Read Nzema Maa 14 Bible Online

Maa 14 - Nzema bible

Maa 14

¹Kenle ko Samesɛn hɔle Temena, na ɔnwunle Filisitia bɛlɛra bie.

²Ɔziale ɔhɔle sua nu la ɔbɔle ɔ ze nee ɔ nli amaneɛ kɛ, “Menwu Filisitia bɛlɛra bie na me ahonle ɛva ye, yemɔti bɛhɔgya ye bɛmaa me.”

³Ɔ ze nee ɔ nli zele ye kɛ, “Anzɛɛ raalɛ biala ɛnle yɛ abusua ekpulike ɛdeɛ ye anu mɔɔ ɛgya ye a ɔyɛ boɛ, mɔɔ yemɔti ɛkɔ menli mɔɔ ɛnze Nyamenle la avinli wɔahɔgya raalɛ a?” Samesɛn zele ɔ ze kɛ, “Bɛgya ye bɛmaa me, ɔluakɛ me ahonle ɛva ye kpalɛ.”

⁴Samesɛn ɔ ze nee ɔ nli ɛnze kɛ ɛhye mɔ kɔsɔɔti Ɛdɛnkɛma yɛɛ ɛlɛyɛ a, ɔluakɛ ɛnee Ɛdɛnkɛma ɛlɛkpondɛ adenle yealua nu yeadua Filisitiama kakɛ. Mekɛ zɔhane anu ɛnee Filisitiama a sie Yizilayɛma a.

⁵Yemɔti Samesɛn nee ɔ ze nee ɔ nli hɔle Temena. Bɛdwule Temena la Samesɛn hɔkpɔsale Temena vanye ɛya ne mɔ anu, na ɔnwunle kɛ awenade ekyi bie ɛlɛkpo nee ye ayia.

⁶Ɛkɛ ne ala Ɛdɛnkɛma Sunsum ne dwule ɔ nwo zo. Ɔvale ɔ sa mgbane ɔtetele awenade ne kɛ asɛɛ abɔnkye ralɛ bie la. Noko ɛhye mɔɔ ɔyɛle la yeanga yeangile ɔ ze nee ɔ nli.

⁷Akee ɔhɔle na ɔ nee raalɛ ne hɔlile adwelie, na Samesɛn anye liele.

⁸Yeangyɛ biala yɛɛ Samesɛn hɔgyale bɛlɛra ne a. Mɔɔ ɔlua adenle ne anu ɔlɛkɔ la, ɔdole ɔ nye ɔnleanle awenade funli ne, na ɛnee awenade funli ne ɛlɔ wolɛ.

⁹Ɔvale ɔ sa ɔbule wolɛ ndɛlamoa ne bie, na mɔɔ ɔ gyakɛ wɔ zolɛ la ɛnee ɔlɛdi. Ɔvale bie ɔhɔmanle ɔ ze nee ɔ nli, na bɛdabɛ noko bɛlile. Noko yeanga yeangile bɛ kɛ ɔbule wolɛ ndɛlamoa ne ɔvile awenade funli nu.

¹⁰Samesɛn ɔ ze hɔle raalɛ ne sua zo, na Samesɛn dole ɛkponle wɔ ɛkɛ. Ɛhye le amaamuo mɔɔ mgbavolɛ ne mɔ ɔyɛ a bu a.

¹¹Mɔɔ menli ne mɔ nwunle ye la bɛyele mgbavolɛ abulasa bɛmanle ye kɛ ɔ nee bɛ ɛlua.

¹²Na Samesɛn zele bɛ kɛ, “Bɛmaa mengye bɛ agyebɛ ko. Saa bɛkola ɔ nloa ye wɔ kenle nsuu ye mɔɔ yɛfa yɛado ɛkponle ye la anu a, menwɔmaa bɛ adɛladeɛ fufule abulasa yɛɛ ɛvoyialilɛ adɛladeɛ abulasa;

¹³na saa bɛangola ɔ nloa ye a, ɛnee ɔwɔ kɛ bɛdabɛ noko bɛmaa me adɛladeɛ fufule abulasa yɛɛ ɛvoyialilɛ adɛladeɛ abulasa.” Na bɛzele ye kɛ, “Gye wɔ agyebɛ ne maa yɛdie.”

¹⁴Na Samesɛn gyele bɛ zɛhae, “Debie mɔɔ bɛdi la vi mɔɔ di debie la anu rale. Debie fɛlɛko vi mɔɔ anwo yɛ se la anu rale.” Kenle kɔkɔlɛ nsa ɛnee awie biala ɛtɛkolale agyebɛ ne anloa ye.

¹⁵Ye kenle nna ne azo bɛzele Samesɛn aye ne kɛ, “To ɛ hu agyiba maa ɔye ye agyebɛ ne anloa anrɛɛ yɛyela wɔ nee ɛ ze awuke nu amra amuala. Bɛva yɛ bɛra ɛke kɛ bɛbabɔ yɛ anyiemgba ɔ?”

¹⁶Na Samesɛn aye ne zunle ɔ hu akɔme nu zele kɛ, “Ɛkpɔ me, ɛngulo me. Wɔgye me menli ne agyebɛ na wɔanga ye nyelebɛnloa ne wɔangile me.” Samesɛn zele ɔ ye kɛ, “Duzu ati yɛɛ menga mengile wɔ a? Nea, egya nee ɔmɔ bɔbɔ, metɛkanle metɛkilele bɛ.”

¹⁷Ɔ ye zunle ɛhye anwo toonwo kenle nsuu ne mɔɔ bɛvale bɛdole ɛkponle ne la dwule. Kenle nsuu ne azo mɔɔ ɛnee akee ɛzunlɛ ne ɛyɛ ye abodelɛ la, ɔhanle agyebɛ ne nyelebɛnloa ɔhilele ye. Na ɔdaye noko ɔhanle ɔhilele ye menli ne.

¹⁸Kenle nsuu ne azo, suakpole ne azo amra hanle nyelebɛnloa ne hilele Samesɛn kolaa na sɛnzɛne ne adɔ. Bɛyele ɔ nloa zɛhae, “Duzu a yɛ fɛ tɛla wolɛ a? Duzu a anwo yɛ se tɛla awenade a?” Samesɛn buale bɛ kɛ, “Saa bɛanva me ɛnlankɛ bɛangɔ ɛyazonlɛ a, anrɛɛ bɛnrɛnwu me agyebɛ ne anzi ɛlɛ.”

¹⁹Na Ɛdɛnkɛma Sunsum ne dwule ɔ nwo zo kpole bie. Ɔhɔle Ahyekɛlɔn ɔhɔhunle sua ne azo amra abulasa, na ɔyeyele bɛ nwo ɛvoyialilɛ adɛladeɛ ne mɔ ɔrɛlɛle menli mɔɔ yele ye agyebɛ ne anloa la. Ɔvale ɛya kpole, na ɔziale ɔhɔle ɔ ze sua zo.

²⁰Na bɛvale Samesɛn aye ne bɛmanle mɔɔ kyekyele agyalɛ ne abo la gyale ye.