Read Nzema Maa 17 Bible Online

Maa 17 - Nzema bible

Maa 17

¹Nrenya bie wɔ sua ne mɔɔ gua Yifelaem awoka ne mɔ azo la azo. Bɛfɛlɛ ye Maeka.

²Ɔhanle ɔhilele ɔ nli kɛ, “Wɔ dwɛtɛ fufule apenle ko ɛya ko ne mɔɔ bɛwuale, mɔɔ ɛwale ɔ bo zo amonle a medame mendele ye me nzo nu la, meka meahile wɔ kɛ, ɔwɔ me lɔ. Medame a menvale a.” Na ɔ nli zele kɛ, “Ɛdɛnkɛma ɛyila wɔ, me ra nrenya.”

³Na Maeka yele dwɛtɛ fufule apenle ko ɛya ko ne manle ɔ nli. Na ɔ nli zele kɛ, “Mefa me sa nu ezukoa ɛhye meyɛ azubɔdeɛ memaa Ɛdɛnkɛma wɔ me ra ne ati, amaa yeaze ananze na yeaholo yeagua nwolɛ; yemɔti mesiane ye memaa wɔ.”

⁴Maeka zianenle ezukoa ne manle ɔ nli la, ɔ nli dele nuhua ɛya nwiɔ manle dwɛtɛ fufule dwinvolɛ; ɔmanle ɔzele ananze, na ɔholole dwɛtɛ fufule ne ɔguale nwolɛ, na bɛvale bɛziele Maeka sua ne anu.

⁵Maeka ɛhye lɛ ye amonle sua. Ɔyɛle mmonle nee ɛzonlenlɛ tɛladeɛ ne mɔɔ bɛfɛlɛ ye “yifɔdo” la bie, na ɔyele ɔ mra mrenya ne mɔ ko kɛ ɔdendɛ ye nyamenle ne anloa azo.

⁶ Mekɛ ne anu ɛnee belemgbunli biala ɛnle Yizilayɛ maanle ne anu. Awie biala ɔdaye ɔbɔle ye ɛbɛla mɔɔ ɔnea a ɔle kpalɛ la.

⁷Mekɛ ne anu ala ɛnee kpavolɛ bie vi Bɛtelɛhɛm mɔɔ wɔ Dwuda la ɛrazokoɛ ɛkɛ. Kpavolɛ ne le Livaenli.

⁸Ɔvi Bɛtelɛhɛm ɔdule kɛ ɔkakpondɛ ɛleka fofolɛ yeadɛnla. Ɔkɔ na ɔhɔdwule Yifelaem awoka ne mɔ azo azua ne mɔ ko azo la, ɔhɔle Maeka awuke ne anu.

⁹Maeka bizale ye kɛ, “Ɛvi nienwu sua zo?” Na ɔbuale ye kɛ, “Mele Livaenli, mevi Bɛtelɛhɛm mɔɔ wɔ Dwuda la, na meluolua nu kɛ mekpondɛ ɛleka meadɛnla.”

¹⁰Na Maeka zele ye kɛ, “Maa yɛdɛnla ɛke; yɛ selɛ nee me sɛlɛvolɛ. Ɛvolɛ biala mebadua wɔ dwɛtɛ fufule ngoko bulu. Mebamaa wɔ adɛladeɛ na meali ɛ nloa anu ndɔnie.”

¹¹Na Livaenli ne kponlenle zolɛ kɛ ɔ nee ye kɛdɛnla. Kpavolɛ ne yɛle kɛ ɔ mra ne mɔ ko ala la.

¹²Na Maeka yɛle Livaenli ne ye sɛlɛvolɛ wɔ ɔdaye Maeka ye awuke nu ɛkɛ.

¹³Akee Maeka hanle kɛ, “Kɛkala, akee menwu kɛ Ɛdɛnkɛma bamaa meakpazi, ɔboalekɛ menyia Livaenli sɛlɛvolɛ.”