Read Nzema Maa 16 Bible Online

Maa 16 - Nzema bible

Maa 16

¹Samesɛn hɔle Gaza. Ɔnwunle raalɛ tuutuunli bie na ɔ nee ye hɔlale.

²Bɛhanle bɛhilele Gazama kɛ, “Samesɛn ɛra ɛke.” Aledwolɛ ne amuala bɛbɔle bɛyiale sua ne na bɛ bie mɔ hɔdɛle ye wɔ suakpole ne anlenkɛ kpole ne anloa. Bɛyɛle ngungoonwu na bɛzele kɛ, “Bɛmaa yɛdɛ toonwo alehyenlɛ na yɛ sa baha ye yɛahu ye.”

³Samesɛn lale toonwo alevinli mu nwiɔ avinli. Ɔdwazole ɔhɔle suakpole ne anlenkɛ kpole ne anloa. Ɔkpusule anlenkɛ kpole ne ɔdule ye nee ye fɛlɛmo ne, boka mbulalɛ ne mɔ amuala ɔdole ɔ kɔme zo na ɔvale ɔhɔle boka ne mɔɔ nee Hibulɔn anye bɔ zolɛ la azo.

⁴Ɛhye anzi, Samesɛn nwunle raalɛ bie mɔɔ bɛfɛlɛ ye Dɛlaela la wɔ Sɔlɛke Bɔnza na ɔhulole ye.

⁵Filisitia mgbanyima hɔnwunle Dɛlaela na bɛzele ye kɛ, “To Samesɛn agyiba na nwu deɛ holɛ ko ne mɔɔ maa ye anwosesebɛ kpole zɛhae la, nee adenle mɔɔ yɛdua zolɛ a yɛkɛkyekye ye, na yɛkɛbɛlɛ ye aze la, na yɛ nuhua ko biala kɛmaa wɔ dwɛtɛ fufule apenle ko ɛya ko.”

⁶Yemɔti Dɛlaela zele Samesɛn kɛ, “Yɛmenle, kile me deɛ holɛ ko mɔɔ maa wɔ anwosesebɛ kpole ɛhye la, nee adenle mɔɔ bɛdua zolɛ a bɛkɛhola wɔ kyekye na bɛabɛlɛ wɔ aze la.”

⁷Samesɛn zele ye kɛ, “Saa bɛfa ɛda nyɛma amolɛ nsuu mɔɔ bɛtɛrɛlɛle ye fee la bɛkyekye me a me nwo bagolo me, na me anwosesebɛ ne bayɛ kɛ nrenya gyɛne biala anwosesebɛ la.”

⁸Filisitia mgbanyima rɛlɛle Dɛlaela ɛda nyɛma amolɛ nsuu mɔɔ bɛtɛrɛlɛle bɛ fee la, na ɔvale ɔkyekyele ye.

⁹Mɔɔ ɔyɛ ɛhye la, ɛnee menli vea sua ne ekpumgbunli ne bie anu ɛlɛkendɛ. Na ɔzele Samesɛn kɛ, “Samesɛn, Filisitiama ɛva wɔ aze!” Na Samesɛn tetele ɛda nyɛma ne anu kɛ dwɛsɛ mɔɔ senle ɛha ye la. Yemɔti bɛanwu deɛ mɔɔ maa ye anwosesebɛ ne la.

¹⁰Dɛlaela zele Samesɛn kɛ, “Wɔyɛ me koasea, wɔanga nɔhalɛ wɔangile me. Ka kɛ bɛkɛzi bɛkɛyɛ na bɛahola wɔ kyekye la kile me.”

¹¹Ɔzele ye kɛ, “Saa bɛfa samgbe nyɛma fofolɛ mɔɔ bɛtɛfale bɛtɛyɛle debie biala la bɛkyekye me a, me nwo bagolo me, na me anwosesebɛ ne bayɛ kɛ nrenya gyɛne biala anwosesebɛ la.”

¹²Yemɔti Dɛlaela vale nyɛma fofolɛ kyekyele ye na ɔzele ye kɛ, “Samesɛn, Filisitiama ɛva wɔ aze!” Ɛnee menli vea ye suakunlu ɛkɛ ɛlɛkendɛ. Na Samesɛn tetele nyɛma ne anu kɛ asɛɛ ɔle melahyinli nyɛma la.

¹³Na Dɛlaela zele Samesɛn kɛ, “Sumunli kɛ de la, me nwo ala a ɛgolo a. Ɛnga nɔhalɛ ɛngile me. Ka kɛ bɛkɛzi bɛkɛyɛ na bɛahola wɔ kyekye la kile me.” Na ɔzele ye kɛ, “Me enrinli ne mɔɔ bɛbobɔ ye agbɔkɛ nsuu mɔɔ hendɛhenda me ti zo la, saa ɛbɛka bɛ muala ɛbɔ nu, ɛfa pini ɛbɔ nu, ɛbɔ ye kpɔkɛ ɛmia nu a, me nwo bagolo me, na me anwosesebɛ ne bayɛ kɛ nrenya gyɛne biala anwosesebɛ la.”

¹⁴Yemɔti ɔlafele la, Dɛlaela vulale enrinli ne mɔɔ hendɛhenda ɔ ti zo la, ɔbɛkale ɔmanle ɔmianle ketekete na ɔvale pini ɔbɔle nu, na ɔzele ye kɛ, “Samesɛn, Filisitiama ɛva wɔ aze!” Na ɔvi nafelɛ nu ɔdwazole, ɔdule pini ne na ɔtulutulule ɔ ti ne.

¹⁵Dɛlaela zele ye kɛ, “Ɛnee kɛ ɛsi ɛka kɛ ɛkulo me ɛ, wɔ mekɛ mɔɔ ɛhulolɛ ne ɛnvi wɔ ahonle nu la? Wɔgolo me nwo fane nsa. Ɛleka mɔɔ wɔ anwosesebɛ kpole ne vi la ɛtɛkanle ɛtɛkilele me.”

¹⁶Na ɔhɔle zolɛ ɔbizale ye alehyenlɛ biala ɔmanle akee ɔyɛle Samesɛn abodelɛ mɔɔ ɛnee ɔ kunlu a anrɛɛ yewu bɔbɔ.

¹⁷Na ɔhanle nɔhalɛ ne kɔsɔɔti ɔhilele ye kɛ, “Dadeɛ dɛma ɛtɛkanle me ti enrinli ɛlɛ, ɔluakɛ mele ‘Tusiemaa-Nyamenle’ ralɛ mɔɔ bɛdule me bɛziele ɛkɛ bɛmanle Nyamenle kolaa na bɛawo me a. Kenle ko ne mɔɔ dadeɛ dɛma kɛha me ti enrinli la, kenle zɔhane, me anwosesebɛ ne kɛvi me nu; me nwo bagolo me, na menwɔyɛ kɛ nrenya gyɛne biala la.”

¹⁸Dɛlaela nwunle kɛ akee Samesɛn ɛha nɔhalɛ kɔsɔɔ ne ɛhile ye la, ɔzoanle ɔmanle bɛhɔbɔle Filisitia mgbanyima ne amaneɛ kɛ, “Bɛrɛla na akee yeha nɔhalɛ ne mɔɔ vea la.” Filisitia mgbanyima ne vale ɛwɔkɛbɔlɛ ezukoa ne lɛle bɛ sa nu rale.

¹⁹Ɔmanle Samesɛn lale ɔ gyakɛ azo na ɔbobole ye ɔmanle ɔlafele. Ɔvɛlɛle nrenya bie ɔmanle ɔrakpale ɔ ti enrinli totɔkɔɔ nsuu ne. Akee ɔbɔle ɔ bo kɛ ɔnwonlonwonlo ye. Na Samesɛn anwo golole ye, na ye anwosesebɛ ne vile ye nu.

²⁰Dɛlaela zele ye kɛ, “Samesɛn, Filisitiama ɛva wɔ aze!” Ɔvi nafelɛ nu ɔdwazole na ɔhanle kɛ, “Mefinde meahɔkpundi me nwo, kɛmɔ meyɛ ye dɛba ne ala la.” Ɛnee ɔnze kɛ Ɛdɛnkɛma ɛhwe ɔ nwo ɛvi ɔ nwo.

²¹Filisitiama ne hyele ye dudule ɔ nye na bɛ nee ye hɔle Gaza. Bɛvale kɔbele nwɔnzɔnwɔnzɔ bɛguale ye na bɛmanle ɔhyibale abɛlɛ melahyinli, ɔdinle abɛlɛ wɔ efiade ɛkɛ ne.

²²Na ɔ ti enrinli ne mɔɔ bɛkpale la bɔle ɔ bo kɛ ɔfifi bieko.

²³Akee Filisitia mgbanyima yiale kɛ bɛbɔ azu bɛamaa bɛ bozonle Deegɔn ne na bɛalie bɛ nye. Bɛzele kɛ, “Yɛ nyamenle ne ɛye yɛ kpɔvolɛ Samesɛn ɛmaa yɛ.”

²⁴Menli ne anye liele kpole kpalɛ, na bɛzele kɛ, “Bɛva Samesɛn bɛrɛla bɛmaa yɛva ye yɛlielie yɛ nye.” Bɛvale Samesɛn bɛvile efiade ne bɛrale, na bɛziele ye wɔ sua ne mpila nwiɔ ne avinli, na bɛvale ye bɛlieliele bɛ nye. Mɔɔ menli ne nwunle ye la, bɛyeyɛle bɛ bozonle ne bɛzele kɛ, “Yɛ nyamenle ne ɛmaa yɛli yɛ kpɔvolɛ ne mɔɔ ɛbɔ yɛ maanle ye ɛhu menli dɔɔnwo la anwo zo konim.”

²⁶Samesɛn zele kpavolɛ ne mɔɔ lɛ ɔ sa la kɛ, “Maa mensosɔ sua ye mpila nwiɔ ne mɔɔ lɛ ye la anu na mendudu mengisa bɛ.”

²⁷Na ɛnee menli, mrenya nee mraalɛ nee Filisitia mgbanyima ɛyi sua ne tɛkɛɛ. Sua ne ati zo bɔbɔ, mrenya nee mraalɛ kɛyɛ apenle nsa gua zolɛ yɛɛ bɛlɛnea debie mɔɔ Samesɛn ɛlɛyɛ la a.

²⁸Akee Samesɛn vɛlɛle Ɛdɛnkɛma na ɔhanle kɛ, “O Awulae Nyamenle, mesɛlɛ wɔ ko ɛhye ala. Kakye me, O Nyamenle, na maa me anwosesebɛ maa menzenra Filisitiama ye wɔ me nye nwiɔ ye mɔɔ bɛdudu la anwo.”

²⁹Yemɔti Samesɛn sosɔle sua ne avinli mpila nwiɔ ne anu, ɔvale ye anwosesebɛ ne amuala ɔhomonle zolɛ, ɔ sa fema ne lɛ ko anu yɛɛ bɛne ne noko lɛ ko anu.

³⁰Na ɔzele kɛ, “Maa me nee Filisitiama ye ɛwu.” Ɔvale ye anwosesebɛ kɔsɔɔti ɔtiale mpila nwiɔ ne. Sua ne bule guale mgbanyima nee menli mɔɔ wɔ nu la amuala anwo zo. Yemɔti menli mɔɔ ɔhunle bɛ wɔ ye ewule nu la zonle tɛla menli mɔɔ ɔbɔ ɔ bo amuala la yehu bɛ la.

³¹Ɔ mediema mrenya nee ye mbusua ne ravale ye funli ne hɔziele ye wɔ ɛleka mɔɔ bɛziele ɔ ze Manowa la wɔ Zɔla nee Ɛhyeteeyɔlo avinli. Ɔlile Yizilayɛma ati ɛvolɛ abulanwiɔ.