Read Nzema Hib 9 Bible Online

Hib 9 - Nzema bible

Hib 9

¹Ɛnee alumua ngyekyeleɛ ne lɛ ɛzonlenlɛ nwo ngyehyɛlɛ yɛɛ ɛleka mɔɔ bɛhyehyɛ kɛ ɔle nwuanzanwuanza na ɔwɔ kɛ bɛsonle ɛkɛ ne la.

² Bɛzile ndanlɛ sua ko, ye findezo mgbɛnu ne bɛfɛlɛ ye Ɛleka Nwuanzanwuanza. Ɛkɛ a kɛnlaneɛ baka ne, ɛkponle ne nee kpanwo ne mɔɔ bɛfa bɛbɔ azu bɛmaa Nyamenle la wɔ a.

³ Wɔ mgbɛnu ne mɔɔ tɔ zolɛ nwiɔ la anzi, ndanlɛ sua ko noko wɔ ɛkɛ; bɛfɛlɛ ɛkɛ ne Nwuanzanwuanza nu Nwuanzaanwu Ɛleka.

⁴ Ɛke yɛɛ ezukoa azukponle ne mɔɔ bɛkpu ɛyɛlɛ zo yɛɛ Ngyekyeleɛ Ɛlɛka ne mɔɔ bɛva ezukoa nvutuke bɛyɛ ye sɔɔnwo la wɔ a. Ezukoa dwora ne mɔɔ mana wɔ nu la gyi Ɛlɛka ne anu. Aalɔn baka ne mɔɔ kpakyele nya, nee awolɛ ndɛbandɛba nwiɔ ne mɔɔ bɛhɛlɛ mɛla ne zolɛ la wɔ Ɛlɛka ne anu.

⁵ Akee anyunlunyia abɔdeɛ mɔɔ lɛ ndɛbalɛ la zinze Ɛlɛka ne azo anwuma na bɛdɛlɛdɛlɛ bɛ ndɛba anu wɔ anwunvɔnezelɛ ebia ne azo, bɛlɛkile kɛ Nyamenle wɔ ɛkɛ. Na kɛkala, mekɛ ɛtɛdwule mɔɔ yɛkilehile debie biala mɔɔ wɔ ɛkɛ ne la anu ngoko ngoko a.

⁶ Kɛ bɛhyehyɛ ninyɛne mɔɔ wɔ ɛkɛ ne la ɛne. Alehyenlɛ biala sɛlɛvolɛma kɔ ndanlɛ sua ne findezo mgbɛnu ne anu kɔyɛ bɛ gyima;

⁷ noko Sɛlɛvolɛ Kpanyinli ne ala yɛɛ kɔ ndanlɛ sua ne mɔɔ wɔ sua ne mgbɛnu ne mɔɔ tɔ zolɛ nwiɔ la anzi la anu a, yɛɛ ɔkɔ ɛkɛ ne ɛvolɛ ɛvolɛ. Ɔlɛkɔ ɛkɛ a ɔfa mogya ɔkɔbɔ azu ɔmaa Nyamenle wɔ ɔdaye Sɛlɛvolɛ Kpanyinli ne nee menli kɔsɔɔti bɛ ɛtane mɔɔ bɛyɛ la ati.

⁸Sunsum Nwuanzanwuanza ne ngilehilelɛ mɔɔ wɔ ngyekyeleɛ ɛhye anwo la kile kɛ suzuamgba ala mɔɔ findezo ndanlɛ sua ne ɛtɛyele ɛkɛ ne la, adenle biala ɛnle ɛkɛ mɔɔ bɛfa nu bɛkɔ Nwuanzanwuanza nu Nwuanzaanwu Ɛleka ne a.

⁹Ɛhye le ɛzukoalɛdeɛ maa yɛ ɛnɛ mekɛ ye. Ɔkile kɛ ahyɛlɛdeɛ nee nane azubɔlɛ ne mɔɔ bɛbɔ bɛmaa Nyamenle la ɛngola ɛmmaa sonvolɛma ahonle nu ɛnde.

¹⁰Aleɛ nee nza nee bɛ nwo ɛnluanlɛ ngakyile nwo nyɛleɛ yɛɛ bɛyɛ a. Na ɛhye noko le ɛnyelɛ zo debie mɔɔ wɔ ɛkɛ a, kɔkpula mekɛ mɔɔ Nyamenle kɛhakyi ninyɛne kɔsɔɔti fofolɛ la.

¹¹Na Kelaese ɛra kɛ ninyɛne kpalɛ kɔsɔɔti anwo Sɛlɛvolɛ Kpanyinli. Ndanlɛ sua ne mɔɔ ɔyɛ gyima nu la le kpole, ɔdi munli ɔtɛla biala; tɛ sonla a zile a, yɛɛ ɔmboka ewiade ɛhye anwo a bɛbɔle a.

¹²Mɔɔ Kelaese wolole ndanlɛ sua ɛhye anu kokye ne ala na ɔhɔle Nwuanzanwuanza nu Nwuanzaanwu Ɛleka ne la, yeanva mbɔnkye nee nlankɛ mogya a ɔbɔle azu ne a; ɔvale ɔdaye mumua ne ye mogya a ɔbɔle azu ɔvale ngoanelielɛ mɔɔ ɛnlɛ awieleɛ la ɔrɛlɛle yɛ a.

¹³ Bɛkponde nlankɛ nee mbɔnkye mogya nee ɛnlankɛ ralɛ mɔɔ bɛkɛyela ye la nzonle wɔ menli nwo na bɛfa ye kɛ ɔkola ɔnrinzi bɛ nwo evinli muala.

¹⁴Kɛmɔ ɛhye le nɔhalɛ la, ɛnee ɛnea a ɛkɛnwu kɛ Kelaese mogya ne kola di gyima kpole maa ɔbo zolɛ. Yelua Sunsum ne mɔɔ ɛnwu ɛlɛ la azo yeva ɔ nwo yebɔ azu mɔɔ di munli la yemaa Nyamenle. Ye mogya ne bade yɛ adwenle nu avi nyɛleɛ mgbane mgbane mɔɔ fa yɛ kɔ ewule nu la anwo na yɛazonle tease Nyamenle ne.

¹⁵Ɛhye ati Kelaese a le sonla mɔɔ de ngyekyeleɛ fofolɛ ne abo a, amaa bɛdabɛ mɔɔ Nyamenle ɛvɛlɛ bɛ la anyia ye nyilalɛ ne mɔɔ ɛnlɛ awieleɛ mɔɔ ɔvale ɔbɔle ɛwɔkɛ la bie. Ɛhye kola yɛ zɔhane, ɔboalekɛ bɛha mogya bɛgua, bɛva bɛye menli kɔsɔɔti bɛvi bɛ ɛtane mɔɔ bɛyɛle wɔ mekɛ mɔɔ bɛwɔ alumua ngyekyeleɛ ne abo la anu.

¹⁶Saa awie yɛ “wele” na saa ɔwɔ kɛ bɛtulu nu a, kyesɛ bɛkile kɛ ahenle mɔɔ yɛle zɔhane kɛlata ne la ɛwu.

¹⁷Ɔluakɛ saa ahenle mɔɔ yɛle “wele” ne la de aze a, nvasoɛ biala ɛnle mɔɔ yeyɛ la azo; saa ɔwu a yɛɛ ɛnee nvasoɛ ɛra zolɛ a.

¹⁸Ɛhye ati alumua ngyekyeleɛ ne bɛvale mogya a bɛhyele ɔ bo a.

¹⁹ Mɔɔ Mosisi gengale mɛla ne amuala hilele menli ne na ɔwiele la, akee ɔvale ɛnlankɛ nee abɔnkye mogya ɔkpotole nzule nu, ɔvale nyinlanyinla nee boane kɔkɔlɛ ndɛkɛ ɔkyekyele na ɔvale ɔbɔle mogya ne anu ɔkpondenle Mɛla Buluku ne nee menli ne amuala anwo,

²⁰na ɔhanle kɛ, “Ɛhye a le mogya ne mɔɔ sɔ ngyekyeleɛ ne mɔɔ Nyamenle ɛyɛ kɛ bɛli zolɛ la anloa a”.

²¹ Zɔhane ala yɛɛ Mosisi eza kpondenle mogya ne wɔ Ndanlɛ Sua ne nee ninyɛne mɔɔ bɛfa bɛyɛ ɛzonlenlɛ la anwo a.

²² Nɔhalɛ, mɛla ne kile kɛ mogya ala a bɛfa bɛte debie biala anwo a, yɛɛ ɔwɔ kɛ bɛtwi mogya na bɛava bɛali ɛtane nwo mgbɔdalɛ.

²³Ninyɛne zɛhae mɔ, mɔɔ le anwuma lɔ ɛdeɛ kpalɛ ne sɔhovolɛ la, yɛɛ bɛte nwolɛ wɔ adenle zɛhae anu a. Anwuma lɔ ninyɛne ɛdeɛ kpalɛ ne hyia azubɔlɛ kpalɛ mɔɔ tɛla ɛhye a.

²⁴Ɔluakɛ Kelaese angɔ Ɛzonlenlɛ Sua mɔɔ menli a ɛzi na ɔle anwuma lɔ ɛdeɛ ne sɔhovolɛ la anu. Yehɔ anwuma lɔ, na ɛkɛ ne yɛɛ ɔfinde Nyamenle anyunlu dahuu ɔkpa yɛ ti kyɛlɛ a.

²⁵Dwuuma Sɛlɛvolɛ Kpanyinli ne fa mogya kɔ Nwuanzanwuanza nu Nwuanzaanwu Ɛleka ne ɛvolɛ ɛvolɛ. Na Kelaese ɛdeɛ yeangɔ fane dɔɔnwo kɛ ɔfa ɔ nwo yeahɔbɔ azu ne,

²⁶ɔluakɛ saa ɔle zɔhane a, anrɛɛ ɔkile kɛ ɔwɔ kɛ Kelaese nwu amaneɛ fane dɔɔnwo, ɔvi ewiade mɔlebɛbo ne. Noko ɔrale kokye wɔ mekɛ mɔɔ ninyɛne kɔsɔɔti ɛlɛkɔ awieleɛ la, na ɔvale ye mogya ɔbɔle azu ne ɔnununle ɛtane muala.

²⁷Bɛhyehyɛ bɛmaa sonla biala kɛ ɔwu kokye, na ewule ne anzi Nyamenle abua ye ndɛne.

²⁸ Zɔhane ala yɛɛ bɛvale Kelaese ɔdaye noko bɛbɔle azu kokye ala kɛ ɔranunu menli dɔɔnwo ɛtane ne mɔ a. Ɔbara bieko, na tɛ kɛ ɔ nee ɛtane bali ɔ, na ɔbalie menli ne mɔɔ ɛlɛkendɛ ye la ngoane.