Read Nzema 2 Pit 2 Bible Online

2 Pit 2 - Nzema bible

2 Pit 2

¹Mekɛ bie Nyamenle kpɔmanvolɛma alane bie vindele menli ne avinli. Zɔhane ala yɛɛ kilehilevolɛma alane bavinde bɛdabɛ noko bɛ avinli a. Bɛbava adalɛ ngilehilelɛ nee awozinli nu ngehanleɛ mɔɔ sɛkye adwenle la bɛara. Yemɔti bɛbakpo Menlenlɛ ne mɔɔ liele bɛ ngoane la na bɛahwe arɛlevilɛ nu munzule bɛamaa bɛ nwo.

²Menli dɔɔnwo badoa bɛ alua bɛ ɛbɛla mgbane mgbane adenle ɛhye anu, na ɔlua bɛ nyɛleɛ ti menli adendɛ ɛtane atia nɔhalɛ Adenle ne.

³Bɛ anyebolo ti, kilehilevolɛma alane ɛhye mɔ bava adalɛ edwɛkɛ abɛlɛbɛla bɛ anyia bɛ nwo zo nvasoɛ. Bɛbua bɛ ndɛne dɛbadɛba, na ɔla ɛkɛ ɔlɛkendɛ bɛ. Ahenle mɔɔ bazɛkye bɛ la ɛtɛdafele.

⁴Saa Nyamenle anvavi ye soanvolɛma ne mɔɔ vonle ye, na ɔvuandinle bɛ ɔguale hɛɛle, yemaa bɛgua bɛ nwɔnzɔnwɔnzɔ wɔ awozinli kabii ne anu, kɛ bɛhendɛ Ndɛnebualɛ Kenle ne;

⁵ saa Nyamenle anvavi ewiade dɛba ne na ɔvale azuyilɛ ɔzɛkyele ɛtane ewiade ne, na ɔgyakyile Nowa, mɔɔ bɔle Nyamenle pɛlepɛlelilɛ nwo nolo, nee menli nsuu bie;

⁶ saa Nyamenle anvavi na ɔdeanle azuamgbole Sodɔm nee Gomɔla, ɔvale senle ɔzɛkyele bɛ, ɔhilele kɛ kenle bie bɛdabɛ mɔɔ bɛngulo Nyamenle la kɛzi kɛwie ye la,

⁷ na ɔliele Lɔɔto mɔɔ le sonlakpalɛ na menli kpamgbanvolɛma ne vale bɛ adwɔmanebɔlɛ gyegyele ye la ɔvile nu a,

⁸ɛnee nɔhalɛ, saa ɛnea mɔɔ sonlakpalɛ zɛhae nwunle ye na ɔdele wɔ mekɛ mɔɔ ɛnee ɔde menli zɔhane mɔ avinli, nee alehyenlɛ biala ye ɛbolɛ mɔɔ te wɔ bɛ ninyɛndane mɔɔ bɛyɛ la anwo a,

⁹ɛnee Awulae ze kɛ ɔsi ɔdie menli kpalɛ ɔfi bɛ sɔnea nu na ɔsie amumuyɛma wɔ ndeanlɛ bo kɔkpula Ndɛnebualɛ Kenle ne a.

¹⁰Bɛdabɛ mɔɔ bɛli bɛ atiakunluwɔzo ɛtane nzi na bɛkpo Nyamenle la kɛ bɛbawie ye la ɛne. Kilehilevolɛma alane ɛhye mɔ si bɛ kɛnra, bɛmemaa bɛ nwo zo kpalɛ, yɛɛ bɛmbu anyunlunyiama mɔɔ wɔ anwuma la na bɛtendɛ bɛtia bɛ.

¹¹Noko, Nyamenle soanvolɛma bɔbɔ, mɔɔ yɛ se, lɛ tumi tɛla kilehilevolɛma alane ɛhye mɔ la ɛnva ɛya ɛndoɔdoa bɛ ɛngile Awulae.

¹²Menli ɛhye mɔ yɛ bɛ ninyɛne kɛ ɛbɔ nu nane mɔɔ bɛbɔle bɛ kɛ bɛhye bɛ bɛhu bɛ la. Bɛtendɛ ɛtane bɛtia debie biala mɔɔ bɛnze la, na bɛbazɛkye bɛ kɛ ɛbɔ nu nane.

¹³Amumuyɛ mɔɔ bɛyɛ awie mɔ la, bɛbadua bɛ nwolɛ kakɛ. Bɛ anyelielɛ ala a le ewia henlema nza ɛbolɛ nee adwɔmanebɔlɛ mgbole; bɛ nwo yɛ nyiane yɛɛ ɔyɛ anyiemgba bɔbɔ kɛ bɛ nee bɛ kɛdu a. Mekɛ mɔɔ bɛ nee bɛ de ɛkponle ko anwo bɛlɛkpula bɛ sa la ɛnee bɛlɛbɛlɛbɛla bɛ.

¹⁴Adwɔmanebɔlɛ ɛnzea bɛ adenle yɛɛ bɛnze ɛtane nwo nyiane nretee zɛhae. Bɛbɛlɛbɛla bɛdabɛ mɔɔ bɛtɛtinle sunsum nu la. Anyebolo ɛwie bɛ ku! Abule ɛbu bɛ!

¹⁵ Bɛgyakyi adenle kpalɛ ne na bɛminli nwɔnda; bɛva Biyɔ ara Beelam mɔɔ doale ezukoa anyebolo na ɔlile ɛtane

¹⁶na bɛdeanle ye wɔ ɛtaneyɛlɛ nwo la agyakɛ. Asoaso bɔbɔ mɔɔ ɔde zolɛ la vale sonla ɛnelɛ dendɛle ye na ɔduale Nyamenle kpɔmanvolɛ ne ɔmanle ɔgyakyile ye ɛzɛlɛ ninyɛne ne.

¹⁷Menli ɛhye mɔ le kɛ nzubula mɔɔ ɛsesa la, bɛle kɛ nzulemungu mɔɔ ahumu ɛlɛbɔ ye ahɔ la. Nyamenle ɛzie bɛ ɛleka wɔ awozinli kabikabi ne anu.

¹⁸Bɛtu bɛ nloa anu, bɛka edwɛkɛ mɔɔ nrɛlɛbɛ ɛnle nu la na bɛfa adwɔmanebɔlɛ atiakunluwɔzo bɛsɛkye bɛdabɛ mɔɔ bɔ zo mɔɔ bɛlɛbɔ mɔdenle bɛanriandi bɛavi menli mɔɔ de ɛtane nu la avinli la.

¹⁹Bɛfa fanwodi bɛbɔ ɛwɔkɛ, wɔ mekɛ mɔɔ bɛdabɛ mumua ne bɛle subane ɛtane nwo ahanra la. Sonla biala mɔɔ kɛmaa debie kɛvo ɔ nwo zo la le kanranli maa deɛ zɔhane.

²⁰Ɔluakɛ saa menli nwu yɛ Awulae nee Dievolɛ Kelaese Gyisɛse, na ɔlua ɔ ti bɛfi ewiade ninyɛndane nu na eza bɛsia bɛ nzi bɛmaa ninyɛne zɔhane mɔ fo bɛ nwo zo a, ɛnee noko bɛ gyakɔ; bɛbazɛkye kpalɛ wɔ awieleɛ ne bɛadɛla alumua ne.

²¹Ɛnee noko bɔbɔ ɔle kpalɛ kɛ anrɛɛ bɛannwu pɛlepɛlelilɛ adenle ne fee, tɛla kɛ bɛkɛnwu ye na bɛkɛhakyi bɛ nzi bɛkɛzi mɛla nwuanzanwuanza ne mɔɔ bɛva bɛmaa bɛ la.

²² Mɔɔ si bɛ nwo zo la kile kɛ ɛrɛlɛ ne le nɔhalɛ bɔkɔɔ, “Twea fe a ɔsia ɔkɔdi”, yɛɛ “ɛbia kpolike a ɔsia ɔkɔboto ndɛtɛlɛ.”