Read Nzema Maa 20 Bible Online

Maa 20 - Nzema bible

Maa 20

¹Akee Yizilayɛma kɔsɔɔti, ɔvi Dan mɔɔ kɔ Biyɛhyiba nee Geleade la yɛle ko na bɛrayiale nu wɔ Mezepa wɔ Ɛdɛnkɛma duma nu.

²Na Yizilayɛ mbusua ekpunli ekpunli ne mɔ anu mgbanyinli rale Nyamenle menli ne nyianu ne bie. Ɛlɔnema mɔɔ dua aze fa dadeɛ ko la le apenle ngoko ɛya nna.

³Bɛngyaman abusua ekpunli ne noko dele kɛ Yizilayɛma ɛhɔ ayia wɔ Mezepa. Na Yizilayɛma ne bizale kɛ, “Bɛha kɛ ɔyɛle mɔɔ munzule ɛhye ɛzi la bɛhile yɛ.”

⁴Na Livaenli ne, mɔɔ ɔ ye a bɛhunle ye la yele ɔ nloa kɛ, “Membale Gebɛya mɔɔ wɔ Bɛngyamanema maanle nu la; me nee me mgbɔnla a rale a, kɛ yɛbala ɛkɛ.

⁵Na Gebɛyama dwazole me nwo zo; bɛbɔle bɛyiale sua ne mɔɔ mela nu la kɛ bɛku me, na bɛ nee me mgbɔnla ne lale dedee bɛmanle ɔwule.

⁶Na menvale funli ne mempepɛle nu bulu nee nwiɔ, na mengyɛle memanle Yizilayɛ mbusua ekpunli ekpunli bulu nee nwiɔ ne. Ɔluakɛ bɛyɛ mɔɔ bɛnyɛ la, na bɛbɔ munzule wɔ Yizilayɛ maanle ye anu.

⁷Bɛmɛ Yizilayɛma mɔɔ bɛyia ɛke la, bɛdabɛ bɛdwenle ɛhye anwo na bɛva nwolɛ adwenle.”

⁸Na menli ne kɔsɔɔti yɛle ko na bɛzele kɛ, “Yɛ nuhua biala, saa ɛde ndanlɛ sua bo o anzɛɛ ɛde sua nu o, ɛndu ɔ gyakɛ.

⁹Debie mɔɔ yɛyɛ Gebɛyama la ɛne: yɛgua nzeleba yɛaye menli yɛamaa bɛahɔdoa Gebɛyama bɛ nee bɛ ahɔho.

¹⁰Yizilayɛ abusua ekpunli ko biala anu, menli ɛya ko biala, yɛbaye nuhua bulu, apenle ko biala, yɛbaye nuhua ɛya ko, yɛɛ apenle bulu biala, yɛbaye nuhua apenle ko na bɛahɔlielie aleɛ bɛarɛlɛ menli mɔɔ ɛlɛko atia Gebɛya[7] mɔɔ wɔ Bɛngyaman maanle nu la, wɔ munzule mɔɔ yebɔ yetia Yizilayɛ la.”

¹¹Yemɔti Yizilayɛma amuala yɛle ko boɔboale bɛ nloa, na bɛhɔtetale sua ne kɛ bɛ nee sua ne azo amra ko.

¹²Yizilayɛ mbusua ekpunli ekpunli ne mɔ zoanle menli wɔ Bɛngyaman maanle ne anu amuala manle bɛhɔbizale bɛ kɛ, “Duzu amumuyɛ ɛbɛla a bɛbɔ la?

¹³Bɛye menli zɔhane mɔ mɔɔ wɔ Gebɛya, mɔɔ bɔle munzule ɛbɛla ne la bɛrɛla bɛmaa yɛhu bɛ, na yɛkpa munzule ɛhye yɛvi Yizilayɛ maanle ye anu.” Na Bɛngyamanema andie bɛ mediema Yizilayɛma ne ane.

¹⁴Bɛngyamanema vi bɛ azuamgbole ne mɔ azo rale Gebɛya kɛ bɛ nee Yizilayɛma baho.

¹⁵Bɛngyamanema apenle ngoko abulanwiɔ nee nsia a vi azuamgbole ne mɔ azo rabɔle Gebɛyama ɛya nsuu mɔɔ bɛyele bɛ la anwo zo a.

¹⁶Menli ɛhye mɔ, nuhua ɛya nsuu le bɛne yɛɛ ko biala kola to totoabɔ bɔ sonla ti enrinli ko mɔɔ ɔnli mgba a.

¹⁷Na Yizilayɛma mɔɔ ɛha la boɔboale menli apenle ngoko ɛya nna mɔɔ ze konle nye zo kpalɛ kpalɛ la anloa.

¹⁸Yizilayɛma hɔle Bɛtɛle hɔbizale Nyamenle kɛ, “Yizilayɛ mbusua ekpunli ekpunli ne, nuhua boni yɛɛ ɛlumua ɛhɔteta Bɛngyamanema nee bɛ ɛho a?” Ɛdɛnkɛma zele bɛ kɛ, “Dwuda abusua ekpunli ne a dumua ahɔ a.”

¹⁹Nwonlomɔ ne, Yizilayɛma ne hɔdɛle Gebɛya kandiba.

²⁰Na bɛvale konle bɛdoale Bɛngyamanema wɔ ɛleka mɔɔ nee suakpole ne anye bɔ zolɛ la.

²¹Bɛngyamanema ɛlɔne ne vi Gebɛya vindele, na toonwo mɔɔ sɛnzɛne ne kadɔ la ɛnee bɛhu Yizilayɛma apenle ngoko abulanwiɔ nee nwiɔ.

²²Noko Yizilayɛma zile ahonle. Eza bɛhɔdɛle ɛleka ko ne ala mɔɔ alumua ne bɛhɔdɛle la.

²³Yizilayɛma ne hɔle Ɛzonlenlɛ Sua ne anu hɔzunle zɛlɛle toonwo nɔsolɛ; na bɛbizale Ɛdɛnkɛma kɛ, “Eza yɛva konle yɛhɔdoa yɛ mediema Bɛngyamanema ne bieko ɔ?” Ɛdɛnkɛma buale kɛ, “Bɛ nee bɛ ɛhɔho.”

²⁴Yemɔti ye kenle nwiɔ ne azo, Yizilayɛma eza hɔtetale Bɛngyamanema ne bieko.

²⁵Bɛngyamanema noko vi Gebɛya rayiale bɛ nee bɛ honle, na bɛhunle Yizilayɛma menli mɔɔ ze konle nye zo kpalɛ la anu apenle ngoko bulu nee mɔtwɛ.

²⁶Na Yizilayɛ ɛlɔnema ne kɔsɔɔti hɔle Bɛtɛle hɔzunle. Bɛhɔle Ɛdɛnkɛma anyunlu; bɛhyele ɛhɔne kenle ko ne toonwo nɔsolɛ. Bɛbɔle naneyelalɛ azu na bɛbɔle anzonudwolɛ azu bɛmanle Ɛdɛnkɛma.

²⁷Mekɛ ne anu ɛnee Nyamenle Ngyekyeleɛ Ɛlɛka ne wɔ ɛkɛ, na Aalɔn ara nrenya Ɛlieza ara Fenɛhaze a le sɛlɛvolɛ a. Na Yizilayɛma bizale Ɛdɛnkɛma bieko kɛ, “Eza yɛva konle yɛhɔdoa yɛ mediema Bɛngyamanema bieko ɔ, anzɛɛ yɛgyakyi?” Ɛdɛnkɛma buale kɛ, “Bɛhɔ bieko, ɔluakɛ ɛhyema mebaye Gebɛyama meamaa bɛ,”

²⁸

²⁹Yemɔti ye fane nsa ne azo, Yizilayɛma manle ɛlɔnema bɔle Gebɛya yiale, kɛmɔ bɛyɛ ye dɛba ne ala la. Bɛhɔtetale Bɛngyamanema wɔ ɛleka mɔɔ nee Gebɛya anye bɔ zolɛ la.

³⁰

³¹Bɛngyamanema ne vile bɛ suakpole ne azo kɛ bɛkadoa Yizilayɛma bɛ nee bɛ aho. Bɛbɔle ɔ bo kɛ bɛkuhu Yizilayɛma ne wɔ ndenle mgbole ne mɔ mɔɔ kɔ Bɛtɛle nee Gebɛya la anu. Bɛhunle Yizilayɛma kɛyɛ abulasa.

³²Bɛngyamanema edwɛkɛ a le kɛ, “Yɛha bɛ yɛgua ɛbɔ nu, kɛmɔ alumua ne yɛyɛle la.” Yizilayɛma noko adwenle a le kɛ, “Bɛmaa yɛnriandi yɛmaa bɛdoa yɛ na yɛhwe bɛ yɛvi suakpole ne azo yɛhɔ ndenle mgbole ne mɔ anu.”

³³Na Yizilayɛma ne guale ndwɛlɛ aze nriandile hɔle Beeyaleteemaa. Yizilayɛma mɔɔ ɛnee ɛbu ɛzia Gebɛya la vi bɛ nzia ɛleka ne wɔ Gebɛya aduduleɛ vindele.

³⁴Yizilayɛma apenle bulu ne mɔɔ lile busia ne la hɔtetale Gebɛya. Konle ne anu yɛle ɛsesebɛ kpalɛ. Noko ɛnee Bɛngyamanema ne ɛnze kɛ bɛho bɛdɔ ala ɛne.

³⁵Ɛdɛnkɛma bɛlɛle bɛ aze wɔ Yizilayɛma anyunlu. Kenle ko ne Yizilayɛma hunle Bɛngyamanema apenle ngoko abulanwiɔ nee nnu, menli ɛya ko mɔɔ le ɛlɔnema mɔɔ ze konle nye zo kpalɛ kpalɛ la.

³⁶Akee Bɛngyamanema liele dole nu kɛ bɛho bɛdɔ bɔkɔɔ. Yizilayɛma ne guale ndwɛlɛ aze, ɔluakɛ bɛdie ɛlɔnema ne mɔɔ ɛbu ɛvea Gebɛya la anwosesebɛ ne bɛdi.

³⁷Menli ne vi nzia ɛleka ne ravole Gebɛya. Bɛkpondenle suakpole ne azo ɛleka biala na bɛhunle awie biala.

³⁸Yizilayɛ ɛlɔnema somaa ne nee ɛlɔnema mɔɔ ɛbu ɛvea Gebɛya la lile ziele kɛ saa bɛnwu kɛ esike ɛdwazo bolonwonwo wɔ suakpole ne azo a, ɛnee bɛhakyi bɛ nye bɛ nee Bɛngyaman ɛlɔnema ne ɛho. Mekɛ ne anu ɛnee Bɛngyamanema ne ɛlumua ɛhu Yizilayɛma abulasa na bɛlɛka kɛ, “Amgba yɛlɛka bɛ senle bieko, kɛmɔ yɛyɛle ye alumua konle ne anu la.”

³⁹

⁴⁰Noko mɔɔ Bɛngyamanema kado bɛ nye bɛ nzi la ɛnee esike ɛva bɛ suakpole ne na yedwazo bolonwonwo, yedwu nyamenle ne ako abo nehane.

⁴¹Akee Yizilayɛma hakyile bɛ nye. Bɛngyamanema anwo vɔle, ɔluakɛ bɛnwunle kɛ akee bɛwie wu ala ɛne.

⁴²Yemɔti bɛguale ye bɛ nzi na bɛguale ɛbɔ nu wɔ fienemgbole ne anu, noko akee bɛ nwo anza nu. Yizilayɛma ɛlɔne ne mɔɔ vi suakpole ne azo ɛlɛba la nwinwinle bɛ avinli ɛkɛ ne.

⁴³Bɛngyamanema ne dɔle donvula, na Yizilayɛma voanle bɛ ndinlizo bɛtiale bɛ dwɛɛ bɛvi Noha toonwo Gebɛya aduduleɛ lɔ.

⁴⁴Bɛngyaman ɛlɔnema apenle ngoko bulu nee mɔtwɛ ne mɔɔ ze konle nye zo kpalɛ kpalɛ la dɔle amolɛ nu.

⁴⁵Mɔɔ hale la guale ɛbɔ nu vale bɛ ti bɔle Relemɔn awolɛ ne mɔ anu lɔ wɔ fienemgbole ne anu. Nuhua apenle nnu dɔle amolɛ nu wɔ ndenle mgbole ne mɔ anu. Bɛzile bɛ zo toonwo bɛhɔdwule Gaedɔm, na bɛhunle bɛ nuhua apenle nwiɔ.

⁴⁶Yemɔti Bɛngyamanema mɔɔ dɔle amolɛ nu kenle ko ne la le apenle ngoko abulanwiɔ nee nnu. Bɛle menli mɔɔ ze konle nye zo na bɛlɛ duma kpalɛ kpalɛ a.

⁴⁷Bɛ nuhua ɛya nsia nriandile hɔle Relemɔn bodane ne azo wɔ fienemgbole ne anu lɔ, na bɛhɔdɛnlanle ɛkɛ ne siane nna.

⁴⁸Yizilayɛma ne ziale kpole Bɛngyamanema ne; bɛhunle menli nee nyɛmoa mɔɔ bɛnwunle bɛ la kɔsɔɔti na bɛtotole senle wɔ azua mɔɔ bɛnwunle bɛ la kɔsɔɔti azo.