁰Bieko, Nyamenle ndane ne wɔ ɛkɛ. Ndane zɛhae, ɛnee bie ɛnle ɛkɛ ɛmmaa menli mɔɔ bɛlumuale bɛwulale bɛ sɛlɛvolɛ la.

²¹ Na Gyisɛse sɛlɛvolɛlilɛ ɛdeɛ ne ndane wɔ nwolɛ. Nyamenle Edwɛkɛ ne se, “Awulae ɛha ndane na ɔnrɛhakyi ye adwenle ɛlɛ: ‘Ɛle sɛlɛvolɛ dahuu.’ ”

²²Ngakyile ɛhye maa Gyisɛse yɛ ngyekyeleɛ kpalɛ bie agyinlanudivolɛ.

²³Ngakyile bieko wɔ ɛkɛ: sɛlɛvolɛ ɛhendeɛ ne mɔ zonle, ɔluakɛ bɛwule na bɛangola bɛanyɛ bɛ gyima ne.

²⁴Noko Gyisɛse de aze dahuu, yɛɛ ye sɛlɛvolɛ gyima ne ɛngakyi ɛngɔ awie lɔ.

²⁵Ɛhye ati ɔkola kɛkala nee mekɛ biala ɔdie bɛdabɛ mɔɔ bɛdua ɔ nwo zo bɛba Nyamenle ɛkɛ ne la ngoane, ɔluakɛ ɔde aze na ɔdi bɛ ti mgbɔdalɛ wɔ Nyamenle ɛkɛ ne dahuu.

²⁶Sɛlɛvolɛ Kpanyinli mɔɔ le zɛhae la yɛɛ kola sɔ yɛ wɔ yɛ ɛhyianlɛ biala anu a, ɔluakɛ ɔle nwuanzanwuanza; ɛtane biala ɛnle ɔ nwo anzɛɛ ye nu. Bɛye ye bɛzie ahane bɛvi ɛtanevolɛma anu na bɛmaa ye zo bɛhɔ anwuma.

²⁷ Ɔnle kɛ sɛlɛvolɛ mgbanyinli ɛhendeɛ ne mɔ, mɔɔ ɔwɔ kɛ kɔ azukponle nwo kenle biala, kɛ bɛkabɔ bɛ ɛtane nwo azu na bɛabɔ bie bɛamaa awie mɔ la. Ɔvale ɔ nwo ɔbɔle azu ne kokye ala.

²⁸Mosisi Mɛla ne maa adenle maa bɛyɛ menli mɔɔ ɛndenrɛ la sɛlɛvolɛ mgbanyinli. Na Nyamenle ɛwɔkɛ ne mɔɔ ndane ne wɔ nu, na ɔrale nzinlii la, yɛɛ ɛye Ralɛ ne mɔɔ di munli dahuu la kɛ ɔyɛ Sɛlɛvolɛ Kpanyinli a.