Read Nzema Gye 5 Bible Online

Gye 5 - Nzema bible

Gye 5

¹Bɛmɛ sukoavolɛma, bɛdie! Bɛbɔ ɔ bo kɛkala bɛzu bɛye awolɛ wɔ munzule mɔɔ ɛlɛba bɛ nwo zo la ati.

² Bɛ anwonyia ne ɛkpɔlɔ, yɛɛ nvɔlekɛ ɛli bɛ ndanlɛ ne mɔ.

³Bɛ ezukoa nvutuke nee dwɛtɛ fufule muala ɛlɔ nrɛnlana, na bɛ nrɛnlana mɔɔ bɛlɔ la bayɛ daselɛ atia bɛ na yeali bɛ nwonane ne kɛ senle. Bɛboɔboa anwonyia nloa wɔ mekɛ mɔɔ ewiade ye ɛlɛba awieleɛ la.

⁴ Bɛtɛtuale bɛ gyimayɛvoma ne mɔ mɔɔ yɛ gyima wɔ bɛ ɛya ne mɔ anu la kakɛ. Bɛdie, bɛ ahatualɛ ne mɔɔ bɛ nye fuu bɛanva bɛammaa bɛ la ati, bɛlɛsu, yɛɛ menli mɔɔ boɔboale aleɛ nloa manle bɛ la ɛzunlɛ ne ɛdwu Tumivolɛ Awulae ne anzo nu.

⁵Bɛ ɛbɛlabɔlɛ wɔ ewiade ye anu ɛyɛ anyelielɛ nee fɛlɛkolilɛ ngome; bɛli bɛ nwo adane, bɛyɛ mbelane kɛ nlankɛ mɔɔ bɛ mekɛ ɛdwu mɔɔ bɛ nee bɛ ɛlɛkɔ ahunleɛ la.

⁶Bɛbua sonla mɔɔ ɛnli fɔlɛ la ewule fɔlɛ bɛku ye; noko ɔndɛ ɔ nloa anu![2]

⁷Yemɔti, mediema, bɛzi abotane bɛhɔkpula Kenle ne mɔɔ Awulae kɛra la. Bɛnlea ɛyazonlɛnli ne, ɔkendɛ ɔmaa azɛlɛ ye maa ye nzoleɛ ngɛnlɛma, ɔsi abotane ɔkendɛ ɔmaa fɔsɛlɛ ne nee bokile ne tɔ zolɛ.

⁸Bɛdabɛ noko ɔwɔ kɛ bɛsi abotane. Bɛmaa bɛ nye ɛla, ɔluakɛ Awulae ɛralɛ ne ɛbikye.

⁹Mediema, bɛmmatendɛ bɛ gɔnwo mɔ bɛ nzo abo, amaa bɛambua bɛdabɛ noko bɛ ndɛne. Ndɛnebuavolɛ ne ɛbikye, ɔgyi bɛ nlenkɛ ne mɔ anloa.

¹⁰Mediema, bɛhakye Nyamenle kpɔmanvolɛma ne mɔ mɔɔ luale Awulae duma nu dendɛle la. Bɛva bɛ abotane ne mɔɔ bɛnyianle ye bɛgyinlanle kpundii wɔ nyane nu la bɛyɛ ndonwo.

¹¹ Bɛdabɛ mɔɔ bɛgyinlanle kpundii, bɛvale abotane bɛzɔle nyane bɛhɔle awieleɛ la yɛɛ yɛka kɛ Nyamenle ɛyila bɛ a. Se bɛde Dwobu ɔdaye ye abotane ɛdeɛ ne mɔɔ ɔnyianle ɔvale ɔgyinlanle kpundii ɔzɔle ye nyane ne la anwo bie, yɛɛ eza bɛze kɛ awieleɛ ne Nyamenle zile lole ye la. Nyamenle se anwunvɔne yɛɛ ɔ kunlu yelɛyela ye.

¹² Me mediema, mɔɔ hyia kpole kpalɛ la a le kɛ, bɛmmaka ndane hweledede; bɛmmaka anwuma anzɛɛ aze anzɛɛ debie gyɛne biala bɔbɔ. Bɛmaa bɛ “Ɛhɛe” ɛyɛ ɛhɛe, bɛ “Kyɛkyɛ” ɛyɛ kyɛkyɛ, amaa Nyamenle andea bɛ.

¹³Bɛ nuhua bie wɔ ngyegyelɛ nu ɔ? Bɛmaa ɔzɛlɛ. Bie ɛlɛdi fɛlɛko ɔ? Bɛmaa ɔdo ayɛlɛyelɛ edwɛne.

¹⁴Bɛ nuhua bie ɛnde kpɔkɛ ɔ? Bɛmaa ɔvɛlɛ asɔne mgbanyima ne mɔ na bɛzɛlɛ bɛmaa ye, na bɛkpokpa ye nwole wɔ Awulae duma nu.

¹⁵Saa bɛfa diedi bɛyɛ nzɛlɛlɛ ɛhye a, wuleravolɛ ne anwo baza; Awulae badwazo ye, na saa yeyɛ ɛtane a yeava ye ɛtane yeahyɛ ye.

¹⁶Yemɔti, bɛha bɛ ɛtane ne mɔ bɛhile bɛ nwo ngoko ngoko, na bɛzɛlɛ bɛmaa bɛ nwo ngoko ngoko, na bɛkɛde kpɔkɛ. Sonla tenlene biala nzɛlɛlɛ yɛ nla eza tumi wɔ nu.

¹⁷ Yilaegya le sonla kɛ yɛdayɛ ala la; noko ɔzɛlɛle kɛ ezule mmatɔ la, ezule andɔ azɛlɛ ye azo dedee ɛvolɛ nsa siane nsia.

¹⁸ Na eza ɔzɛlɛle bieko, na ezule dɔle kpole manle aleɛ bule.

¹⁹Mediema, saa bɛ nuhua bie kpɔkye fi nɔhalɛ ne anwo na ɔlɛminli, na bɛ nuhua bie kɔfa ye ba a,

²⁰bɛmaa ɔhakye kɛ: sonla mɔɔ kɛlie ɛtanevolɛ kɛvi ye ɛtane nu la ɛlie ɛtanevolɛ ne ɛkɛla ɛvi ewule nu na yeheda ɛtane dɔɔnwo azo.