Read Nzema Maa 21 Bible Online

Maa 21 - Nzema bible

Maa 21

¹Akee Yizilayɛma ne hanle ndane wɔ Mezepa kɛ, “Yɛ nuhua ko bɔbɔ ɛnrɛva ɔ ra raalɛ ɛnrɛmaa Bɛngyamanenli agyalɛ ɛlɛ.”

²Na menli ne rale Bɛtɛle radɛnlanle aze wɔ Nyamenle anyunlu na bɛzunle bɛyele awolɛ.

³Bɛzele kɛ, “O Ɛdɛnkɛma, Yizilayɛ Nyamenle, duzu ati yɛɛ ɛhye ɛzi a, kɛ Yizilayɛ mbusua ekpunli ekpunli ne mɔ anu ko ɛnɛ kɛvi nu a?”

⁴Aleɛ hyenle la menli ne dwazole ndɛ yɛle azukponle, bɛyelale nane bɛbɔle azu, eza bɛbɔle anzonudwolɛ azu.

⁵Na Yizilayɛma ne bizale kɛ, “Yizilayɛ mbusua ekpunli ekpunli ne boni yɛɛ amba Ɛdɛnkɛma nyianu ne bie a?” Ɔluakɛ ɛnee bɛha ndane kpole bɛdo zolɛ kɛ, awie ko biala mɔɔ amba Ɛdɛnkɛma nyianu ne bie wɔ Mezepa la, ɔwɔ kɛ bɛku ye.

⁶Na Yizilayɛma ne lile nyane wɔ bɛ mediema Bɛngyamanema ati na bɛzele kɛ, “Ɛnɛ Yizilayɛ ɛminli ye mbusua ekpunli ekpunli ne mɔ anu ko.

⁷Kɛ ɔkɛyɛ na yɛanyia mraalɛ yɛamaa bɛdabɛ mɔɔ bɛha la agya ɛ? Ɔluakɛ yɛli amonle yɛha ndane wɔ Ɛdɛnkɛma anyunlu kɛ yɛnrɛva yɛ mra mraalɛ yɛnrɛmaa bɛ agyalɛ ɛlɛ.”

⁸Na bɛbizale kɛ, “Yizilayɛ abusua ekpunli ne boni anu amra a bɛ muala bɛamba Ɛdɛnkɛma nyianu ne wɔ Mezepa a?” Na bɛnwunle kɛ awie ko bɔbɔ vi Gyeebɛhye Geleade amba nyianu ne.

⁹Mɔɔ bɛdianle menli ne mɔ la, bɛnwunle kɛ Gyeebɛhye Geleadema ko bɔbɔ amba.

¹⁰Yemɔti ɛlɔne ne mɔɔ yiale la yele bɛ nuhua apenle ngoko bulu nee nwiɔ mɔɔ anwo yɛ se kpalɛ la na bɛzele bɛ kɛ, “Bɛhɔ Gyeebɛhye Geleade, bɛhɔhu awie biala, mraalɛ nee mbɛda kɔsɔɔti.

¹¹Bɛhu mrenya ne mɔ kɔsɔɔti nee raalɛ biala mɔɔ ɛnwu nrenya la.”

¹²Bɛnyianle mbɛlɛra mɔɔ ɛtɛnwunle mrenya ɛlɛ la ɛya nna wɔ Gyeebɛhye Geleade, na bɛ nee bɛ hɔle Hyaelo mɔɔ wɔ Keena la.

¹³Akee Yizilayɛma amuala vale nrɛlaleɛ hɔmanle Bɛngyamanema mɔɔ wɔ Relemɔn bodane ne azo lɔ la kɛ bɛva bɛ nwo edwɛkɛ bɛhyɛ bɛ.

¹⁴Bɛngyamanema ziale rale sua nu. Yizilayɛma vale mraalɛ ne mɔ mɔɔ bɛangu bɛ wɔ Gyeebɛhye Geleade la manle bɛ, noko bɛ kɔsɔɔti bɛannyia bie.

¹⁵Yizilayɛma lile Bɛngyamanema anwo nyane, ɔluakɛ Ɛdɛnkɛma ɛkpakye Yizilayɛ mbusua ekpunli ekpunli ne mɔ avinli.

¹⁶Akee nyianu ne anu mgbanyima ne zele kɛ, “Bɛngyaman abusua ekpunli ɛdeɛ ne, bɛhu mraalɛ mɔɔ wɔ nu la kɔsɔɔti. Kɛ ɔkɛyɛ na yɛanyia mraalɛ yɛamaa mrenya mɔɔ ɛha la agya ɛ?”

¹⁷Na bɛzele kɛ, “Ɔwɔ kɛ bɛnyia menli di Bɛngyamanema mɔɔ ɛha la agya. Ɔnle kɛ abusua ekpunli zɔhane abo tu Yizilayɛ maanle ye anu.

¹⁸Noko akee yɛngola yɛnva yɛ mra mraalɛ yɛmmaa bɛ agyalɛ.” Ɔluakɛ Yizilayɛma ɛha ndane kɛ, “Munzule ɛha awie biala mɔɔ kɛva ɔ ra raalɛ kɛmaa Bɛngyamanenli kɛgya la.”

¹⁹Yemɔti bɛhanle kɛ, “Ɛdɛnkɛma ɛvoyia ne mɔɔ bɛdi ye wɔ Hyaelo la ɛdwu. Hyaelo wɔ Bɛtɛle sɔlɔ, wɔ Bɛtɛle nee Hyikɛm ademgbole ne aduduleɛ afoa nu wɔ Lɛbona nyiakɛ.”

²⁰Na bɛzele Bɛngyamanema kɛ, “Bɛhɔzia vanye ɛya ne mɔ anu.

²¹Saa Hyaelo mbɛlɛra ba kɛ bɛbazi agole wɔ ɛvoyialilɛ ne anu a, bɛvinde na awie biala ɛhye ko ɛva ye ɛyɛ ɔ ye, na ɔ nee ye ɛhɔ Bɛngyaman maanle nu.

²²Na saa bɛ ze mɔ anzɛɛ bɛ mediema mrenya babiza nwolɛ edwɛkɛ a, bɛbaze bɛ kɛ, ‘Bɛkponle zolɛ bɛmaa yɛ. Ɔluakɛ yɛangye bɛ donvula wɔ konle nu, yɛɛ tɛ bɛdabɛ noko yɛɛ bɛvale bɛ bɛmanle yɛ a, yemɔti bɛnli fɔlɛ.’ ”

²³Na Bɛngyamanema ne yɛle ye zɔhane. Biala nyianle raalɛ hyele ye wɔ agolezilɛ ne anu. Bɛ nee bɛ ziale hɔle bɛ azua ne mɔ azo; bɛhɔkyekyele bɛ azua ne mɔ na bɛdɛnlanle aze.

²⁴Mekɛ ne anu Yizilayɛma ne noko ziale hɔle hɔbokale bɛ mbusua ekpunli ekpunli ne mɔ nee bɛ sua nu amra anwo, na bɛhɔle bɛ gyima zo.

²⁵ Mekɛ ne anu ɛnee belemgbunli biala ɛnle Yizilayɛ maanle ne anu; awie biala bɔle ɛbɛla biala mɔɔ ɔdaye ɔkulo la.