Read Nzema Hib 8 Bible Online

Hib 8 - Nzema bible

Hib 8

¹ Mɔɔ yɛlɛka la amuala, saa yɛbɔ ye kpɔkɛ ko a, yemɔ a le ɛhye: yɛlɛ Sɛlɛvolɛ Kpanyinli zɛhae, mɔɔ de Nyamenle Bedevinli ne Belemgbunli Ebia ne fema zo wɔ anwuma.

²Ɔyɛ ye Sɛlɛvolɛ Kpanyinli gyima ne wɔ anwuma lɔ Nwuanzanwuanza Ɛleka ne, wɔ ndanlɛ sua ne mɔɔ tɛ sonla a zile na Nyamenle ɔdaye a yezi la anu.

³Sɛlɛvolɛ Kpanyinli biala mɔɔ bɛkɛye ye la fa ahyɛlɛ ninyɛne nee nane bɔ azu maa Nyamenle. Zɔhane ati ɔwɔ kɛ yɛ Sɛlɛvolɛ Kpanyinli ne ɔdaye ɔnyia debie ɔbɔ azu.

⁴Saa ɔwɔ ewiade ye anu a anrɛɛ ɔnrɛyɛ sɛlɛvolɛ ɛlɛ, ɔluakɛ sɛlɛvolɛma mɔɔ dua Mosisi mɛla ne azo fa ninyɛne bɔ azu la zonle.

⁵ Na mɔɔ bɛyɛ la le gyima mɔɔ bɛyɛ ye wɔ anwuma lɔ la sɔhovolɛ. Ɔluakɛ mɔɔ Mosisi bazi ndanlɛ sua ne la, Nyamenle zele ye kɛ, “Bɔ mɔdenle kɛ ɛkɛyɛ debie biala ɛkɛmaa ɔkɛzɔho mɔɔ bɛvale bɛhilele wɔ wɔ boka ne azo lɔ la.”

⁶Na kɛ ɔde la a le kɛ bɛmaa Gyisɛse sɛlɛvolɛ gyima mɔɔ sonle bolɛ kpole tɛla dɛba ne la. Ɔboalekɛ ɔgyi ninyɛne kpalɛ nwo ɛwɔkɛ zo.

⁷Saa alumua ngyekyeleɛ ne lile munli a, anrɛɛ yeangyia kɛ eza bɛkɛkyekye fofolɛ.

⁸ Ɔluakɛ Nyamenle nwu nvonleɛ dɔɔnwo wɔ ye menli nwo, yemɔti ɔse, “Medame Awulae mese, mekɛ bara mɔɔ me nee Yizilayɛma nee Dwuda abusua ekpunli ne bakyekye ngyekyeleɛ fofolɛ a.

⁹Ɔnrɛyɛ kɛ ngyekyeleɛ ne mɔɔ me nee bɛ nlenya mɔ kyekyele wɔ mekɛ mɔɔ menyele bɛ menvile Yigyibiti azɛlɛ zo la. Bɛanli nɔhalɛ wɔ zɔhane ngyekyeleɛ ne mɔɔ me nee bɛ kyekyele la anwo, yemɔti meandɛne bɛ zo, Medame Awulae a mese a.

¹⁰Akee ngyekyeleɛ fofolɛ mɔɔ me nee Yizilayɛma bakyekye wɔ mekɛ mɔɔ bara la ɛne: Mebava me mɛla meawula bɛ adwenle nu, na meahɛlɛ ye bɛ ahonle zo. Mebayɛ bɛ Nyamenle, na bɛayɛ me menli.

¹¹Ɔnrɛhyia kɛ bɛ nuhua biala kɛhilehile ɔ gɔnwo, anzɛɛ kɛze ɔ diema kɛ ‘Nwu Awulae.’ Ɔluakɛ ngakula nee mgbanyinli banwu me.

¹²Mebava bɛ ɛtane meahyɛ bɛ na menrɛhakye bɛ nvonleɛ ne mɔ bieko.”

¹³Saa Nyamenle ɛlɛka ngyekyeleɛ fofolɛ nwo edwɛkɛ a, ɛnee ɔkile kɛ yemaa alumua ngyekyeleɛ ne ɛyɛ mgbane. Debie biala mɔɔ kɛkpa nwolɛ la ɛngyɛ biala na yeaminli.