Read Nzema Maa 15 Bible Online

Maa 15 - Nzema bible

Maa 15

¹Mekɛ guale nu ekyii, mɔɔ ɛnee bɛlɛbu abɛlɛ la, Samesɛn vale abɔnkye hɔle kɛ ɔkakpɔla ɔ ye.

²Ɔzele kɛ, “Mekɔ me ye anwo wɔ ye sua kunlu ɛkɛ.” Na ɔ ye ɔ ze ammaa ye adenle. Ɔzele ye kɛ, “Mendwenlenle kɛ ɛngulo ye bieko, yemɔti menvale ye memanle ɛ gɔnwo ne. Ɔ diema raalɛ ekyi ne anwo yɛ fɛ tɛla ye. Mesɛlɛ wɔ, gya yemɔ.”

³Samesɛn zele kɛ, “Ɛnɛ ɛdeɛ, saa mebu Filisitiama amaamuo ɛtane a, awie biala mmafu me.”

⁴Yemɔti Samesɛn hɔhyele ɛzonlɛ ɛya nsa; ɔvale nwiɔ biala adua ɔbɔle bɛ kpɔkɛ na ɔvale tɛkɛ ɔkyekyele dualɛ biala mɔɔ yebɔ bɛ kpɔkɛ la.

⁵Akee ɔvale senle ɔsosɔle tɛkɛ ne mɔ na ɔgyakyile ɛzonlɛ ne mɔ ɔmanle bɛhɔle Filisitiama abɛlɛ ɛya avule ne mɔ anu. Bɛhɔyelale abɛlɛ mɔɔ bɛbu bɛhua nee mɔɔ bɛtɛbule, nee ɔlivi ɛya avule ne mɔ kɔsɔɔti.

⁶Filisitiama ne bizale kɛ, “Ɛnee nwane yɛɛ ɛbɔ ɛbɛla ɛhye a?” Na bɛdele kɛ Samesɛn ɔ, ɔluakɛ ɔ ye ɔ ze ne mɔɔ vi Temena la ɛva ɔ ye ɛmaa ɔdaye Samesɛn ɔ gɔnwo ɛgya ye. Na Filisitiama rale na bɛrayelale ɔ ye nee ɔ ze.

⁷Na Samesɛn zele bɛ kɛ, “Saa amaamuo zɛhae yɛɛ bɛbu ɛdeɛ a, ɛnee meka, meka kɛ, saa metɛyɛle bɛ bie metɛsiele ɔ bo zo a, menrɛla.”

⁸Ɔhɔle bɛ nwo zo na ɔhunle bɛ bie mɔ dɔɔnwo. Akee ɔhɔle na ɔhɔdɛnlanle bolɛ bɔne bie anu wɔ Yitam bodane ne azo.

⁹Akee Filisitiama raziale Dwuda, na bɛvale konle bɛdoale Lihaema.

¹⁰Na Dwudama bizale bɛ kɛ, “Duzu ati yɛɛ bɛva konle bɛradoa yɛ a?” Bɛbuale kɛ, “Yɛra kɛ yɛbahye Samesɛn, na mɔɔ yeva yeyɛ yɛ la, yɛdayɛ noko yɛayɛ ye bie.”

¹¹Na Dwudama apenle nsa hɔle Yitam bodane ne bɔne ne mɔɔ Samesɛn wɔ nu la anu na bɛzele ye kɛ, “Ɛnze kɛ Filisitiama a sie yɛ ɔ? Na ɛhye noko mɔɔ wɔhɔhwe wɔra la abo a le duzu?” Samesɛn zele bɛ kɛ, “Amaamuo mɔɔ bɛbule bɛmanle me la yɛɛ menlea zolɛ mebu bie memaa bɛ a.”

¹²Na bɛzele ye kɛ, “Yɛra kɛ yɛbakyekye wɔ yɛahɔmaa Filisitiama.” Samesɛn zele bɛ kɛ, “Bɛha ndane kɛ bɛmɛ bɛdabɛ mumua ne bɛnrɛhu me.”

¹³Bɛzele ye kɛ, “Nɔhalɛ, yɛnrɛhu wɔ. Yɛkyekye wɔ yɛahɔwula bɛ sa nu ala.” Akee bɛhyele ye na bɛvale samgbe nyɛma amolɛ nwiɔ bɛkyekyele ye na bɛ nee ye vi bolɛ bɔne ne anu hɔle.

¹⁴Mɔɔ bɛ nee ye radwule Lihae la, Filisitiama vale ɛwudolɛ nriandile rayiale ye. Na Ɛdɛnkɛma Sunsum ne dwule ɔ nwo zo kpole kpalɛ, na ɔtetele samgbe nyɛma amolɛ nwiɔ ne mɔɔ bɛvale bɛkyekyele ɔ sa la kɛ asɛɛ dwɛsɛ mɔɔ senle ɛdɔ nu la.

¹⁵Na ɔ nye bɔle asoaso awudwelɛ bowule amolɛ zo, na ɔvale ɔhunle menli apenle.

¹⁶Na Samesɛn zele kɛ, “Meva asoaso awudwelɛ bowule mehuohua bɛ ɛdukue ɛdukue; meva asoaso awudwelɛ bowule mehu menli apenle.”

¹⁷Mɔɔ ɔwiele tendɛ la, ɔvuandinle awudwelɛ bowule ne mɔɔ ɔlɛ la ɔdole; na bɛvɛlɛle ɛleka mɔɔ ɔdɔle la Releemate Lihae. (Ɔ bo a le Awudwelɛ Bowule Boka.)

¹⁸Akee nzuhɔne hunle ye kpole kpalɛ, na ɔzɛlɛle Ɛdɛnkɛma kɛ, “Wɔlua wɔ sonvolɛ nwo zo wɔlie wɔ menli ye ngoane. Na nzuhɔne ɛlɛku me yeamaa meadɔ donvula wɔ menli mɔɔ ɛnze Nyamenle la asa anu ɔ?”

¹⁹Na Nyamenle manle nzule vi azɛlɛ bo vindele kuma bie anu manle ye wɔ Lihae. Samesɛn nlonle bie na ye ahonle gyinlanle na ɔ nwo yɛle se. Yemɔti bɛdonle nzule ne “Hakɔli”[4]. Na ɛnɛ nee ɛnɛ ala ɔtɛbɔ Lihae.

²⁰Samesɛn lile Yizilayɛma ati ɛvolɛ abulanwiɔ wɔ mekɛ mɔɔ ɛnee bɛwɔ Filisitiama abo la.