Read Nzema Maa 2 Bible Online

Maa 2 - Nzema bible

Maa 2

¹Ɛdɛnkɛma soanvolɛ vi Gelegale hɔle Bokem. Ɔzele bɛ kɛ, “Menyele bɛ menvile Yigyibiti azɛlɛ zo, me nee bɛ rale azɛlɛ ne mɔɔ menvale membɔle bɛ mgbanyima ɛwɔkɛ la azo. Menganle kɛ, ‘Menrɛtulu ngyekyeleɛ ne mɔɔ me nee bɛ kyekyele la ɛlɛ,

² yɛɛ bɛdabɛ noko bɛ nee menli mɔɔ de azɛlɛ ye azo la mmayɛ ngyehyɛlɛ biala, na bɛbubu bɛ azukponle ne mɔ.’ Noko bɛanli me mɛla ne azo. Bɛdabɛ bɛnlea bɛ nyɛleɛ mɔɔ bɛyɛ la.

³Zɔhane ati mese, menrɛvoa menli ɛhye mɔ. Bɛbayɛ bɛ nwo ɛlɔne, na bɛ awozonle ne mɔ bayɛ ngane amaa bɛ.”

⁴Mɔɔ Ɛdɛnkɛma soanvolɛ ne hanle edwɛkɛ ɛhye hilele Yizilayɛma la, bɛdukuele nu bɛzunle.

⁵Na bɛvɛlɛle ɛleka zɔhane Bokem,[2] na bɛbɔle azu wɔ ɛkɛ ne bɛmanle Ɛdɛnkɛma.

⁶Dwɔhyua manle menli ne mɔ hɔle la, Yizilayɛnli biala ziale hɔvale ye azɛlɛ ɛdeɛ ne mɔɔ le ye agyadeɛ la.

⁷Wɔ Dwɔhyua mekɛ zo menli ne zonlenle Ɛdɛnkɛma, yɛɛ ye ewule ne anzi bɛhɔle zolɛ bɛzonlenle Ɛdɛnkɛma wɔ mekɛ mɔɔ mgbanyima mɔɔ Dwɔhyua wule gyakyile bɛ la de aze la, ɔluakɛ bɛ muala bɛnwunle gyima kpole mɔɔ Ɛdɛnkɛma ɛli ɛmaa Yizilayɛma la.

⁸Na Ɛdɛnkɛma sonvolɛ Dwɔhyua, Nɛn ara ne lile ɛvolɛ ɛya ko, ɛvolɛ bulu na yeawu.

⁹Bɛziele ye wɔ ɔdaye ye azɛlɛ zo wɔ Temenate Sila wɔ Yifelaem maanzinli nu, Geeyahye boka ne sɔlɔ.

¹⁰Na awolɛndoazo zɔhane anu amra amuala wule, na awolɛndoazo fofolɛ mɔɔ ɛnze Ɛdɛnkɛma anzɛɛ ɛnze gyima mɔɔ Ɛdɛnkɛma ɛli ɛmaa Yizilayɛma la dwazole.

¹¹Yizilayɛma bɔle munzule ɛbɛla tiale Ɛdɛnkɛma. Bɛkpole Ɛdɛnkɛma, mɔɔ le bɛ ze mɔ Nyamenle ne, mɔɔ yele bɛ vile Yigyibiti azɛlɛ zo la, na bɛzonlenle awozonle Beeyale ne mɔ. Bɛlile nyamenle gyɛne bie mɔ anzi, bɛzonlenle menli mɔɔ ɛbɔ bɛ ɛyia la nyamenle ne mɔ. Bɛbɔle bɛ ti aze bɛmanle bɛ, na Ɛdɛnkɛma vale ɛya kpole.

¹³Bɛkpole Ɛdɛnkɛma na bɛzonlenle Beeyale ne mɔ nee mmonle Asetate ne mɔ.

¹⁴Yemɔti Ɛdɛnkɛma vale Yizilayɛma anwo ɛya kpole. Ɔmanle ɛlɔne ratetale bɛ, bole bɛ, wuale bɛ ninyɛne, na ɔyele bɛ ɔmanle bɛ kpɔvolɛma mɔɔ ɛbɔ ɛyia bɛ la. Na Yizilayɛma yɛle anwunvɔne somaa wɔ bɛ sa nu.

¹⁵Kɛmɔ Ɛdɛnkɛma kɔkɔ ne mɔɔ ɔbɔle bɛ, nee ye ndane ne mɔɔ ɔhanle ɔdole zolɛ la se la, mekɛ biala mɔɔ Yizilayɛma kɛhɔ konle nloa la, Ɛdɛnkɛma ko tia bɛ wɔ bɛ munzule ɛbɛla ne ati, na bɛnwunle amaneɛ kpole.

¹⁶Nzinlii akee Ɛdɛnkɛma manle Yizilayɛma nyianle menli lile bɛ ti na bɛliele bɛ bɛvile nwule ne mɔ asa anu.

¹⁷Noko bɛandie menli mɔɔ lile bɛ ti la aneɛ. Bɛanli nɔhalɛ bɛammaa Ɛdɛnkɛma. Bɛhɔlile nyamenle gyɛne bie mɔ anzi na bɛzonlenle bɛ. Bɛanva adenle ne mɔɔ bɛ mgbanyima ne mɔ luale nu zonlenle Ɛdɛnkɛma la anu. Bɛ ze mɔ lile Ɛdɛnkɛma mɛla ne mɔ azo, na bɛmɛ, bɛanli zo fee.

¹⁸Mekɛ biala mɔɔ Ɛdɛnkɛma kɛmaa bɛ sonla kɛ ɔli bɛ ti la, ɔ nee ye dua na ɔdie Yizilayɛma ɔfi bɛ kpɔvolɛma asa anu, wɔ mekɛ mɔɔ ahenle mɔɔ li bɛ ti la de aze la. Ɔluakɛ ɔyɛ na bɛkile bɛ nyane nee abodelɛ na bɛse kɛ bɛsu a ɛnee ɔyɛ Ɛdɛnkɛma alɔbɔlɛ.

¹⁹Noko mekɛ biala mɔɔ ahenle mɔɔ li bɛ ti la kɛwu la, ɛnee bɛzia bɛ nzi bɛlɛbɔ bɛ munzule ɛbɛla ne bieko, na bɛyɛ bɔbɔ bɛmaa ɔtɛla dɛba ne mɔɔ bɛ ze mɔ yɛle la. Bɛtoɔdoa nyamenle gyɛne gyɛne, bɛsonle bɛ, na bɛbɔ bɛ ti aze bɛmaa bɛ. Bɛangyakyi bɛ ninyɛndane nee anzosesebɛ ne mɔ ɛyɛlɛ.

²⁰Ɛdɛnkɛma vale Yizilayɛma anwo ɛya na ɔzele kɛ, “Kɛmɔ menli ɛhye mɔ ɛtulu me ngyekyeleɛ ne mɔɔ me nee bɛ ze mɔ kyekyele, na bɛandie me ne la,

²¹menrɛli bɛ nyunlu menrɛdu menli mɔɔ ɛha azɛlɛ ne azo mɔɔ Dwɔhyua wule gyakyile bɛ ɛkɛ ne la,

²²amaa meava meazɔ Yizilayɛma meanlea kɛ bɛkɛli medame Ɛdɛnkɛma, me mɛla zo, kɛmɔ bɛ ze mɔ lile zolɛ la anzɛɛ bɛnrɛyɛ.”

²³Zɔhane ati Ɛdɛnkɛma gyakyile maanle maanle zɔhane mɔ wɔ azɛlɛ ne azo. Yeandu bɛ ɛkɛ ne ala, yɛɛ yeanva bɛ yeanwula Dwɔhyua tumi ne abo.