Read Nzema Gye 3 Bible Online

Gye 3 - Nzema bible

Gye 3

¹Me mediema! Ɔnle kɛ bɛ nuhua dɔɔnwo yɛ kilehilevolɛma, ɔboalekɛ bɛze kɛ yɛmɛ kilehilevolɛma bɛbabua yɛ ndɛne fenlefenle bɛadɛla menli mɔɔ ɛha la.

²Yɛ muala yɛfo wɔ ninyɛne dɔɔnwo anu. Sonla mɔɔ ɛnvo wɔ ye edwɛkɛ ɛhanlɛ nu la di munli na ɔkola ɔsɔ ɔ nwo.

³Yɛfa bulalɛ yɛwula ɛkpɔnwɔ nloa anu, amaa yeadie yɛ ne, na yɛahola yɛamaa ɔ nee yɛ ahɔ ɛleka biala mɔɔ yɛkulo la.

⁴Bɛnlea amɛle: ɔle kpole yɛɛ anwoma mɔɔ anu yɛ se la a pia ye a; noko bulalɛ ekyi bie a maa ahenle mɔɔ ka amɛle ne la kakyihakyi ɔ nye na ɔmaa ɔkɔ ɛleka biala mɔɔ ɔkulo la a.

⁵Zɔhane ala yɛɛ ɛtafinlimalɛ de a: ɔle sonlabaka ne nvɛyeba ekyi bie, noko ɔkola ɔfa ninyɛne mgbole ɔtu ɔ nwo. Bɛdabɛ bɛnlea kɛ senle ekyi si yela, sɛkye ɛbɔ nu mbaka la.

⁶Ɛtafinlimalɛ le senle. Ɔboa ɔle munzule ewiade ekyi kpalɛ wɔ yɛ sonlabaka ne nvɛyeba ne mɔ avinli na ɔfa ɛtane ɔsalo yɛ sonlabaka ne kpokpoti. Ɔle ɛbolɔ senle kpalɛ mɔɔ fa senle to yɛ ɛbɛlabɔlɛ nu a.

⁷Sonla kola tete nyɛmoa mɔɔ le kɛ nane, nloma, nwɔlɛ yɛɛ nyevile nu fɛlɛ ɔmaa bɛtie ye.

⁸Noko ɛtanfinlimalɛ ɛdeɛ sonla biala ɛngola ɛmbele ye. Ɔle munzule debie mɔɔ ewule bɔlɔ ɛyi ye tɛkɛɛ a.

⁹ Ɛtafinlimalɛ ye ala yɛɛ yɛfa yɛyɛ Awulae nee yɛ Ze Nyamenle ne mo a, yɛɛ ɔdaye ko ne ala a yɛfa yɛwa menli mɔɔ Nyamenle ɛbɔ bɛ kɛ ɔdaye ye ɛsaso la amonle a.

¹⁰Ɛnloanlɛ ko ye ala anu yɛɛ nyilalɛ nee amowa vi ba a. Me mediema! Ɔnle kɛ ɔba ye zɔhane.

¹¹Nzule fɛlɛko nee nzule tondɔtondɔ ɛnvi nzubula ko anu ɛmba.

¹²Me mediema! Feege baka ɛngola ɛnzo ɔlivi ma, yɛɛ vanye baka ɛnzo feege ma. Zɔhane ala yɛɛ nzule tondɔtondɔ ɛngola ɛngakyi nzukpa a.

¹³Bɛ nuhua boni a ze nrɛlɛbɛ na ɔlɛ ndelebɛbo a? Bɛmaa ɔva ye ɛbɛlabɔlɛ kpalɛ ɔpɛ kilemunli ɔhile nyɛleɛ kpalɛ mɔɔ bɛfa mɛlɛbɛnwoaze nee nrɛlɛbɛ bɛyɛ la.

¹⁴Na saa bɛ ahonle nu bɛle anyebolo, bɛle angomedi a, ɛnee bɛmmatu bɛ nloa anu kɛ bɛze nrɛlɛbɛ na bɛyɛ ɛtane bɛtia nɔhalɛ ne.

¹⁵Nrɛlɛbɛ zɛhae ɛnvi anwuma lɔ a ba a; ɔle ewiade nrɛlɛbɛ yɛɛ Nyamenle Sunsum ɛnle sonla ne mɔɔ lɛ ye la nu; sonla zɔhane le abɔnsam.

¹⁶Ɛleka mɔɔ anyebolo nee angomedi wɔ la, ɛkɛ ne yɛɛ mgbonde nee munzule ngakyile biala wɔ a.

¹⁷Nrɛlɛbɛ ne mɔɔ vi anwuma lɔ la anwo te, mɔɔ lumua la ɛne. Eza ɔle anzonudwolɛ, ɔka ɔ nwo aze, ɔlɛ ndelebɛbo; anwunvɔnezelɛ ɛyi ye tɛkɛɛ yɛɛ ɔso nyɛleɛ kpalɛ biala ma. Ɔndwenle adwenle ɛtane, yɛɛ ɔmbɔ adalɛ.

¹⁸Menli mɔɔ kpondɛ anzonudwolɛ na bɛdua anzonudwolɛ nu la bu tenleneyɛlɛ bɛyɔba.