Read Nzema Gye 4 Bible Online

Gye 4 - Nzema bible

Gye 4

¹Duzu a twehwe konle ba a, yɛɛ duzu a fa butule ba bɛ avinli a? Asoo tɛ bɛdabɛ bɛ angomedi atiakunluwɔzo ne mɔ a dahuu nee bɛ ko bɛ nuhua la?

²Bɛkpondɛ ninyɛne bie, noko bɛnnyia bie, yemɔti bɛkuhu bɛ nwo; bɛ nye bolo ninyɛne nwo ɛsesebɛ kɛ bɛ kunlu a anrɛɛ, noko bɛnnyia bɛ ɛlɛ, yemɔti bɛdi butule na bɛko. Bɛ sa ɛnga deɛ ne mɔɔ bɛhyia nwo la, ɔluakɛ bɛmbiza Nyamenle.

³Bɛbiza noko a bɛ sa ɛnga ye, ɔboalekɛ bɛnva adwenle kpalɛ bɛmbiza; bɛbiza ninyɛne mɔɔ kɛmaa bɛ ngome bɛ nye kɛlie la.

⁴Boniayɛma! Bɛnze kɛ saa bɛ nee ewiade tila agɔnwolɛ a ɛnee bɛyɛ Nyamenle agbɔvolɛ ɔ? Sonla mɔɔ fa ewiade ye agɔnwolɛ la kile kɛ ɔle Nyamenle kpɔvolɛ.

⁵Bɛmmadwenle kɛ mɔɔ Nyamenle Edwɛkɛ ne ka la le mgbane. Ɔse, “Nyamenle twe ye Sunsum ne mɔɔ yeva yewula yɛ nu la anwo nungule.”

⁶ Noko Nyamenle ɛlolɛ ne mɔɔ ɔfa ɔmaa la le kpole. Nyamenle Edwɛkɛ ne se, “Nyamenle bɛlɛ mɔɔ le mgbanyizonle la aze, na ɔmaa mɔɔ bɛlɛ ɔ nwo aze la zo.”

⁷Yemɔti bɛdu bɛ nwo bɛmaa Nyamenle. Bɛmmamaa Abɔnsam adenle, na ɔvi bɛ nwo ɔbanriandi.

⁸Bɛhwe bɛbikye Nyamenle, na ɔdaye noko ɔkɛbikye bɛ. Bɛmɛ ɛtanevolɛma, bɛhakyi bɛ subane! Bɛde bɛ ahonle nu, bɛmɛ nabalabama!

⁹Bɛli nyane na bɛzu; bɛmaa bɛ ɛzelekɛ ɛyɛ ɛzunlɛ na bɛ fɛlɛkolilɛ ɛyɛ alɔbɔlɛ.

¹⁰Bɛbɛlɛ bɛ nwo aze wɔ Awulae anyunlu, na ɔkɛmaa bɛ zo.

¹¹Mediema Keleseɛnema, bɛmmakeha bɛ gɔnwo mɔ anwo edwɛkɛ ɛtane ɛtane. Mɔɔ ka ɔ diema anwo edwɛkɛ ɛtane anzɛɛ bua ye ndɛne la tia mɛla ne na eza ɔbua mɛla ne ndɛne. Na saa ɛbua mɛla ne ndɛne a, ɛnee ɔkile kɛ ɛnli mɛla ne azo bieko, na ɛle ye ndɛnebuavolɛ.

¹²Nyamenle angomekye a kola die ngoane na ɔkola ɔsɛkye ye a. Yemɔ ala a ɔmaa mɛla na ɔle ndɛnebuavolɛ a. Na wɔmɔ, ɛdawɔ a le nwane, mɔɔ ɛbua ɛ gɔnwo ndɛne a?

¹³ Bɛdabɛ mɔɔ bɛka kɛ, “Ɛnɛ anzɛɛ ɛhyema yɛbahɔ suakpole ɛhye anzɛɛ ɛhendeɛ ne azo, yeahɔli ɛvolɛ ko, yɛayɛ gyima yeakpondɛ ezukoa dɔɔnwo” la, bɛdie!

¹⁴Bɛnze mɔɔ bazi bɛ nwo zo ɛhyema a. Bɛdabɛ mumua ne, bɛ ngoane tendenle le nyɛ? Bɛ ngoane le kɛ nwonlomɔ ɛbɔlɛ la, ɔngyɛ na yeawe na ɔ bo zo aminli.

¹⁵Mɔɔ ɔwɔ kɛ bɛka la a le kɛ, “Saa ɔyɛ Awulae ɛhulolɛ na yɛde ngoane nu a, yɛbayɛ ɛhye anzɛɛ ɛhendeɛ ne.”

¹⁶Na bɛmɛ, bɛmemaa bɛ nwo zo, bɛtu bɛ nloa anu; na adubɛnwo ɛhye mɔ amuala le ɛtaneyɛlɛ.

¹⁷Yemɔti, sonla ne mɔɔ ze debie kpalɛ mɔɔ ɔwɔ kɛ ɔyɛ na yeanyɛ la, ɔle ɛtane ɔmaa ye.