Read Nzema 1 Dw 1 Bible Online

1 Dw 1 - Nzema bible

1 Dw 1

¹ Yɛlɛkɛlɛ bɛ wɔ ngoane Edwɛkɛ ne mɔɔ mɔlebɛbo ne ɛnee ɔwɔ ɛkɛ ne na yɛde, yɛnwu ye yɛ nye zo, yɛnlea ye kpalɛ, na yɛva yɛ sa yɛha ye la anwo.

² Ngoane Edwɛkɛ ɛhye lale ɔ nwo ali na yɛnwunle ye; zɔhane ati yɛdi nwolɛ daselɛ na yɛka ngoane ne mɔɔ ɛnlɛ awieleɛ mɔɔ nee Selɛ ne a wɔ ɛkɛ na ɔyele ɔhilele yɛ la anwo edwɛkɛ.

³Mɔɔ yɛnwu ye nee mɔɔ yɛde la yɛɛ yɛka yɛahile bɛdabɛ noko a, amaa bɛ nee yɛ adila agɔnwolɛ. Yɛ nee Selɛ ne nee ɔ Ra Gyisɛse Kelaese a ɛdila agɔnwolɛ ɛhye a.

⁴Yɛlɛkɛlɛ ɛhye mɔ amaa yɛ anyelielɛ ne ali munli.

⁵Nrɛlaleɛ mɔɔ yɛde yɛvi ye ɛkɛ ne na yɛka yɛahile bɛ la a le ɛhye: Nyamenle le wienyi, awozinli fee ɛnle ye nu.

⁶Yemɔti, saa yɛka kɛ yɛ nee Nyamenle le agɔnwolɛ, noko yɛbɔ awozinli nu ɛbɛla a, ɛnee yɛle adalɛ na yɛnli nɔhalɛ wɔ ɛdendɛlɛ nee nyɛleɛ nu.

⁷Na saa yɛdua wienyi nu, kɛmɔ Nyamenle de wienyi nu la a, ɛnee yɛle agɔnwolɛma, na ɔ Ra Gyisɛse mogya ne mɔɔ ɔhwinle ɔguale la te yɛ nwo fi ɛtane biala anwo.

⁸Saa yɛka kɛ yɛnyɛ ɛtane a, ɛnee yɛbɛlɛbɛla yɛ nwo, yɛɛ yɛnga nɔhalɛ.

⁹Nyamenle di ye ɛwɔkɛ zo, ɔdi pɛlepɛle. Saa yɛka yɛ ɛtane ne mɔ yɛkile ye a, ɔkɛva ɔkɛhyɛ yɛ na ɔkɛde yɛ nwo ɔkɛvi nyɛleɛ mɔɔ ɛndenrɛ la amuala anwo.

¹⁰Saa yɛka kɛ yɛtɛyɛle ɛtane a, ɛnee yɛmaa Nyamenle ɛbɔ adalɛ, yɛɛ ye edwɛkɛ ne ɛnle yɛ nu.