Read Nzema Maa 13 Bible Online

Maa 13 - Nzema bible

Maa 13

¹Eza Yizilayɛma yɛle ɛtane bieko tiale Ɛdɛnkɛma. Yemɔti Ɛdɛnkɛma vale bɛ wulale Filisitiama abo ɛvolɛ abulanla.

²Mekɛ ɛhye anu ɛnee nrenya bie wɔ Zɔla, bɛfɛlɛ ye Manowa. Ɔvi Dan abusua ekpunli ne anu. Ɔ ye le mota; ɔtɛwole ɛlɛ.

³Ɛdɛnkɛma soanvolɛ yele ɔ nwo hilele raalɛ ne na ɔzele ye kɛ, “Wɔmɔ, ɛle mota; ɛtɛwole ralɛ ɛlɛ. Ɛbava ɛkolɛ na wɔawo ralɛ nrenya.

⁴Yemɔti nea boɛ. Mmano nwanye anzɛɛ nza ɛsesebɛ biala.

⁵Mmadi debie biala mɔɔ nwolɛ ɛnde la. Ɔluakɛ ɛbanrenzɛ wɔawo ralɛ nrenya. Mmafa dadeɛ dɛma ɛka ɔ ti enrinli, ɔluakɛ kenle ko ne ala mɔɔ bɛkɛwo ye bɛkɛdo aze la, bɛbadu ye bɛazie ahane bɛamaa Nyamenle kɛ ɔle ‘Tusiemaa-Nyamenle’ ralɛ. Na yemɔ yɛɛ ɔbalie Yizilayɛma yeavi Filisitiama asa anu a.”

⁶Raalɛ ne rabɔle ɔ hu amaneɛ kɛ, “Nyamenle sonla ɛye ɔ nwo ɛhile me. Ɔ nwo yɛ ɛzulolɛ na ɔ nyunlu zɔho Nyamenle soanvolɛ. Meambiza ye ɛleka mɔɔ ɔvi la, yɛɛ ɔdaye noko yeambɔ ye duma yeangile me.

⁷Na ɔzele me kɛ, ‘Nea, ɛbava ɛkolɛ na wɔawo ralɛ nrenya; yemɔti mmano nwanye anzɛɛ nza ɛsesebɛ, yɛɛ mmadi debie biala mɔɔ nwolɛ ɛnde la, ɔluakɛ kakula ne le “Tusiemaa-Nyamenle” ralɛ mɔɔ kile kɛ ɔle Nyamenle ɛdeɛ, ɔvi ye awolɛ nu kɔkpula ye ewule nu.’ ”

⁸Na Manowa zɛlɛle Ɛdɛnkɛma kɛ, “O Ɛdɛnkɛma, mesɛlɛ wɔ, maa Nyamenle sonla ne mɔɔ ɛzoanle ye la ɛrɛla bieko, na ɔrahile yɛ kɛ yɛzi yɛyɛ kakula ne mɔɔ bɛbawo ye la.”

⁹Nyamenle diele Manowa nzɛlɛlɛ ne. Na mekɛ mɔɔ ɛnee raalɛ ne wɔ ye ɛya nu la, Nyamenle soanvolɛ ne ziale rale ɔ nwo ɛkɛ ne bieko. Ɛnee ɔ hu Manowa ɛnle ɔ nwo ɛkɛ.

¹⁰Yemɔti raalɛ ne vale ɛnriandilɛ hɔbɔle ɔ hu amaneɛ kɛ, “Nea, nrenya ne mɔɔ ɛkenle yele ɔ nwo hilele me la ɛra bieko.”

¹¹Manowa dwazole lile ɔ ye anzi, na bɛradole nrenya ne la ɔzele ye kɛ, “Wɔmɔ a ɛhanle edwɛkɛ ne ɛhilele raalɛ ye la ɔ?” Nrenya ne buale kɛ, “Ɛhɛe, medame ɔ.”

¹²Manowa bizale ye kɛ, “Saa wɔ edwɛkɛ ne yɛ nɔhalɛ a, ɛnee duzu a ɔwɔ kɛ kakula ne yɛ a, yɛɛ duzu ɛbɛla a ɔwɔ kɛ ɔbɔ a?”

¹³Ɛdɛnkɛma soanvolɛ ne zele Manowa kɛ, “Edwɛkɛ biala mɔɔ meha mehile raalɛ ne la maa ɔli zolɛ.

¹⁴Debie biala mɔɔ bɛva vanye ma bɛyɛ la, ɔmmafa bie ɔka ɔ nloa. Eza ɔmmano nwanye anzɛɛ nza ɛsesebɛ biala, yɛɛ ɔmmadi debie biala mɔɔ nwolɛ ɛnde la. Ɛhye mɔ kɔsɔɔti mɔɔ meha la ɔwɔ kɛ ɔdi zolɛ.”

¹⁵Ɛnee Manowa ɛnze kɛ nrenya ne le Ɛdɛnkɛma soanvolɛ, yemɔti ɔzele ye kɛ, “Mesɛlɛ wɔ, kendɛ ekyii maa yɛva abɔnkye yɛbu akposi ekyi yɛmaa wɔ.” Ɛdɛnkɛma soanvolɛ ne zele Manowa kɛ, “Saa ɛkye me ɛsie ɛke bɔbɔ a, menrɛli wɔ aleɛ ne. Na saa ɛkulo a, ɛnee yela nane ne bɔ azu maa Ɛdɛnkɛma.”

¹⁷Manowa bizale Ɛdɛnkɛma soanvolɛ ne kɛ, “Kɛ bɛfɛlɛ wɔ ɛ, amaa saa wɔ edwɛkɛ ne yɛ nɔhalɛ a yɛawula wɔ anyunlunyia?”

¹⁸ Na Ɛdɛnkɛma soanvolɛ ne zele ye kɛ, “Duzu ati a ɛkulo kɛ ɛnwu me duma a? Ɔle duma ɛzulolɛ bie.”

¹⁹Na Manowa vale abɔnkye ne nee nwolɛ aleɛ ne bɔle azu wɔ bolɛ zo manle Ɛdɛnkɛma, mɔɔ yɛ nwanwane ninyɛne la.

²⁰Mɔɔ azubɔlɛ senle ne kpogyale ɔ nwo zo bolonwonwo wɔ azukponle ne azo la, Manowa nee ɔ ye nwunle kɛ Ɛdɛnkɛma soanvolɛ ne lua nuhua ɛlɛkɔ anwuma, na bɛ nye hale ɔ nwo. Ɛzulolɛ manle bɛbutubutule bɛ nye aze, na Manowa nee ɔ ye annwu Ɛdɛnkɛma soanvolɛ ne bieko. Na Manowa nwunle kɛ Ɛdɛnkɛma soanvolɛ ɔ.

²²Manowa zele ɔ ye kɛ, “Yɛnwu Nyamenle! Yɛbawu”

²³Na ɔ ye buale ye kɛ, “Saa Ɛdɛnkɛma kɛhu yɛ a, anrɛɛ yeanlie yɛ sa nu azubɔdeɛ ne; anrɛɛ ɔnrɛhile yɛ ninyɛne ɛhye mɔ anzɛɛ ɔnrɛha ɛhye mɔ amuala ɔnrɛhile yɛ.”

²⁴Raalɛ ne wole ralɛ nrenya na bɛdonle ye Samesɛn. Kakula ne nyinle, na Ɛdɛnkɛma yilale ye.

²⁵Na Ɛdɛnkɛma Sunsum ne manle ye anwosesebɛ. Mekɛ ne anu ɛnee ɔde Dan abusua ekpunli ne azokoɛleɛ ne, wɔ Zɔla nee Yehyeteɔlo avinli.