Read Nzema Maa 3 Bible Online

Maa 3 - Nzema bible

Maa 3

¹Ɛdɛnkɛma manle maanle maanle bie mɔ hale azɛlɛ ne azo, amaa yeava bɛ yeazɔ Yizilayɛma mɔɔ ɛtɛnwunle konle ɛlɛ wɔ Keena la yeanlea.

²Ɔyɛle ɛhye kɛ ɔfa yeahile Yizilayɛma awolɛndoazo ne mɔ konle deɛ holɛ, na bɛdabɛ mɔɔ bɛtɛnwunle konle ɛlɛ la anwu kɛ konle si de la.

³Maanle maanle ne mɔ ɛne: Filisitia arelemgbunli nnu ne, Keenama amuala, Saedɛnema, yɛɛ Haevaema mɔɔ gua Lɛbanɔn Boka ne azo la, ɔvi Beeyale Hɛmɔn Boka toonwo mɔɔ kɔdwu Heemate Ademgbolezo la.

⁴Ɛdɛnkɛma yɛle ɛhye mɔ amuala kɛ ɔfa yeazɔ Yizilayɛma yeanlea saa bɛkɛli mɛla ne mɔ mɔɔ ɔluale Mosisi anwo zo ɔvale ɔmanle bɛ ze mɔ la azo a.

⁵Yemɔti Yizilayɛma nee Keenama, Hɛtema, Amɔlema, Pɛlɛzema, Haevaema, yɛɛ Gyibɛsema dɛnlanle,

⁶na bɛgyale menli ne mɔ amra mraalɛ, na bɛdabɛ noko bɛvale bɛ mra mraalɛ bɛmanle menli ne mɔ amra mrenya gyale bɛ; na Yizilayɛma zonlenle menli ne mɔ nyamenle ne mɔ.

⁷Yizilayɛma arɛle vile Ɛdɛnkɛma bɛ Nyamenle ne. Bɛbɔle munzule ɛbɛla bɛtiale Ɛdɛnkɛma na bɛzonlenle awozonle Beeyale nee Ahyela ananze ne mɔ.

⁸Yemɔti Ɛdɛnkɛma vale Yizilayɛma anwo ɛya kpole kpalɛ. Ɔsɛmanle bɛ ɔwulale Kuhyan Relehyateeyem, mɔɔ le Mɛsɔpɔteemea belemgbunli ne asa anu. Na Yizilayɛma zonlenle Kuhyan Relehyateeyem toonwo ɛvolɛ mɔtwɛ.

⁹Na Yizilayɛma zunle vɛlɛle Ɛdɛnkɛma, na Ɛdɛnkɛma yele Kinaze ara Ɔteneɛle, mɔɔ le Kalɛbe adiema kakula la manle ɔliele bɛ.

¹⁰Ɛdɛnkɛma Sunsum ne dwule Ɔteneɛle anwo zo, na ɔholale ɔziele Yizilayɛma. Ɔvale konle ɔdoale Kuhyan Relehyateeyem, na Ɛdɛnkɛma yele Kuhyan Relehyateeyem, mɔɔ le Mɛsɔpɔteemea belemgbunli ne manle ye na ɔlile ɔ nwo zo konim.

¹¹Na akee anzonudwolɛ rale maanle ne anu ɛvolɛ abulanla. Na Kinaze ara Ɔteneɛle wule.

¹²Yizilayɛma ɛtane mɔɔ yɛle la akee bole zolɛ wɔ Ɛdɛnkɛma anyunlu. Zɔhane ati Ɛdɛnkɛma kpogyale Mowabe Belemgbunli Ɛgelɔn asa zo.

¹³Ɛgelɔn nee Amɔnoma nee Amalɛkema bɔle nu na bɛvale konle bɛdoale Yizilayɛma, bɛhanle bɛ senle dwɛɛ, na bɛvale Gyɛleko mɔɔ ɛkɛ ne le mrɛlɛ nee mrelehyia ngome la.

¹⁴Na Yizilayɛma zonlenle Mowabe Belemgbunli Ɛgelɔn ɛvolɛ bulu nee mɔtwɛ.

¹⁵Yizilayɛma zunle vɛlɛle Ɛdɛnkɛma. Na Ɛdɛnkɛma yele Yihɛde, mɔɔ le Gila ara nrenya ne mɔɔ asa le bɛne, mɔɔ vi Bɛngyaman abusua ekpunli ne anu la manle ɔliele bɛ. Yizilayɛma duale adwule manle Yihɛde kɛ ɔva ɔhɔmaa Mowabe Belemgbunli Ɛgelɔn.

¹⁶Yihɛde bɔle dadeɛ anye nwiɔ, mɔɔ ye tendenle kɛyɛ mita foa ko la, na ɔvale ɔkyekyele ye ɛzɔlɛ fema ne anwo na ɔwulale ye tɛladeɛ ne ɔguale zolɛ.

¹⁷Akee ɔvale adwule ne ɔhɔmanle Mowabe Belemgbunli Ɛgelɔn. Ɛgelɔn le sonla belane kpalɛ.

¹⁸Mɔɔ Yihɛde vale adwule anzɛɛ ahyɛlɛdeɛ ne manle ye la, ɔmanle menli mɔɔ zoale ninyɛne ne rale la ziale bɛ nzi hɔle.

¹⁹Na yemɔ ɔvale ɔ ti ɔbɔle ɛleka mɔɔ bɛse awolɛ ananze ne mɔ la. Ɛkɛ ne bikye Gelegale. Na Yihɛde eza ziale ɔ nzi hɔle Belemgbunli Ɛgelɔn ɛkɛ ne ɔhɔzele ye kɛ, “ Nana, maa menga wɔ nrɛlaleɛ bie mɔɔ ɔnle kɛ awie te bie la mengile wɔ.” Belemgbunli ne zele ye sonvolɛma ne mɔ kɛ, “Bɛvinde bɛmaa ɔha yɛ ngome.” Na bɛ muala bɛvindele.

²⁰Akee ɔhale belemgbunli ne angome wɔ ye ekpumgbunli ɛdeɛ ne anu. Ye ekpumgbunli ɛdeɛ ne wɔ sua ne ati zo, na ɛkɛ ne le fɔɔnwo zɛhae. Yihɛde hɔle ɔ nwo ɛkɛ hɔzele ye kɛ, “Melɛ Nyamenle nrɛlaleɛ melɛbɛlɛ wɔ.” Belemgbunli ne vi ye ebia ne anu dwazole,

²¹na Yihɛde nee ye yɛle kyɛlɛ, na ɔvale ɔ sa bɛne ɔhwenle dadeɛ ne wɔ ye ɛzɔlɛ nwo ɔwɔle belemgbunli ne akunlu.

²²Dadeɛ ne nee ye fia ne amuala wolole ɔ kunlu; yeandwe dadeɛ ne, na nwonane ne mɔɔ ɛyɛ ɛnlome ngome la vole zolɛ. Dadeɛ ne ati vindele ye ɛzɔlɛ avinli wɔ ɔ nzi.

²³Yihɛde akee vindele; ɔtotole anwuma ekpumgbunli ne nlenkɛ ne mɔ kɔsɔɔti anu,

²⁴na ɔhɔle. Nzinlii belemgbunli ne sonvolɛma ne rale, na mɔɔ bɛnwunle kɛ bɛtoto nlenkɛ ne mɔ anu la bɛdwenlenle kɛ, “Kabezɛ ɔlɛsɔho ɔ gyakɛ.”

²⁵Akee bɛzule bɛ sa toonwo ɔhɔdwule mekɛ mɔɔ bɛnea a kabezɛ yewie na yevinde la, na bɛhɔdukuedukuele nlenkɛ ne mɔ. Na nea, belemgbunli ne a la azɛlɛ ne anwo la; yewu!

²⁶Mekɛ mɔɔ bɛlɛkendɛ bɛamaa belemgbunli ne avinde la ɛnee Yihɛde ɛhɔ dɛbadɛba; yepɛ nu ɛleka mɔɔ awolɛ ananze ne mɔ wɔ la, yenriandi yehɔ Siayela.

²⁷Mɔɔ ɔdwule sua ne mɔɔ gua Yifelaem awoka ne mɔ azo la azo la, ɔwule aweɛne nu na Yizilayɛma vindele doale ye na ɔvale bɛ ɔdule ɔdenrɛle kɛ bɛkɔ konle.

²⁸Ɔzele bɛ kɛ, “Bɛdoa me, ɔluakɛ Ɛdɛnkɛma ɛye bɛ kpɔvolɛma, mɔɔ le Mowabema ne ɛmaa bɛ.” Yemɔti bɛ nee ye hɔle bɛhɔduale Mowabema adenle wɔ Dwɔdan ne anloa ɛleka mɔɔ bɛkola bɛwudwu bɛpɛ la. Bɛammaa awie ko bɔbɔ ampɛ nu.

²⁹Bɛhunle Mowabema mɔɔ anwo yɛ se la kɛyɛ apenle bulu; kokye bɔbɔ anvi bɛ sa.

³⁰Kenle ko zɔhane Yizilayɛma lile Mowabema anwo zo konim. Na anzonudwolɛ rale maanle ne anu ɛvolɛ abulatwɛ.

³¹Sonla bieko mɔɔ dwazole Yihɛde anzi lile Yizilayɛma ati la a le Enate ara Hyamega. Ɔdaye noko ɔvale baka mɔɔ bɛfa bɛka nlankɛ la ɔhonle ɔhunle Filisitiama ɛya nsia na ɔliele Yizilayɛma.