Read Nzema Maa 1 Bible Online

Maa 1 - Nzema bible

Maa 1

¹Dwɔhyua wule la, Yizilayɛma bizale Ɛdɛnkɛma kɛ, “Nwane yɛɛ ɛlumua ɛhɔteta Keenama ɔ nee bɛ ɛho a?”

²Ɛdɛnkɛma buale kɛ, “Dwuda yɛɛ balumua a; bɛnlea, meye maanle ne memaa ye.”

³Na Dwuda zele ɔ diema Semɛyɔn kɛ, “Maa yɛhɔ maanle ne mɔɔ bɛva bɛmaa yɛ la anu yɛ nee Keenama ɛhɔho, na yɛwie a medame noko me nee wɔ ahɔ wɔ maanle ɛdeɛ ne mɔɔ bɛva bɛmaa wɔ la anu.” Yemɔti Semɛyɔn nee

⁴Dwuda hɔle, na Ɛdɛnkɛma yele Keenama nee Pɛlɛzema manle bɛ, na bɛbɔle menli apenle bulu abo zo wɔ Bizɛke.

⁵Bɛhɔle Belemgbunli Adonaebizɛke anwo zo wɔ Bizɛke, bɛ nee ye honle na bɛlile Keenama nee Pɛlɛzema anwo zo konim.

⁶Adonaebizɛke nriandile, na bɛvoanle ye dedee bɛhyele ye, na bɛpepɛle ɔ sa nee ɔ gyakɛ ahohotile ne mɔ.

⁷Na Adonaebizɛke hanle kɛ, “Arelemgbunli abulasuu mɔɔ bɛpepɛle bɛ sa nee bɛ gyakɛ ahohotile la yɛɛ ɛnee sesa me aleɛ ɛkponle bo mgbokpoloka a; mɔɔ menyɛle la yɛɛ Nyamenle ɛyɛ me bie ɛzie ɔ bo zo a.” Na bɛ nee ye hɔle Gyɛlusalɛm; ɛkɛ ne yɛɛ ɔwule a.

⁸Dwudama nee Gyɛlusalɛmma honle na bɛbole Gyɛlusalɛmma bɛvale sua ne. Bɛhunle menli mɔɔ wɔ zolɛ la na bɛyelale suakpole ne.

⁹Nzinlii Dwudama hɔle na bɛ nee Keenama mɔɔ gua awoka ne mɔ azo, awoka ne mɔ ndololeɛ nu, yɛɛ azɛlɛ fɛɛnye ne azo la hɔhonle.

¹⁰Na Dwudama hɔtetale Keenama mɔɔ wɔ Hibulɔn mɔɔ ɛnee bɛfɛlɛ ye Keleate Aaba la, na bɛlile Hyihyae, Ahaeman, yɛɛ Talemae asa azo ne mɔ anwo zo konim.

¹¹Bɛvi ɛkɛ ne la Dwuda nee ye ɛlɔnema hɔtetale Dibɛ. Duma mɔɔ dɛba ne bɛfa bɛfɛlɛ Dibɛ la a le Keleate Sifɛ.

¹²Na Kalɛbe hanle kɛ, “Awie biala mɔɔ kɛteta Keleate Sifɛ na ɔkɛli konim la menwɔva me ra raalɛ Akesa menwɔmaa ɔkɛgya ye.”

¹³Na Kalɛbe adiema kakula ne mɔɔ bɛfɛlɛ ye Kinaze la ara nrenya Ɔteneɛle hɔhonle vale sua ne, na Kalɛbe vale ɔ ra raalɛ Akesa manle ɔgyale ye.

¹⁴Wɔ atɔfolɛlielɛ ne anu, Ɔteneɛle zele ɔ ye kɛ ɔbiza ɔ ze ɔlie azɛlɛ. Zɔhane ati Akesa vi ye asoaso ne azo dwule aze, na Kalɛbe bizale ye kɛ, “Duzu a ɛkpondɛ a?”

¹⁵Ɔbuale kɛ, “Maa me ahyɛlɛdeɛ. Kɛmɔ wɔva nyiakɛ azɛlɛ azo resee ne wɔmaa me la ɛnee maa me ɛleka mɔɔ nzule wɔ la.” Na Kalɛbe vale sua ne sɔlɔ nee nyiakɛ nzubula ne mɔ manle ye.

¹⁶Kinanli ne mɔɔ Mosisi gya ɔ ra raalɛ la abo zo amra nee Dwudama vi suakpole Gyɛleko, suakpole mɔɔ mrɛlɛ nee mrelehyia ngome la azo, na bɛhɔle azɛlɛ ne mɔɔ ɛhwie, mɔɔ zua Ɛlade la azo na bɛ nee menli ne hɔdɛnlanle.

¹⁷Dwuda nee ɔ diema Semɛyɔn hɔle Zifate na bɛhɔlile Keenama mɔɔ wɔ ɛkɛ ne la anwo zo konim na bɛbɔle sua ne bɔkɔɔ. Yemɔti bɛvɛlɛle suakpole ne Hɔɔma[1].

¹⁸Dwuda eza vale Gaza nee azua mɔɔ zuozua ye, Ahyekɛlɔn nee azua mɔɔ zuozua ye, nee Ɛkelɔn nee azua mɔɔ zuozua ye la.

¹⁹Ɛdɛnkɛma lile Dwuda anzi manle ɔvale maanle ne mɔɔ gua awoka ne mɔ azo la amuala, noko yeangola menli mɔɔ wɔ fienemgbole ne anu la tu, ɔluakɛ bɛlɛ mbulalɛ ehwili mɔɔ bɛfa bɛko la.

²⁰Kɛmɔ Mosisi hanle la, bɛvale Hibulɔn bɛmanle Kalɛbe, na ɔdule Anake amra mrenya nsa ne ɛkɛ.

²¹ Bɛngyaman asa azo ɛdeɛ ne, bɛandu Gyibɛsema mɔɔ wɔ Gyɛlusalɛm la; yemɔti Gyibɛsema nee Bɛngyamanema ɛdɛnla toonwo a yeradwu ɛnɛ a.

²²Yifelaem abusua ekpunli ne noko hɔtetale Bɛtɛlema, na Ɛdɛnkɛma lile bɛ nzi. Dwosefi asa azo ne mɔ lumuale zoanle menli kɛ bɛhɔli busia bɛnlea kɛ Bɛtɛle azɛlɛ ne si de la. (Dɛba ne ɛnee bɛfɛlɛ suakpole ɛhye Lɛɛze).

²⁴Busiama ne nwunle kɛ nrenya bie vi suakpole ne azo ɛvinde ɛlɛba. Bɛzele nrenya ne kɛ, “Yɛsɛlɛ wɔ, kile yɛ suakpole ne azo adenle ne na yɛbayɛ wɔ boɛ.”

²⁵Nrenya ne hilele bɛ suakpole ne azo adenle. Bɛhunle ezuavolɛ ne kɔsɔɔti na bɛgyakyile nrenya ne nee ɔ ye nee ɔ mra.

²⁶Nrenya ne akee hɔle Hɛtema maanle nu, ɔhɔkyekyele sua bieko na ɔdonle ye Lɛɛze, na ɛnɛ nee ɛnɛ ala kɛ bɛfɛlɛ sua ne la ɛne.

²⁷ Manasɛ abusua ne anu amra andu menli mɔɔ wɔ Bɛte Hyan nee namunamu mɔɔ zuozua ye la, yɛɛ bɛandu menli mɔɔ wɔ Teeyanake nee ye namunamu, Dɔɔ nee ye namunamu, Yebeleam nee ye namunamu, yɛɛ Mɛgedo nee ye namunamu ne mɔ anu amra. Na Keenama hɔle zolɛ nee bɛ dɛnlanle maanle ne anu.

²⁸Mekɛ mɔɔ Yizilayɛma abo zo dɛlɛle la, bɛhyele Keenama ɛkpolekɛ zo bɛmanle bɛyɛle akɛlɛ gyima, na bɛandu bɛ.

²⁹ Yifelaem abusua ekpunli ne anu amra noko andu Keenama mɔɔ wɔ Gizɛ la. Keenama dɛnlanle Gizɛ ɛkɛ ne ala.

³⁰Zɛbulɛn abusua ekpunli ne anu amra andu menli mɔɔ wɔ Ketelɔn la. Eza bɛandu Neehalɔnoma. Bɛ nee Keenama ne dɛnlanle na bɛmanle bɛyɛle akɛlɛ gyima.

³¹Ahya abusua ekpunli ne anu amra andu menli mɔɔ wɔ Ako la anzɛɛ Saedɛnema. Bɛandu Ahelabema, Akezebema, Hɛlebama, Efɛkema, yɛɛ Rilihɔboma.

³²Ahya abusua ekpunli ne anu amra dɛnlanle Keenama mɔɔ de maanle ne anu la avinli. Bɛandu bɛ.

³³Nafetalae abusua ekpunli ne anu amra andu menli mɔɔ wɔ Bɛte Hyimɛhye la yɛɛ bɛandu Bɛtanatema. Nafetalaema nee Keenama mɔɔ de azɛlɛ ne azo la dɛnlanle na bɛmanle Bɛte Hyimɛhyema nee Bɛtanatema yɛle akɛlɛ gyima manle Yizilayɛma.

³⁴Amɔlema voanle Dan abusua ekpunli ne anu amra manle bɛhɔle azua mɔɔ gua awoka ne mɔ azo la azo, ɔluakɛ bɛammaa bɛ adenle bɛammaa bɛamba azɛlɛ fɛɛnye ne azo.

³⁵Amɔlema bɔle mɔdenle kɛ bɛtɛnla Hilɛse Boka ne azo wɔ Ayegyalɔn nee Hyeeyalebem, na Yifelaem abo zo amra asa homonle bɛ nwo zo na bɛmanle bɛyɛle akɛlɛ gyima.

³⁶Yidɔmma ɛweɛne ne vi Akelabem anwuma, ɔlua Silaa ɔkɔ ye sɔlɔ lɔ.