Read Nzema Maa 10 Bible Online

Maa 10 - Nzema bible

Maa 10

¹Abemɛlɛke wule la sonla mɔɔ dwazole kɛ ɔbalie Yizilayɛma la a le Pua ara Tola. Ɔ nlenya a le Dodo, mɔɔ vi Yesakaa abusua ekpunli ne anu la. Ɔvi Hyeemɛ mɔɔ wɔ Yifelaem awoka ne mɔ azo la.

²Ɔziele Yizilayɛma ɛvolɛ abulanwiɔ nee nsa. Ɔwule na bɛziele ye wɔ Hyeemɛ.

³Tola wule la, Gyeeyɛɛ mɔɔ vi Geleade la dwazole. Ɔdaye ɔziele Yizilayɛma ɛvolɛ abulanwiɔ nee nwiɔ.

⁴Ɔwole mrenya abulasa yɛɛ ɛnee bɛlɛ asoaso abulasa. Eza bɛlɛ azuamgbole mɔɔ bɛfɛlɛ bɛ Gyeeyɛɛ namunamu la abulasa wɔ Geleade maanle ne anu. Na ɛnɛ nee ɛnɛ ala bɛtɛfɛlɛ bɛ zɔhane ala.

⁵Gyeeyɛɛ wule na bɛziele ye wɔ Keemɔn.

⁶Eza Yizilayɛma yɛle ɛtane tiale Ɛdɛnkɛma. Bɛzonlenle Beeyale ne mɔ nee Ahyela ne mɔ. Bɛzonlenle Selea, Saedɛn, Mowabe, Amɔn, yɛɛ Filisitia awozonle ne mɔ bɛgyakyile Ɛdɛnkɛma ɛzonlenlɛ.

⁷Ɛdɛnkɛma vale ɛya na ɔyele Yizilayɛma ɔmanle Filisitiama nee Amɔnoma.

⁸Bɛlile Yizilayɛma anwo zo konim na bɛziele Yizilayɛma mɔɔ wɔ Amɔle azɛlɛ zo wɔ Dwɔdan aduduleɛ mɔɔ wɔ Geleade maanle nu la, na bɛyɛle bɛ kpɔdekpɔde dedee ɛvolɛ bulu nee mɔtwɛ.

⁹Amɔnoma pɛle Dwɔdan ne na bɛ nee Dwuda abusua ekpunli ne, Bɛngyaman abusua ekpunli ne, yɛɛ Yifelaem abusua ekpunli ne mɔ rahonle. Na Yizilayɛma akee wiele anwunvɔne yɛ.

¹⁰Yizilayɛma zunle vɛlɛle Ɛdɛnkɛma kɛ, “Yɛyɛ ɛtane yɛtia wɔ, ɔboalekɛ yɛkpo wɔmɔ mɔɔ ɛle yɛ Nyamenle la, na yɛzonle Beeyale ne mɔ.”

¹¹Na Ɛdɛnkɛma zele Yizilayɛma kɛ, “Na meanlie bɛ meanvi Yigyibitima, Amɔlema, Amɔnoma, yɛɛ Filisitiama asa anu ɔ?

¹²Saedɛnema, Amalɛkema, yɛɛ Meeyɔnoma sisile bɛ na bɛzunle bɛvɛlɛle me la, meanlie bɛ meanvi bɛ sa nu ɔ?

¹³Noko bɛkpo me na bɛzonle nyamenle gyɛne, yemɔti menrɛlie bɛ bieko.

¹⁴Bɛhɔ na bɛhɔzu bɛvɛlɛ bɛ nyamenle ne mɔ mɔɔ bɛnyia bɛ la na bɛmaa bɛlie bɛ bɛvi bɛ amaneɛnwunlɛ nu.”

¹⁵Na Yizilayɛma zɛlɛle Ɛdɛnkɛma kɛ, “Yɛyɛ ɛtane. Debie biala mɔɔ ɛkulo la fa yɛ yɛ. Na ɛnɛ kenle ye ɛdeɛ, yɛsɛlɛ wɔ, die yɛ.”

¹⁶Akee bɛkpole bɛ nyamenle ne mɔ na bɛzonlenle Ɛdɛnkɛma. Na Yizilayɛma anwubɛnyunlu ne yɛle Ɛdɛnkɛma nyane nee ɛya.

¹⁷Amɔn ɛlɔnema ne boɔboale bɛ nloa na bɛyɛle bɛ azokoɛleɛ wɔ Geleade. Yizilayɛma noko boɔboale bɛ ɛlɔnema ne anloa na bɛhɔdɛle Mezepa mɔɔ wɔ Geleade la.

¹⁸Na Geleade mgbanyima nee menli ne bizebizale bɛ nwo ngoko kɛ, “Na nwane bɔbɔ yɛɛ di yɛ ti alumua ahɔdo Amɔnoma anwo etu a? Awie biala mɔɔ kɛzi ye ɛbolɛ kɛlumua la, sonla zɔhane yɛɛ kɛzie Geleadema amuala a.”