Read Nzema Maa 18 Bible Online

Maa 18 - Nzema bible

Maa 18

¹Mekɛ ne anu ɛnee belemgbunli biala ɛnle Yizilayɛ maanle ne anu. Eza mekɛ ne anu ala ɛnee Dan abusua ekpunli ne anu amra ɛnlɛ bɛ ti anwo azɛlɛ ɛnde zolɛ na bɛlɛkpondɛ bie bɛadɛnla zolɛ; ɔluakɛ Yizilayɛ abusua ekpunli ne mɔ kɔsɔɔti lɛ bie. Bɛmɛ ala yɛɛ bɛnlɛ bie a.

²Yemɔti Danema yele mrenya akɛnrasesebɛ nnu wɔ Zɔla nee Ɛhyeteeyɔlo na bɛzoanle bɛ kɛ bɛhɔli busia bɛhɔkpɔla azɛlɛ ne na bɛyɛ bie anyenle. Bɛzele soanvolɛma ne kɛ, “Bɛhɔ na bɛhɔnlea bɛkpondɛ azɛlɛ.” Bɛhɔle sua ne mɔɔ gua Yifelaem boka ne azo la azo. Bɛhɔle Maeka sua nu na bɛhɔzokoɛle ye.

³Mɔɔ bɛwɔ Maeka sua nu ɛkɛ ne la, bɛdele Livae kpavolɛ ne ɛdendɛlɛ. Bɛhwenle bɛbikyele ye na bɛbizale ye kɛ, “Nwane a nee wɔ rale ɛke a? Duzu yɛɛ ɛlɛyɛ ye wɔ ɛke a? Duzu gyima yɛɛ ɛdi ye wɔ ɛke a?”

⁴Ɔzele bɛ kɛ, “Maeka nee me ɛhyehyɛ kɛ menyɛ ye sɛlɛvolɛ na ɔdua me kakɛ.”

⁵Bɛzele kpavolɛ ne kɛ, “Yɛsɛlɛ wɔ, biza Nyamenle, saa yɛ adendulɛ ye kɛyɛ saleɛ kɛmaa yɛ a.”

⁶Na sɛlɛvolɛ ne zele bɛ kɛ, “Bɛhɔ anzonudwolɛ nu. Ɛdɛnkɛma anye wɔ bɛ nwo zo wɔ bɛ adendulɛ nu.”

⁷Akee menli nnu ne zile nu hɔle Leeyehye. Bɛnwunle kɛ menli ne de anzonudwolɛ nu. Bɛde ye kɛ Saedɛnema de ye la. Bɛde anzonudwolɛ nu yɛɛ bɛ nloa beta bɛ ti anwo. Bɛ nee awie biala ɛnlɛ manzonle yɛɛ bɛngyia ɛhwee biala mɔɔ wɔ ewiade ye anu la anwo. Anwonyia a, bɛlɛ bie. Bɛ nee Saedɛnema avinli twe, yɛɛ bɛ nee awie biala ɛnlɛ ngitanwolilɛ.

⁸Mɔɔ menli nnu ne ziale hɔle Zɔla nee Ɛhyeteeyɔlo la, bɛ mediema ne mɔ bizale bɛ kɛ, “Duzu kolakola a bɛ nee ye rale a?”

⁹Bɛzele bɛ kɛ, “Bɛdwazo bɛmaa yɛhɔteta bɛ, ɔluakɛ yɛhɔnwu azɛlɛ ne kɛ ɔle azɛlɛ mɔɔ kye aleɛ a. Bɛha bɛ nwo. Bɛmmamaa yɛtɛnla ɛke yɛfonla yɛ nwo. Bɛmaa yɛhɔ na yɛhɔva azɛlɛ ne.

¹⁰Saa bɛkɔ a, bɛbanwu kɛ menli ne le menli mɔɔ ɛndwenle awie mɔ anwo a. Azɛlɛ ne tɛlɛ. Ɔle azɛlɛ mɔɔ debie biala anwo ɛngyia zolɛ a. Nyamenle yɛɛ ɛye ɛmaa yɛ a.”

¹¹Na Dan abusua ekpunli ne anu amra ɛya nsia vale bɛ konle ninyɛne vi Zɔla nee Ɛhyeteeyɔlo zile nu hɔle.

¹²Bɛkɔ la, bɛhɔzokoɛle Keleate Gyialem adɔleɛ afoa nu wɔ Dwuda. Ɛhye ati a ɛnɛ nee ɛnɛ ala bɛtɛfɛlɛ ye Dan Azokoɛleɛ la.

¹³Bɛvile ɛkɛ ne bɛhɔle sua ne mɔɔ gua Yifelaem awoka ne mɔ azo la azo na bɛhɔle Maeka awuke nu.

¹⁴Akee menli nnu ne mɔɔ hɔlile Leeyehye azɛlɛ ne azo busia la zele bɛ mediema ne mɔ kɛ, “Asoo bɛze kɛ azua ɛhye mɔ, mmonle ngyikyi, ananze mɔɔ bɛze nee mɔɔ bɛholo dwɛtɛ fufule bɛgua nwolɛ la, nee nwolɛ ɛzonlenlɛ tɛladeɛ wɔ ko anu ɔ? Yemɔti bɛdwenle mɔɔ ɔwɔ kɛ bɛyɛ la anwo.”

¹⁵Zɔhane ati bɛhɔle Maeka awuke ne anu. Bɛhɔdole Livae kpavolɛ ne na bɛbizale ye kɛ ye gyima ne si kɔ zolɛ la.

¹⁶Dan ɛlɔnema ɛya nsia ne mɔɔ dedɛ konle ninyɛne la hale suakpole ne anlenkɛ kpole ne anzi nehane hendɛle.

¹⁷Menli nnu ne mɔɔ hɔlile busia ne la bɔle hɔle sua ne anu. Bɛsesale ananze ne mɔ mɔɔ bɛze nee mɔɔ bɛholo dwɛtɛ fufule bɛgua nwolɛ, mmonle ngyikyi ne mɔ, yɛɛ ɛzonlenlɛ tɛladeɛ ne amuala. Mekɛ ɛhye noko ɛnee sɛlɛvolɛ ne nee ɛlɔnema ɛya nsia ne mɔɔ dedɛ konle ninyɛne la gyi anlenkɛ kpole ne anloa nehane.

¹⁸Mɔɔ menli ɛhye mɔ bɔle hɔle Maeka awuke ne anu hɔsesale ananze ne mɔ mɔɔ bɛze, nee mɔɔ bɛholo dwɛtɛ fufule bɛgua nwolɛ, mmonle ngyikyi ne mɔ, nee ɛzonlenlɛ tɛladeɛ ne la, sɛlɛvolɛ ne bizale bɛ kɛ, “Duzu debie a bɛlɛyɛ la?”

¹⁹Bɛzele ye kɛ, “Yɛ koonwu. Ka ɛ nloa to nuhua na bɛla maa yɛhɔ. Bayɛ selɛ nee yɛ sɛlɛvolɛ. Ɛnea a ɛnee ɔle kpalɛ kɛ ɛkɛyɛ Yizilayɛ mbusua ekpunli ne mɔ ko nee bɛ awuke awuke ne mɔ anu amra sɛlɛvolɛ anzɛɛ ɛkɛyɛ sonla ko awuke nu sɛlɛvolɛ ɔ?”

²⁰Sɛlɛvolɛ ne ahonle dɔle ye azule nu. Ɛhye ati ɔvale ɛzonlenlɛ tɛladeɛ ne nee mmonle ngyikyi ne nee ananze ne mɔ na ɔ nee menli ne hɔle.

²¹Bɛmanle bɛ ngakula ne mɔ, nee nyɛmoa, nee bɛ nwo ninyɛne ne mɔ lumuale bɛ nyunlu, na akee bɛzile nu kɛ bɛkɔ.

²²Mɔɔ bɛhɔle moa bie kpalɛ la, menli mɔɔ zuozua Maeka la dele bɛ kunlu na bɛdule bɛdoale Danema ne.

²³Bɛdeɛdeanle nu bɛvɛlɛle bɛ, na Danema hakyile bɛ nye na bɛzele Maeka kɛ, “Duzu a gyegye wɔ mɔɔ yemɔti wɔva ɛlɔne ɛhye wɔkpo yɛ a?”

²⁴Maeka zele bɛ kɛ, “Bɛva me nyamenle ne mɔ mɔɔ medame meyɛ, nee me sɛlɛvolɛ mɔɔ melɛ la bɛlɛkɔ, na ɛnee bɛdabɛ bɛnea a duzu a ka me sa nu a? Kɛmɔti a bɛbiza me kɛ, ‘Duzu a gyegye wɔ a?’ ”

²⁵Na Danema ne zele ye kɛ, “Mua ɛ nloa! Mmayɛ ɛmaa ahonle futu, na anrɛɛ ɛdawɔ nee wɔ awuke nu amra amuala kɛdɔ.”

²⁶Na Danema dule denrɛle. Maeka nwunle kɛ ɔ nee bɛ ɛnrɛhola ko la, ɔziale ɔ nzi koonwu ɔhɔle sua nu.

²⁷Mɔɔ Danema vale ninyɛne mɔɔ Maeka ɛyɛ nee ye sɛlɛvolɛ ne la, akee bɛhɔvole Leeyehyema anwo zo. Leeyehyema ɛnze nwolɛ bie, yɛɛ bɛ nye ɛnla. Yemɔti bɛhunle menli ne kɔsɔɔti na bɛyelale sua bɔdenle ne.

²⁸Leeyehyema annyia dievolɛ biala, ɔluakɛ bɛ nee Saedɛnema avinli twe, yɛɛ bɛ nee awie biala ɛnlɛ ngitanwolilɛ. Danema kyekyele suakpole ne fofolɛ na bɛdɛnlanle zolɛ wɔ bɔnza ne mɔɔ zua Bɛtelihɔbo la anu.

²⁹Na bɛvale suakpole ne mɔɔ anrɛɛ bɛfɛlɛ ye Leeyehye la bɛdonle bɛ nlenya Dan, mɔɔ bɛwole ye wɔ Yizilayɛ la.

³⁰Danema ne vale Maeka ananze nyamenle ne mɔ ziele yɛle bɛ ɛdeɛ. Na Mosisi ara nrenya Gɛhyɔn ara Dwɔnatan nee ɔ mra mrenya ne mɔ yɛle Dan abusua ekpunli ne sɛlɛvolɛma hɔkpulale mekɛ mɔɔ bɛvale maanle ne donvula la.

³¹Yemɔti bɛziele Maeka ananze nyamenle ne mɔ na bɛzɔle mekɛ dɔɔnwo, kɛmɔ ɛnee Nyamenle Sua ne wɔ Hyaelo la.