Read Nzema Gye 2 Bible Online

Gye 2 - Nzema bible

Gye 2

¹Me mediema, kɛmɔ bɛlɛ diedi wɔ yɛ Awulae Gyisɛse Kelaese, mɔɔ le anyunlunyia Awulae ne la anu la ati, bɛmmanea sonla nyunlu na bɛabu ye bie.

²Saa ngyengyene nu bie sukoavolɛ mɔɔ ezukoa nvutuke mgbɔdelera gua ɔ sa na ɔheda ɛdakpa la ba bɛ nyianu ne bie, na ehyianli mɔɔ heda ɛdanlɛ mgbane bie la ɔdaye noko ɔba bie, na

³saa bɛkile anyenzɔlɛ bɛmaa mɔɔ heda ɛdanlɛ kɛnlɛma ne la, na bɛse ye kɛ, “Mesɛlɛ wɔ, tɛnla ebia kpalɛ ɛhye azo.” na bɛse ehyianli ne kɛ, “Gyinla nehane, anzɛɛ tɛnla aze wɔ me gyakɛ abo ɛke” a,

⁴ɛnee bɛdi ngilehilenu nwo fɔlɛ na bɛlua adwenle ɛtane zo bɛbua ndɛne mɔɔ ɛngɔ adenle nu a.

⁵Me mediema kulovolɛma, bɛdie! Bɛdabɛ mɔɔ bɛle ehyianvolɛma wɔ aleɛabo la, bɛmɛ a Nyamenle ɛkpa nu ɛye bɛ, ɛyɛ bɛ diedi nu sukoavolɛma na bɛnyia Nyamenle belemgbunlililɛ ne, mɔɔ yeva yebɔ ɛwɔkɛ yemaa bɛdabɛ mɔɔ bɛkulo ye la a.

⁶Na bɛmɛ bɛmbu ehyianvolɛma bie. Asoo tɛ sukoavolɛma a sisi bɛ na bɛtwili bɛ bɛkɔ ndɛnebuavolɛma anyunlu la?

⁷Asoo tɛ sukoavolɛma a ka duma kpalɛ ne mɔɔ bɛfa bɛfɛlɛ bɛ la anwo edwɛkɛ ɛtane ɛtane la?

⁸ Saa bɛdi Belemgbunlililɛ ne anwo mɛla ne, mɔɔ Nyamenle Edwɛkɛ ne se la kɛ, “Kulo ɛ gɔnwo kɛ ɛdawɔ ɛ nwo” la azo a, ɛnee bɛlua nɔhalɛ adenle ne anu.

⁹Na saa bɛnea sonla nyunlu na bɛabu ye bie a, ɛnee bɛyɛ ɛtane, na mɛla ne bu bɛ fɔlɛ.

¹⁰Ɔluakɛ awie biala mɔɔ se ɔdi mɛla ne amuala azo na ɔkɛvo nuhua edwɛkɛ kpɔkɛ ko la ɛdo mɛla ne amuala.

¹¹ Ɔluakɛ sonla ko ne ala mɔɔ hanle kɛ, “Mmafa awuvolɛ” la yɛɛ hanle kɛ, “Mmaku sonla” a. Yemɔti saa wɔanva awuvolɛ na ɛku sonla a ɛnee wɔdo mɛla.

¹²Bɛdendɛ na bɛbɔ bɛ ɛbɛla kɛ menli mɔɔ bɛbava fanwodi mɛla ne bɛabua bɛ ndɛne la.

¹³Sonla mɔɔ ɛnze anwunvɔne la, Nyamenle ɛnrɛze ye anwunvɔne wɔ ye ndɛnebualɛ nu; anwunvɔnezelɛ fo keda ndɛnebualɛ zo.

¹⁴Me mediema, saa awie ka ye kɛ, “Melɛ diedi” na ye nyɛleɛ ɛngile zɔhane a, ɛnee duzu nvasoɛ yɛɛ ɔnyia a? Asoo ye diedi zɔhane kɛhola kɛlie ye ngoane?

¹⁵Saa adiema nrenya bie anzɛɛ adiema raalɛ bie ɛnlɛ ɛdanlɛ ɛngeda yɛɛ ɔhyia aleɛ nwo,

¹⁶na ɛse ye kɛ, “Nyamenle ɛyila wɔ. Ɛ nwo ɛyɛ wɔ wuluwulu na di aleɛ maa ɛ ko ɛyi” na saa wɔammaa ye ninyɛne mɔɔ hyia maa ngoane la a ɛnee duzu nvasoɛ a wɔ mɔɔ ɛka la azo a?

¹⁷Zɔhane ati diedi mɔɔ gyimayɛlɛ ɛmboka nwo la le wulera.

¹⁸Awie baze kɛ, “Sonla ne bie lɛ diedi yɛɛ ko noko kola yɛ gyima.” Me mualɛ a le kɛ, kile me kɛ sonla si nyia diedi mɔɔ gyimayɛlɛ ɛmboka nwo la, na medame noko menwɔva me gyimayɛlɛ menwɔhile wɔ me diedi.

¹⁹Bɛdie bɛdi kɛ Nyamenle kokye a wɔ ɛkɛ a. Ɔdaye ne ala ɛne! Mbɔnsam noko die di, na ɛzulolɛ maa bɛ nwo wozo bɛ.

²⁰Kɔnwɔne! Ɛkulo kɛ bɛkile wɔ kɛ diedi mɔɔ gyimayɛlɛ ɛmboka nwo la ɛnzo ma ɔ?[1]

²¹Kɛ Ebileham zile zɔle Nyamenle anye ɛ? Ɔluale gyimayɛlɛ zo wɔ mekɛ mɔɔ ɔvale ɔ ra Ayezeke ɔhɔle kɛ ɔlɛ ye ɔkabɔ azu yeamaa Nyamenle la.

²²Ɛkola ɛnwu kɛ ye diedi nee ye gyimayɛlɛ bɔle nuhua yɛle gyima; ye gyimayɛlɛ ne manle ye diedi ne lile munli.

²³ Ɛhye maa Nyamenle Edwɛkɛ ne yɛ nɔhalɛ kɛ, “Ebileham liele Nyamenle lile, na ɔlua ye diedi ti Nyamenle liele ye kɛ ɔle sonla tenlene.” Na ɔlua zolɛ bɛvɛlɛle Ebileham Nyamenle agɔnwo.

²⁴Yemɔti ɛkola ɛnwu ye kɛ sonla gyimayɛlɛ a maa ɔsɔ Nyamenle anye a, na tɛ ye diedi ngome ɔ.

²⁵ Kɛ tuutuunli Releehabe ɔdaye ɔyɛle ala la ɛne. Ɔliele Dwuu soanvolɛma ne mɔɔ rale banleɛnlea maanle ne anu ahɔ la azie na ɔboale bɛ ɔmanle bɛluale adenle fofolɛ nu bɛhɔle. Ye gyima ɛhye manle ɔzɔle Nyamenle anye.

²⁶Yemɔti, kɛmɔ nwonane mɔɔ sunsum ɛnle nu la le funli la, zɔhane ala yɛɛ diedi mɔɔ gyimayɛlɛ ɛmboka nwolɛ la le wulera a.