Read Nzema Maa 11 Bible Online

Maa 11 - Nzema bible

Maa 11

¹Gyɛfeta le Geleade ɛlɔnenli ko mɔɔ ze konle nye zo kpalɛ a. Ɔ nli le tuutuunli. Gyɛfeta ɔ ze a le Geleade.

²Geleade aye ne noko ɔdaye ɔwole mralɛ mrenya. Mɔɔ ɔ ye amra mrenya ne mɔ nyinli la, bɛdule Gyɛfeta bɛvile awuke ne anu na bɛzele ye kɛ, “Ɛnli agya wɔ yɛ ze sua nu ɛke, ɔluakɛ asolo ɛ nli.”

³Gyɛfeta vi ɔ mediema ne mɔ avinli dule hɔle Tɔɔbo azɛlɛ zo. Ɔvale ɔ nwo ɔbɔle menli agbamgbanvolɛ bie, na ɔ nee bɛ kpɔsale wuowuale awie mɔ.

⁴Mekɛ ne hɔle bie la, Amɔnoma vale konle doale Yizilayɛma.

⁵Mɔɔ ɛhye zile la, Geleade mgbanyima hɔle Tɔɔbo hɔvale Gyɛfeta rale.

⁶Bɛzele ye kɛ, “Bɛla bali yɛ ti maa yɛ nee Amɔnoma ɛhɔho.”

⁷Na Gyɛfeta zele Geleade mgbanyima kɛ, “Na tɛ bɛmɛ a bɛhyile me na bɛdule me bɛvile egya awuke nu la. Duzu ati yɛɛ saa akee edwɛkɛ ɛdo bɛ a ɛnee bɛra bɛbakpo me bo zo a?”

⁸Geleade mgbanyima zele Gyɛfeta kɛ, “Ɛhye ala ati yɛɛ yɛra yɛbakpo ɛ bo zo a, amaa wɔali yɛ ti na yɛ nee Amɔnoma ahɔho, na wɔali Geleade amuala kpanyinli.”

⁹Gyɛfeta zele Geleade mgbanyima ne kɛ, “Saa bɛ nee me sia kɔ kɛ me nee Amɔnoma ɛhɔho, na Ɛdɛnkɛma maa medi konim a, mebali bɛ belemgbunli.”

¹⁰Geleade mgbanyima buale Gyɛfeta kɛ, “Yɛkponle zolɛ, Ɛdɛnkɛma di daselɛ; debie biala mɔɔ wɔbiza la, yɛbayɛ.”

¹¹Yemɔti Gyɛfeta nee Geleade mgbanyima hɔle. Menli ne ziele ye belemgbunli na bɛyɛle kɛ ɔli bɛ ti. Gyɛfeta hanle ye edwɛkɛ muala hilele menli ne mɔ wɔ Mezepa wɔ Ɛdɛnkɛma anyunlu.

¹²Akee Gyɛfeta zoanle manle bɛhɔbizale Amɔn belemgbunli ne kɛ, “Duzu semunli yɛɛ me menli ne ɛze wɔ, mɔɔ yemɔti wɔra ɛbadoa bɛ ɛ nee bɛ aho a?”

¹³Amɔn belemgbunli ne buale Gyɛfeta soanvolɛma ne kɛ, “Semunli ne a le kɛ, mɔɔ Yizilayɛma vi Yigyibiti rale la, bɛvale me azɛlɛ, ɔvi Azule Gyabɛke ne anloa toonwo ɔkɔgua Azule Dwɔdan ne anloa. Saa bɛkpondɛ anzonudwolɛ a, ɛnee bɛva me azɛlɛ ne bɛmaa me.”

¹⁴Gyɛfeta eza zoanle menli bieko wɔ Amɔnoma belemgbunli ne ɛkɛ ne kɛ,

¹⁵“Kɛ Gyɛfeta se la ɛne: Yizilayɛma anva Mowabema azɛlɛ yɛɛ bɛanva Amɔnoma azɛlɛ.

¹⁶Bɛvi Yigyibiti la, bɛluale fienemgbole ne anu bɛhɔpɛle Ndɔ Nyevile ne na bɛravindele Keedɛhye.

¹⁷ Yizilayɛma zoanle menli manle bɛhɔzele Yidɔm belemgbunli ne kɛ, ‘Yɛsɛlɛ wɔ, maa yɛ adenle maa yɛpɛ nu wɔ wɔ maanle ne anu.’ Na Yidɔm belemgbunli ne amkponle. Eza bɛzoanle menli wɔ Mowabe belemgbunli ne ɛkɛ, na ɔdaye noko yeammaa adenle. Yemɔti Yizilayɛma dɛnlanle Keedɛhye.

¹⁸ Nzinlii Yizilayɛma vale fienemgbole ne anu bule hoanenle Yidɔm nee Mowabe. Bɛravindele Mowabe foa ko mɔɔ di kɔ aduduleɛ la, na bɛyɛle bɛ azokoɛleɛ wɔ Azule Aanɔn ne anzi lɔ. Bɛangɔ Mowabe, ɔluakɛ Azule Aanɔn ne a le Mowabe ɛweɛne a.

¹⁹ Akee Yizilayɛma zoanle menli manle bɛhɔle Amɔle belemgbunli Saehɔn mɔɔ ɛnee de Hɛhyebɔn la ɛkɛ ne hɔzele ye kɛ, ‘Yɛsɛlɛ wɔ, maa yɛ adenle maa yɛpɛ nu wɔ wɔ maanle ne anu yɛhɔ yɛ maanle nu.’

²⁰Ɛnee Saehɔn ɛnlie Yizilayɛma ɛnli biala, yemɔti yeammaa bɛ adenle. Ɔboɔboale ye ɛlɔnema anloa, na ɔhɔdɛle bɛ wɔ Gyeehaze, na ɔ nee bɛ honle.

²¹Na Ɛdɛnkɛma, Yizilayɛ Nyamenle ne, yele Saehɔn nee ye ɛlɔnema manle Yizilayɛma lile bɛ nwo zo konim. Yemɔti Yizilayɛma vale Amɔlema azɛlɛ ne kɔsɔɔti.

²²Bɛvale azɛlɛ ne mɔɔ vi Azule Aanɔn ne anloa toonwo hɔdwule Azule Gyabɛke ne anloa.

²³Yemɔti kɛkala, Ɛdɛnkɛma mɔɔ le Yizilayɛ Nyamenle ne yɛɛ nee Amɔlema ɛho ɛlie bɛ maanle ne ɛmaa ye menli, Yizilayɛma a. Na duzu tumi yɛɛ wɔmɔ ɛdawɔ ɛlɛ ye mɔɔ ɔwɔ kɛ ɛsa yɛ ɛdie a?

²⁴Duzu ati yɛɛ bɛnrɛhɔva bɛ maanle ɛdeɛ ne mɔɔ bɛ nyamenle Kimɔhye ne ɛva ɛmaa bɛ la ɛ? Ɔluakɛ azɛlɛ biala mɔɔ Ɛdɛnkɛma, yɛ Nyamenle ne ɛva ɛmaa yɛ la, sinli bɔbɔ, yɛnrɛgyakyi nu.

²⁵ Anzɛɛ bɛdwenle kɛ bɛle kpalɛ bɛtɛla Zepɔ ara nrenya Balake mɔɔ di belemgbunli wɔ Mowabe la ɔ? Kenle ko bɔbɔ ɔ nee Yizilayɛma ɛtɛpelele debie biala anwo anzɛɛ ɔ nee bɛ ɛtɛkonle.

²⁶Ɛvolɛ ɛya nsa mɔɔ ɛze ɛhɔ, mɔɔ Yizilayɛma radɛnlanle Hɛhyebɔn nee namunamu mɔɔ zuozua ye, Alowɛ nee namunamu mɔɔ zuozua ye, yɛɛ azuamgbole mɔɔ gua Azule Aanɔn bɛne nee fema la, duzu ati yɛɛ bɛangɔndu bɛ bɛanlie azɛlɛ ne a?

²⁷Metɛfonle bɛ, yemɔti ɔle nvonleɛ kɛ bɛkɛva konle bɛkɛdoa me a. Ɛdɛnkɛma, mɔɔ le Ndɛnebuavolɛ ne, ɛnɛ kenle ko ye babua manzonle mɔɔ la Yizilayɛma nee Amɔnoma avinli la.”

²⁸Noko Amɔn belemgbunli ne anli Gyɛfeta nrɛlaleɛ ne anwo bie.

²⁹Akee Ɛdɛnkɛma Sunsum ne dwule Gyɛfeta anwo zo. Ɔluale Geleade nee Manasɛ, na ɔtelele zolɛ ɔhɔle Mezepa mɔɔ wɔ Geleade la. Ɔvi Mezepa la ɔhɔvole Amɔnoma akɔme zo.

³⁰Na Gyɛfeta bɔle ɛwɔkɛ wɔ Ɛdɛnkɛma anyunlu kɛ, “Ɛdɛnkɛma, saa ɛmaa medi Amɔnoma anwo zo konim,

³¹na mesia meara sua nu, na awie biala mɔɔ kɛlumua kɛvi me sua nu ɛkɛ ne kɛvinde kɛ ɔbayia me la le wɔ ɛdeɛ. Mebava ye meayɛ ɛyelalɛ azubɔdeɛ meabɔ azu meamaa wɔ.”

³²Gyɛfeta pɛle azule ne na ɔhɔtetale Amɔnoma ɔ nee bɛ honle, na Ɛdɛnkɛma yele bɛ wulale ɔ sa nu.

³³Ɔbɔle ye Alowɛ ɔzɛkyele bɛ toonwo ɔhɔdwule Menete afoa nu, azuamgbole ala abulanwiɔ, toonwo ɔhɔkpulale Ebɛle Kɛlamem. Ɔhunle menli ne dɔɔnwo, na Yizilayɛma lile Amɔnoma anwo zo konim.

³⁴Akee Gyɛfeta ziale rale ye sua zo Mezepa, na nea, ɔ ra raalɛ ne bɔle akɛya, zile agole vi awuke ne anu vindele kɛ ɔkayia ɔ ze adenle. Ɔ ze ara ala ɛne. Ɔnlɛ ralɛ nrenya anzɛɛ ralɛ raalɛ bieko ɔmboka ɔ nwo.

³⁵ Gyɛfeta nwunle ɔ ra raalɛ ne la, ɔsuosuanle ye tɛladeɛ mɔɔ ɔwula la anu na ɔhanle kɛ, “Me ra raalɛ! Duzu ati a wɔde me ɛbolɛ kpole zɛhae ɛ? Mebɔ Ɛdɛnkɛma ɛwɔkɛ mɔɔ hyia a, yɛɛ metwe mesia a ɔnyɛ boɛ.”

³⁶Ɔ ra raalɛ ne buale ye kɛ, “Egya, saa wɔbuke ɛ nloa wɔbɔ Ɛdɛnkɛma ɛwɔkɛ a, ɛnee fa me yɛ deɛ mɔɔ vi ɛ nloa anu vindele la, ɔluakɛ kɛkala, Ɛdɛnkɛma ɛli Amɔnoma mɔɔ le wɔ kpɔvolɛma la nzenralɛ ne ɛmaa wɔ.”

³⁷Na ɔzɛlɛle ɔ ze kɛ, “Debie ko ala a mesɛlɛ wɔ a, na yemɔ a le ɛhye: maa me siane nwiɔ maa me nee me gɔnwo mɔ yɛhɔ awoka ne mɔ azo lɔ na mengɔnzu me belamunli nu alɔbɔlɛ ewule.”

³⁸Ɔ ze kponlenle siane nwiɔ ne azo na ɔzele kɛ ɔhɔ. Ɔ nee ɔ gɔnwo mɔ hɔle awoka ne mɔ azo, na ɔhɔzunle ɔ nwo kɛ yeannwu nrenya yeanwo ralɛ na yeawu a.

³⁹Siane nwiɔ ne dwule la ɔziale ɔrale ɔ ze anwo ɛkɛ ne, na ɔ ze vale ye yɛle mɔɔ ye ɛwɔkɛ ne se la. Ɛnee ɔ ra raalɛ ne ɛnze nrenya fee. Na ɔrayɛle maamɛla wɔ Yizilayɛ maanle nu

⁴⁰kɛ ɛvolɛ biala dwu a Yizilayɛ mraalɛ kɔsu Geleadenli Gyɛfeta ara raalɛ ne kenle nna.