Read Nzema 1 Dw 2 Bible Online

1 Dw 2 - Nzema bible

1 Dw 2

¹Me mra ngakula, melɛkɛlɛ bɛ kɛlata ɛhye, amaa bɛanyɛ ɛtane, na saa bɛ nuhua bie yɛ ɛtane a, yɛlɛ kamaavolɛ wɔ Selɛ ne anwo lɔ mɔɔ kpa yɛ ti kyɛlɛ a, yemɔ a le Gyisɛse Kelaese, mɔɔ le fɔɔnwonli ko ne.

²Kelaese a le sonla mɔɔ yɛlua ɔ nwo zo mɔɔ bɛva yɛ ɛtane ne mɔ bɛhyɛ yɛ a, yɛɛ tɛ yɛ ngome, na menli mɔɔ wɔ ewiade la amuala boka nwolɛ.

³Saa yɛdi ye mɛla ne mɔ azo a, ɛnee amgba yɛze ye.

⁴Saa awie ka kɛ, “Meze Nyamenle” na ɔnli Nyamenle mɛla ne mɔ azo a, ɛnee ɔle adalɛ, yɛɛ nɔhalɛ biala ɛnle ye nu.

⁵Sonla mɔɔ di Nyamenle edwɛkɛ ne azo la, yemɔ a le sonla ne mɔɔ Nyamenle ɛhulolɛ ne di munli wɔ ye nu la. Adenle ɛhye azo a yɛdua yɛnwu ye kpalɛ kɛ yɛ nee Nyamenle le agɔnwolɛ a.

⁶Ɔwɔ kɛ awie biala mɔɔ nee Nyamenle le agɔnwolɛ la bɔ ye ɛbɛla kɛ Kelaese ɛdeɛ ne la.

⁷ Ayi mɔ, mengɛlɛ mɛla fofolɛ biala membɛlɛ bɛ; dɛba ko ne ala mɔɔ mɔlebɛbo ne bɛnyianle ye la a melɛ melɛbɛlɛ bɛ a. Mɛla dɛba ne a le nrɛlaleɛ ne mɔɔ bɛde ye dɛba la.

⁸Noko akee melɛkɛlɛ mɛla fofolɛ mearɛlɛ bɛ mɔɔ le nɔhalɛ wɔ Kelaese nee bɛdabɛ noko bɛ nu a, ɔboalekɛ awozinli ne ɛlɛse, na nɔhalɛ wienyi ne ɛbɔ ɔ bo ɛlɛta.

⁹Awie biala mɔɔ se ɔde wienyi ne anu, noko ɔkpɔ ɔ diema la, tɛte awozinli nu.

¹⁰Awie biala mɔɔ kulo ɔ diema la de wienyi ne anu, yɛɛ debie biala ɛnle ye nu mɔɔ kɛmaa awie kɛdu koti a.

¹¹Awie biala mɔɔ kpɔ ɔ diema la de awozinli ne anu, na kɛmɔ ɔlua awozinli ne anu la ati, ɔnnwu ɛleka holɛ ko mɔɔ ɔlɛkɔ la, ɔluakɛ awozinli ne ɛzi ɔ nye.

¹²Me mra ngakula, melɛkɛlɛ bɛ, ɔboalekɛ ɔlua Kelaese ati, Nyamenle ɛva bɛ ɛtane ne mɔ ɛhyɛ bɛ.

¹³Egya mɔ, melɛkɛlɛ bɛ, ɔboalekɛ bɛze sonla ne mɔɔ mɔlebɛbo ne ɛnee ɔwɔ ɛkɛ ne la. Mgbavolɛ, melɛkɛlɛ bɛ, ɔboalekɛ bɛli Abɔnsam anwo zo konim. Me mra ngakula, melɛkɛlɛ bɛ, ɔboalekɛ bɛze Selɛ ne.

¹⁴Egya mɔ, melɛkɛlɛ bɛ, ɔboalekɛ bɛze sonla ne mɔɔ mɔlebɛbo ne ɛnee ɔwɔ ɛkɛ ne la. Mgbavolɛ, melɛkɛlɛ bɛ, ɔboalekɛ bɛlɛ anwosesebɛ, yɛɛ Nyamenle Edwɛkɛ ne de bɛ nu, na bɛli Abɔnsam anwo zo konim.

¹⁵Bɛmmakulo ewiade anzɛɛ ewiade debie biala. Awie biala mɔɔ kulo ewiade la ɛnlɛ Selɛ ne anwo ɛhulolɛ.

¹⁶Ɔluakɛ ewiade ye anu debie biala mɔɔ le kɛ, nwonane nu atiakunluwɔzo, anyebolo, nee ɛbɛlabɔlɛ nu adubɛnwo la ɛnvi Selɛ ne ɛkɛ ne na ɔvi ewiade ye.

¹⁷Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.

¹⁸Me mra ngakula, awieleɛ mekɛ ne ɛbikye! Bɛde ye dɛba kɛ Kelaese Kpɔvolɛ ne mɔɔ bayɛ ɔ nwo kɛ yemɔ a ɔle Kelaese ne la bara, na kɛkala bɔbɔ, Kelaese kpɔvolɛma dɔɔnwo ɛye bɛ nyunlu, yemɔti yɛnwu kɛ awieleɛ mekɛ ne ala ɛne.

¹⁹Menli ɛhye mɔ vi yɛ nu a hɔle a, na bɛmboka yɛ nwo. Saa bɛboka yɛ nwo a, anrɛɛ bɛ nee yɛ dɛnlanle. Bɛgyakyile yɛ bɛhɔle, amaa yeala ali wienyi kɛ bɛ biala ɛmboka yɛ nwo.

²⁰Na bɛmɛ, Nwuanzanwuanza Ko ne ɛmaa bɛ ye Sunsum ne bie, bɛdabɛ bɛze debie biala.

²¹Tɛ kɛ asɛɛ bɛnze nɔhalɛ ne la ati a melɛkɛlɛ bɛ a. Melɛkɛlɛ bɛ, ɔboalekɛ bɛze nɔhalɛ ne la ati ɔ, yɛɛ bɛze noko kɛ adalɛ biala vi nɔhalɛ ne anu ɛnvinde.

²²Nwane a le adalɛ ne a? Yemɔ a le sonla ne mɔɔ ka kɛ tɛ Kelaese a le Mɛzaya ne la. Sonla zɔhane a le Kelaese Kpɔvolɛ ne a. Ɔluakɛ yemɔ ɔnlie Selɛ ne nee Ralɛ ne ɔndo nu.

²³Awie biala mɔɔ ɛnlie Ralɛ ne ɛndo nu la ɛnlie Selɛ ne ɛndo nu, na awie biala mɔɔ die Ralɛ ne to nu la, ɛlie Selɛ ne noko ɛdo nu.

²⁴Zɔhane ati, bɛmaa mɔɔ mɔlebɛbo ne bɛdele la ɛdɛnla bɛ nu. Saa bɛmaa mɔɔ mɔlebɛbo ne bɛdele la tɛnla bɛ nu a, bɛ nee Ralɛ ne nee Selɛ ne kɛbɔ nu kɛdɛnla.

²⁵Mɔɔ Kelaese ɛva ɛbɔ yɛ ɛwɔkɛ la a le ngoane ne mɔɔ ɛnlɛ awieleɛ la.

²⁶Melɛkɛlɛ bɛ ɛhye wɔ bɛdabɛ mɔɔ bɛlɛbɔ mɔdenle bɛabɛlɛbɛla bɛ la anwo.

²⁷Bɛmɛ, Sunsum ne mɔɔ Kelaese ɛwola ɛgua bɛ nwo zo la tɛbɔ bɛ nwo, yemɔti bɛngyia kilehilevolɛ bieko, ɔluakɛ ye Sunsum ne bahilehile bɛ debie biala, yɛɛ ɔnle adalɛ, ɔka nɔhalɛ. Ngilehilelɛ mɔɔ yeva yemaa bɛ la bɛli zo na bɛ nee Kelaese ɛyɛ ko ɛdɛnla.

²⁸Akee me mra ngakula, bɛ nee Kelaese ɛyɛ ko ɛdɛnla, amaa saa Kenle ne dwu na ɔye ɔ nyunlu a yɛazi pi na yɛanva nyiane yɛangɔnwenwe ɛleka bie.

²⁹Bɛze kɛ Kelaese le tenlenenli, yemɔti bɛnwu ye kɛ awie biala mɔɔ yɛ debie mɔɔ tenrɛ la le ɔ ra.