Read Nzema 1 Pit 4 Bible Online

1 Pit 4 - Nzema bible

1 Pit 4

¹Kɛmɔ bɛmɛ bɛ ti Kelaese nwunle amaneɛ wɔ nwonane nu la, ɔwɔ kɛ bɛdabɛ noko bɛnwu ye kɛ bɛbanwu amaneɛ; ɔboalekɛ mɔɔ kɛnwu amaneɛ wɔ nwonane nu la ɛnyɛ ɛtane bieko.

²Na ɔvi mekɛ ne anu mɔɔ kɔ la, ɔmaa Nyamenle ɛhulolɛ ne dielie ye wɔ ye ɛbɛlabɔlɛ mɔɔ ɛha amozi la anu na ɔgyakyi ye atiakunluwɔzo nzi ɛlilɛ.

³Bɛzɛkye bɛ mekɛ dɔɔnwo bɛyɛ mɔɔ menli mɔɔ ɛnzonle Nyamenle la yɛ la bie. Bɛbɔ adwɔmane ɛbɛla, bɛli bɛ atiakunluwɔzo mgbane mgbane nzi, nza ɛgya bɛ, bɛmaa bɛ nye die mgbane mgbane, bɛbɔ anyiemgba ɛbɛla, na bɛsonle awozonle.

⁴Kɛkala ɔsi bɛdabɛ mɔɔ bɛnzonle Nyamenle la anwo kɛ saa ɛnɛ bɛbɔ ɛbɛla mgbane mgbane ɛhye mɔ a bɛmɛ Kelaese ɛdoavolɛma ɛmbamboka bɛ nwo a, na ɔlua zo bɛkeha bɛ nwo edwɛkɛ ɛtane ɛtane.

⁵Bɛdabɛ bɛ ngome bɛbabu bɛ nyɛleɛ nwo mgbonda bɛahile Nyamenle mɔɔ babua anyewɔzoamra nee mɔwuamra ndɛne la.

⁶Ɛhye ati yɛɛ bɛbɔle Edwɛkpa ne nolo bɛhilele mɔwuamra a, amaa saa bɛlua bɛ nwonane ɛhye azo bɛbua bɛ ndɛne, kɛmɔ bɛbua awie biala la a, sunsum nu bɛadɛnla, kɛmɔ Nyamenle kpondɛ la.

⁷Ninyɛne kɔsɔɔti awieleɛ ɛbikye. Ɛhye ati bɛzɔ bɛ nwo kpalɛ na bɛyɛ bɛ nye gyɛlɛmgbɛɛnye, na bɛahola bɛayɛ nzɛlɛlɛ.

⁸ Mɔɔ hyia kpalɛ la, bɛva bɛ ahonle muala bɛhulo bɛ nwo ngoko ngoko, ɔboalekɛ ɛhulolɛ maa bɛfa ɛtane dɔɔnwo bɛkyɛ.

⁹Bɛmaa adenle bɛmaa bɛ mediema Kelaese ɛdoavolɛma ɛwolo bɛ mɔɔ adendɛbɛnzoabo biala ɛnle nu a.

¹⁰Kɛmɔ bɛ muala bɛnea bɛ Nyamenle ahyɛlɛdeɛ ngakyile ne mɔ boɛ la, ko biala ɛva ye ɛdeɛ mɔɔ yenyia ye la ɛkpondɛ ɔ gɔnwo mɔ kpalɛ ɛyɛlɛ.

¹¹Sonla ne mɔɔ ka Nyamenle edwɛkɛ la ɛnlea ɛha Nyamenle edwɛkɛ ne; mɔɔ sonle noko la ɛva ye anwosesebɛ mɔɔ Nyamenle ɛva ɛmaa ye la amuala ɛzonle, amaa debie biala mɔɔ bɛyɛ la anu menli ava ayɛlɛyelɛ alua Gyisɛse Kelaese anwo zo amaa Nyamenle. Yemɔ yɛɛ anyunlunyia nee tumi le ye ɛdeɛ dahuu a. Amen.

¹²Ayi mɔ, bɛmmamaa amaneɛnwunlɛ kpole mɔɔ bara bɛ nwo zo arazɔ bɛ anlea la yɛ bɛ azibɛnwo kɛ asɛɛ debie ɛzulolɛ bie ɛrado bɛ.

¹³Bɛli fɛlɛko kɛ bɛ nee Kelaese ɛlɛnwu amaneɛ a, amaa saa bɛye ye bɛkile anyunlunyia nu a bɛali fɛlɛko kpole.

¹⁴Saa Kelaese duma nu ti bɛkile bɛ nyane a, nyilalɛ ɛha bɛ, ɔluakɛ ɛhye kile kɛ anyunlunyia sunsum ne mɔɔ le Nyamenle Sunsum ne wɔ bɛ nwo zo.

¹⁵Noko akee bɛmmamaa bɛ biala nwu amaneɛ kɛ ɔle kɔdiawu, awule anzɛɛ yedo mɛla anzɛɛ yeva ɔ nloa yedo awie edwɛkɛ nu.

¹⁶Na saa awie le Kelaese ɛdoavolɛ la ati ɔnwu amaneɛ a, ɔmmamaa ɔyɛ ye nyiane, na ɔyɛ Nyamenle mo kɛ ɔlɛ Kelaese duma ne anu a.

¹⁷Mekɛ ne ɛdwu mɔɔ ɔwɔ kɛ bɛbɔ ndɛnebualɛ ne abo a, na Nyamenle menli ne yɛɛ bɛbalumua bɛabua bɛ ndɛne a. Na saa ndɛnebualɛ ne bɔ ɔ bo wɔ yɛ nwo zo a, ɛnee kɛ ɔkɛzi ɔkɛwie ye wɔ menli mɔɔ ɛnlie Edwɛkpa ne mɔɔ vi Nyamenle ɛkɛ ne la ɛnli la anwo zo ɛ?

¹⁸ Nyamenle Edwɛkɛ ne se, “Saa ɔyɛ se ɔmaa kpalɛma kɛ bɛkɛvi ɛsalɛ a ɛnee kɛ ɛtanevolɛma mɔɔ ɛnzonle Nyamenle la kɛwie ye ɛ?”

¹⁹Zɔhane ati ɔwɔ kɛ bɛdabɛ mɔɔ Nyamenle ɛhulolɛ ti bɛnwu amaneɛ la bɔ ɛbɛla kpalɛ na bɛfa bɛ nwo bɛto bɛ Bɔvolɛ ne anwo zo, ɔluakɛ ɔdi ye ɛwɔkɛ zo dahuu.