Read Nzema Maa 12 Bible Online

Maa 12 - Nzema bible

Maa 12

¹Yifelaemma boɔboale ɛlɔnema anloa. Bɛpɛle Azule Dwɔdan ne bɛhɔle Zeefɔn bɛhɔbizale Gyɛfeta kɛ, “Duzu ati a bɛrazenle bɛ nee Amɔnoma hɔhonle na bɛambɔ yɛ amaneɛ bɛammaa yɛ nee bɛ angɔ ɛ? Yɛyela bɛ sua ye yɛagua bɛ ti zo.”

²Gyɛfeta zele bɛ kɛ, “Me menli ne nee Amɔnoma nyianle konle. Mendole ɛsalɛ menvɛlɛle bɛ la bɛambanlie me.

³Mɔɔ menwunle kɛ bɛnrɛlie me bɛnrɛvi Amɔnoma asa anu la, yɛɛ menvale me ngoane mendole nzeleba a. Mempɛle azule ne mendoale Amɔnoma na Ɛdɛnkɛma yele bɛ manle me. Duzu ati yɛɛ ɛnɛ bɛdwazo kɛ akee bɛ nee me baho a?”

⁴Gyɛfeta boɔboale Geleade ɛlɔnema kɔsɔɔti anloa. Bɛ nee Yifelaemma honle na bɛlile bɛ nwo zo konim. (Yifelaemma ka kɛ, “Geleadema mɔɔ wɔ Yifelaem nee Manasɛ la le Yifelaemma mɔɔ ɛde atua na bɛnriandi bɛvi bɛ maanle nu a.”)

⁵Amaa Yifelaemma annyia adenle annriandi la, Geleadema hɔziale Azule Dwɔdan ne anloa, ɛleka mɔɔ bɛpɛ azule ne la. Saa Yifelaemenli nriandi badwu ɛkɛ ne na ɔse kɛ, “Bɛpɛ me azule” a, ɛnee Geleadema ne biza ye kɛ, “Ɛle Yifelaemenli ɔ?” Saa ɔse kɛ, “Kyɛkyɛ” a,

⁶ɛnee bɛse ye kɛ, “Ka edwɛkɛkpɔkɛ ‘Hyebɔlɛte.’ ” Saa ɔka a ɔse, “Sebɔlɛte,” ɔluakɛ Yifelaemenli ɛnze edwɛkɛkpɔkɛ zɔhane ka. Kɛ bɛnwu kɛ ɔle Yifelaemenli la ɛnee bɛhu ye wɔ Dwɔdan ne anloa ɛkɛ ne ala. Mekɛ zɔhane anu bɛhunle Yifelaemma apenle ngoko abulanla nee nwiɔ

⁷Gyɛfeta ziele Yizilayɛma ɛvolɛ nsia. Na Geleadenli Gyɛfeta wule na bɛziele ye wɔ ye sua zo Geleade.

⁸Gyɛfeta wule la, Yebezan mɔɔ vi Bɛtelɛhɛm la a ralile Yizilayɛma ati a.

⁹Ɛnee ɔlɛ mralɛ mrenya abulasa yɛɛ mralɛ mraalɛ abulasa. Ɔvale ɔ mra mraalɛ ne mɔ ɔmanle abusua ekpulike gyɛne nu mrenya agyalɛ na yeahɔgya abusua ekpulike gyɛne nu mraalɛ yeamaa ɔ mra mrenya ne mɔ. Ɔdaye noko ɔlile Yizilayɛma ati ɛvolɛ nsuu.

¹⁰Yebezan wule na bɛziele ye wɔ Bɛtelɛhɛm.

¹¹Yebezan wule la, Yilɔn mɔɔ vi Zɛbulɛn abusua ekpunli nu la a lile Yizilayɛma ati a. Ɔlile bɛ ti ɛvolɛ bulu.

¹²Yilɔn mɔɔ vi Zɛbulɛn abusua ekpunli ne anu la wule na bɛziele ye wɔ Ayegyalɔn wɔ Zɛbulɛn maanzinli nu.

¹³Yilɔn wule la, Helɛle mɔɔ vi Paeleetɔn la ara Abedɛn a lile Yizilayɛma ati a.

¹⁴Ɔwole mrenya abulanla yɛɛ ɔnyianle nlɔnra abulasa mɔɔ hanle asoaso abulasuu a. Ɔlile Yizilayɛma ati ɛvolɛ mɔtwɛ.

¹⁵Na Abedɛn wule. Bɛziele ye wɔ Paeleetɔn mɔɔ wɔ Yifelaem azɛlɛ zo, wɔ Amalɛke maanle nu la awoka ne mɔ azo.