Read Nzema Maa 19 Bible Online

Maa 19 - Nzema bible

Maa 19

¹Mekɛ mɔɔ ɛnee Yizilayɛma ɛnlɛ belemgbunli la, Livaenli bie dule adenle hɔle Yifelaem awoka ne mɔ azo. Ɔvale mgbɔnla wɔ Bɛtelɛhɛm mɔɔ wɔ Dwuda la.

²Ye mgbɔnla ne wulowulale ɔ sa aze, na ɔziale ɔhɔle ɔ ze sua zo Bɛtelɛhɛm mɔɔ wɔ Dwuda la ɔhɔziele ɔ nwo aze siane nna.

³Ɔ hu dwazole kɛ ɔkakpo ɔ bo zo, yeahɔha ɛdendɛlɛ kpalɛ yeahile ye na ɔ nee ye azia. Ɔvale ye sonvolɛ ne nee asoaso nwiɔ ɔ nee bɛ hɔle ɔ ye ɔ ze sua zo. Ɔdwule la ɔ ye vale ye rale ɔ ze sua nu. Ɔ ye ɔ ze nwunle ye la ɔvale fɛlɛkolilɛ ɔhɔyiale ye adenle.

⁴Ɔ ye ɔ ze ne liele ye na ɔ nee ye dɛnlanle kenle nsa, bɛlile bɛnlonle.

⁵Ye kenle nsa ne azo bɛdwazole nwonlomɔ mangyee ne na Livaenli ne boɔboale ɔ nwo kɛ ɔkɔ. Raalɛ ne ɔ ze zele ye kɛ, “Kpula ɛ sa kolaa na wɔahɔ.”

⁶Yemɔti bɛ mu nwiɔ bɛdɛnlanle aze bɛkpulale bɛ sa na bɛnlonle. Akee raalɛ ne ɔ ze zele nrenya ne kɛ, “Maa yɛla na die ɛ nye.”

⁷Livaenli ne nyianle nwolɛ kɛ ɔkɔ la, ɔ ye ɔ ze ne yɛle toonwo manle ɔlale bieko.

⁸Aleɛ hyenle bieko mɔɔ ɛnee nrenya ne ɛli kenle nnu la, ɔdwazole ndɛ kɛ ɔkɔ, na ɔ ye ɔ ze ne zele ye kɛ, “Di debie maa sɛnzɛne ne ɛkpali ekyii na wɔahɔ.” Eza bɛ mu nwiɔ bɛlile debie.

⁹Na mɔɔ nrenya ne nee ye mgbɔnla ne nee ye sonvolɛ ne nyianle nwolɛ kɛ bɛkɔ la, ɔ ye ɔ ze ne zele ye kɛ, “Sɛnzɛne ne asɛɛ ɛdɔ; mesɛlɛ wɔ, da. Aleɛ ɛdwo. Die ɛ nye na ɛhyema nwonlomɔ mangyee ne ala ɛkɛhɔ na wɔadwu sua nu.”

¹⁰Nrenya ne amkponle kɛ ɔkɛla bieko. Yemɔti ɔzile nu na ɔradwule Gyibɛse[5] kandiba, ɔdaye, yɛɛ ye sonvolɛ ne nee ye mgbɔnla ne, yɛɛ ye asoaso nwiɔ mɔɔ mbia wɔ zolɛ la.

¹¹Mɔɔ bɛbikyele Gyibɛse la, ɛnee mekɛ ne ɛhɔ dɔɔnwo. Na ye sonvolɛ ne zele ye kɛ, “Bɛmaa yɛmakyi Gyibɛsema suakpole ɛhye azo yɛkpondɛ ɛleka yɛhyea.”

¹²Ɔ menle ne zele ye kɛ, “Yɛnrɛmakyi suakpole biala mɔɔ ye ezuavolɛ ne ɛnle Yizilayɛma la azo; yɛpɛ nuhua yɛahɔ Gebɛya. Bɛla maa yɛhɔ yɛ nyunlu na yɛhɔla Gebɛya anzɛɛ Releema.”

¹⁴Yemɔti bɛpɛle nuhua bɛhɔle. Sɛnzɛne ne dɔle bɛ wɔ mɔɔ ɛnee bɛbikye Gebɛya, mɔɔ wɔ Bɛngyaman abusua ekpunli ne maanle nu la,

¹⁵na bɛvole suakpole ne azo kɛ bɛkala. Bɛhɔdɛnlanle suakpole ne gua kpatawienyi ne azo, ɔluakɛ awie biala anva bɛ angɔ ye sua nu.

¹⁶Nrenya kpanyinli bie mɔɔ vi ɛbɔ nu ɛlɛba sua zo nɔsolɛ nu la ravindele bɛ nwo zo. Nrenya ne vi sua bie mɔɔ gua Yifelaem awoka ne mɔ azo la azo yɛɛ yeradɛnla Gebɛya a. Gebɛyama le Bɛngyaman abo zo amra.

¹⁷Nrenya kpanyinli ne nwunle ɛyɛvolɛ ne na ɔbizale ye kɛ, “Ɛvi nienwu, yɛɛ ɛkɔ nienwu?”

¹⁸Ɛyɛvolɛ ne zele ye kɛ, “Yɛvi Bɛtelɛhɛm mɔɔ wɔ Dwuda la; yɛse yɛahɔ Yifelaem awoka ne mɔ azo lɔ; ɛkɛ ne a mevi a. Mengɔle Bɛtelɛhɛm mɔɔ wɔ Dwuda la yɛɛ mese meahɔ me sua zo a. Na yɛnnyia awie biala ɛnva yɛ ɛngɔ sua nu[6].

¹⁹Yɛlɛ asoaso ne mɔ anwo ndile nee aleɛ; yɛlɛ kpanwo nee nwanye mɔɔ medame, me mgbɔnla ye nee me sonvolɛ ye yɛdi yɛanlo la. Yɛnrɛhyia debie biala anwo.”

²⁰Na nrenya kpanyinli ne zele kɛ, “Akoaba. Maa yɛhɔ sua nu. Ɔnle kɛ ɛda gua kpatawienyi ye azo.”

²¹Na ɔvale ye ɔ nee ye hɔle sua nu. Ɔmanle asoaso ne mɔ aleɛ. Akee nyɛvolɛ ne mɔ wowole bɛ gyakɛ anwo, na bɛlile na bɛnlonle.

²² Na mekɛ mɔɔ bɛlɛdi debie na bɛ nye ɛlie la, arɛlevilɛ nu ala, suakpole ne azo mrenya bie mɔɔ fa bɛ gɔnwo mɔ mrenya la rabɔle yiale sua ne na bɛbɔle anlenkɛ ne anu ndinlizo. Bɛzele nrenya kpanyinli ne kɛ, “Fa nrenya ne mɔɔ wɔ wɔ sua ne anu la finde maa yɛ nee ye ɛyɛ nrenya nee nrenya.”

²³Na awuke menle ne vindele doale bɛ na ɔzele bɛ kɛ, “Me mediema, adenle ɛnle ɛkɛ. Bɛmmayɛ amumuyɛ. Nrenya ye le me sokoɛvolɛ. Bɛmmabɔ munzule ɛbɛla biala.

²⁴Bɛnlea, me ra raalɛ mɔɔ ɛnze nrenya fee yɛɛ nrenya ne mgbɔnla noko wɔ ɛke. Bɛmaa menva bɛ membɛlɛ bɛ na bɛyɛ bɛ debie biala mɔɔ bɛkulo la. Na nrenya ɛhye, bɛmmayɛ mɔɔ bɛnyɛ la bɛkile ye.”

²⁵Noko menli ne mɔ amkponle. Yemɔti nrenya ne vale ye mgbɔnla ne vindele rɛlɛle bɛ. Bɛfulofunlanle ye, bɛ nee ye lale bɛ ti ngoko toonwo alehyenlɛ. Aleɛbahye ne mɔɔ maanle nu ɛlɛba aratete la, bɛgyakyile ye kɛ ɔhɔ.

²⁶Raalɛ ne rapɛle finle nrenya kpanyinli ne sua ne mɔɔ ɔ hu la nu la anlenkɛ ne anloa, na ɔlale ɛkɛ ne toonwo maanle nu tetele wienyi.

²⁷Nwonlomɔ ne ala ɔ hu dwazole dukuele anlenkɛ ne kɛ ɔkɔ. Na nea, ye mgbɔnla ye a bea anlenkɛ ye anloa na ɔ sa gua anuhɔlɛ ɛkɛ ne la.

²⁸Ɔzele ye kɛ, “Dwazo maa yɛhɔ.” Na raalɛ ne anga ɔ nwo. Nrenya ne vale ye dole ye asoaso ne azo na ɔzile nu ɔhɔle ye sua zo.

²⁹ Ɔdwule sua nu la, ɔvale dadeɛ ɔdudule ye mgbɔnla ne funli ne abɛsa abɛsa. Akee ɔhyɛle ye nwonane ne anu bulu nee nwiɔ, na ɔvale ɔhɔle Yizilayɛ maanle ne anu amuala.

³⁰Na bɛdabɛ mɔɔ bɛnwunle zɛhae debie la hanle kɛ, “Debie zɛhae, bie ɛtɛsile ɛlɛ; yɛɛ ɔvi mekɛ mɔɔ yɛ mgbanyinli, Yizilayɛma vi Yigyibiti azɛlɛ zo rale la, yɛtɛtele bie ɛlɛ kɛ ɛnɛ kenle ye ala. Bɛnlea bɛdwenle nwolɛ na mɔɔ bɛka la bɛha.”