Read Nzema Gye 1 Bible Online

Gye 1 - Nzema bible

Gye 1

¹Kɛlata ɛhye vi Gyemise, Nyamenle nee Awulae Gyisɛse Kelaese akɛlɛ ne ɛkɛ. Mebiza Nyamenle menli ne mɔɔ ɛde ɛkponde aleɛabo la amuala kɔsɔɔti ahye.

²Me mediema, saa sɔnea ngakyile dɔɔnwo ba bɛ nwo zo a bɛli nwolɛ fɛlɛko;

³ɔluakɛ bɛze kɛ saa bɛ diedi maa bɛkola sɔnea ɛhye mɔ anloa gyinla a ɛnee ɔkile kɛ bɛlɛ diedi nu anwosesebɛ.

⁴Bɛzi pi wɔ anwosesebɛ ɛhye anu na bɛgyinla kpundii mɔɔ bɛmkpo aze ɛlɛ, amaa bɛali munli bɔkɔɔ mɔɔ bɛngyia debie biala anwo a.

⁵Saa bɛ nuhua bie hyia nrɛlɛbɛ a, ɔzɛlɛ Nyamenle na ɔkɛva ɔkɛmaa ye; ɔboalekɛ Nyamenle ati akunlu le kɛnlɛma na ɔyila bɛdabɛ mɔɔ bɛbiza ye debie la.

⁶Noko anrɛɛ bɛva diedi mɔɔ bɛ ti anu keseeyɛlɛ anzɛɛ kpolerazulɛ biala ɛnle nu la bɛbiza. Mɔɔ ye adwenle ɛngyinla la le kɛ nyevile sɛlɛkye mɔɔ anwoma bɔ ye kɔ ba la.

⁷Sonla mɔɔ le zɛhae, mɔɔ ɛngola ɛnzi ye adwenle pi wɔ debie biala mɔɔ ɔyɛ la anwo la mmadwenle kɛ ɔkɛnyia debie ɔkɛvi Awulae ɛkɛ.

⁹Keleseɛnenli biala mɔɔ anrɛɛ di ehyia na Nyamenle ɛmaa ye zo la ɛli fɛlɛko,

¹⁰ yɛɛ Keleseɛnenli biala mɔɔ le sukoavolɛ mɔɔ Nyamenle kɛha ye aze la ɛmaa ɔ nye ɛlie. Ɔluakɛ sukoavolɛma bakpolo agua kɛ ɛhoayelɛ nu ndotolo.

¹¹Sɛnzɛne ne tudu a ɔfi ye ewia wuluwulu ne ɔbɔ ndile ɔmaa ɔkyengye, ye ndotolo ne kpolo gua, na ɔminle ye kɛnlɛma ne. Zɔhane ala yɛɛ sukoavolɛ mɔɔ anye wɔ ye gyima nwo ala la baminli a.

¹²Nyilalɛ ɛha sonla ne mɔɔ kɛgyinla kpundii wɔ sɔnea nu la, ɔboalekɛ saa ɔko ɔtɔ zolɛ a ye ahatualɛ a le ngoane ne mɔɔ Nyamenle ɛva ɛbɔ menli mɔɔ kulo ye la ɛwɔkɛ la.

¹³Saa awie kɔ ngyegyelɛ nu a ɔmmaka kɛ, “Nyamenle ɛlɛsɔ me anlea.” Ɔluakɛ ɛtane ɛngola ɛnzɔ Nyamenle ɛnnea yɛɛ Nyamenle mumua ne ɛnzɔ awie biala ɛnnea.

¹⁴Sonla ɔdaye ye atiakunluwɔzo ɛtane ne a sɔ ye nea na ɔtwe ye ɔfi Nyamenle anwo a.

¹⁵Saa ye munzule atiakunluwɔzo ne nrenzɛ a ɔwo ɛtane, yɛɛ ɛtane wie nyi a ɔwie ewule.

¹⁶Me mediema kulovolɛma, bɛmmamaa bɛbɛlɛbɛla bɛ!

¹⁷Ɛlolɛdeɛ kpalɛ biala nee ahyɛlɛdeɛ biala mɔɔ di munli la vi anwuma; ɔvi Nyamenle Selɛ ne mɔɔ bɔle anwuma ahɛnlaneɛ ne mɔ la ɛkɛ a ɔba a. Nyamenle ɛnli ngakyile, anzɛɛ ɔmboa ɔngakyi wienyi awozinli.

¹⁸Ɔdaye ye ɛhulolɛ zo yɛɛ ɔluale nɔhalɛ edwɛkɛ ne azo ɔwole yɛ a, amaa yɛayɛ ye abɔdeɛ nu alumuama.

¹⁹Mediema kulovolɛma, bɛhakye ɛhye. Ɔwɔ kɛ awie biala tie ɔ nzo anwo, ɔmmatendɛ dɔɔnwo yɛɛ ɔmmafa ɛya.

²⁰Ɛyavalɛ ɛmmaa sonla ɛnzɔ Nyamenle anye.

²¹Yemɔti bɛvuandi subane ɛtane nee nyɛleɛ ɛtane kɔsɔɔti bɛgua na bɛdo bɛ nwo aze bɛmaa Nyamenle, bɛlie edwɛkɛ ne mɔɔ yelua ye wɔ bɛ ahonle nu la bɛdo nu, na yemɔ yɛɛ ɔkola ɔdie bɛ ngoane a.

²²Bɛmmabɛlɛbɛla bɛ nwo bɛyɛ mɔɔ asɛɛ bɛtie ye edwɛkɛ ne ala a; bɛyɛ mɔɔ bɛkɛde la.

²³Mɔɔ kɛdie edwɛkɛ ne na yeanva yeambɔ ye ɛbɛla la le kɛ sonla mɔɔ nea ɔ nyunlu wɔ neanleɛ nu la.

²⁴Ɔnea ɔ nyunlu ɔwie na ɔkɔ a ɛkɛ ne ala ɔ rɛle fi ɔdaye ye sonla holɛ mɔɔ ɔzɔho ye la.

²⁵Na awie mɔɔ neɛnlea fanwodi mɛla ne mɔɔ di munli la anu, na ɔsɔ nu dwaa ɔfa ɔbɔ ye ɛbɛla, na ɔndie ye mgbane ala ɔmmaa ɔ rɛle ɛnvi, na ɔyɛ gyima mɔɔ ɔwɔ kɛ ɔyɛ la, yemɔ yɛɛ Nyamenle kɛyila ye wɔ ye ɛbɛlabɔlɛ nu a.

²⁶Saa awie dwenle kɛ ɔsonle Nyamenle na ɔmmua ɔ nloa azo a, ye Nyamenlezonlenlɛ ne le mgbane, na ɔbɛlɛbɛla ɔdaye ye ɛkɛla.

²⁷Nyamenlezonlenlɛ kpalɛ mɔɔ evinli biala ɛnle nwolɛ wɔ Nyamenle Selɛ ne anyunlu la a le kɛ ɛkɛkpɔla nrisa nee ahunlanvolɛ wɔ bɛ anwongyelelɛ nu, ɛkɛboa bɛ na ɛkɛzie ɛ nwo gyɛlɛɛnye mɔɔ ewiade amra ɛnnyia ɛ nwo ngehanleɛ biala la.