Read Nzema Maa 4 Bible Online

Maa 4 - Nzema bible

Maa 4

¹Yihɛde ewule ne anzi, Yizilayɛma bɔle bɛ munzule ɛbɛla ne bieko tiale Ɛdɛnkɛma.

²Ɛdɛnkɛma yele bɛ manle Gyeeben mɔɔ le Keena belemgbunli ne mɔɔ di ebia wɔ Heezɔ la. Safohyenlema Kpanyinli mɔɔ ɛnee nea belemgbunli ne ɛlɔnema ne anwo zo la bɛfɛlɛ ye Sesɛla; ɔdɛnlanle Halohyɛte, mɔɔ wɔ menli mɔɔ ɛnle Dwuuma la maanle nu la.

³Na Yizilayɛma zunle vɛlɛle Ɛdɛnkɛma, ɔluakɛ Sesɛla lɛ mbulalɛ ehwili mɔɔ bɛfa bɛko la ɛya ngɔnla, na ɔvale ɔhilele Yizilayɛma nyane toonwo ɛvolɛ abulanwiɔ.

⁴Mekɛ ne anu ɛnee Nyamenle kpɔmanvolɛ raalɛ bie mɔɔ bɛfɛlɛ ye Dɛbola mɔɔ ɔ hu bɛfɛlɛ ye Lapedo la a le Yizilayɛma ndɛnebuavolɛ a.

⁵Ɔta ɔtɛnla “Dɛbola” arɛlɛ bo. Arɛlɛ zɔhane gyi Releema nee Bɛtɛle mɔɔ gua Yifelaem awoka ne mɔ azo la avinli. Ɛkɛ ne yɛɛ saa Yizilayɛma bie mɔ nyia edwɛkɛ a bɛkɔ bɛmaa ɔsiezie ɔmaa bɛ a.

⁶Kenle ko ɔzoanle ɔmanle bɛhɔvɛlɛle Abenoam mɔɔ vi Kidɛhye mɔɔ wɔ Nafetalae la ara nrenya Balake na ɔzele ye kɛ, “Ɛdɛnkɛma, Yizilayɛ Nyamenle ne se menze wɔ kɛ, ‘Kɔ kɔboɔboa wɔ ɛlɔnema ne anloa wɔ Teebɔ Boka ne azo. Ye menli apenle bulu fi Nafetalae nee Zɛbulɛn mbusua ekpunli ne mɔ anu.

⁷Na mebamaa Safohyenlema Kpanyinli Sesɛla, mɔɔ nea Gyeeben ɛlɔnema ne azo la ava ye ɛlɔnema nee ye konle mbulalɛ ehwili ne mɔ arayia wɔ azule Kaehyɔn ne anloa na meamaa wɔali ɔ nwo zo konim.’ ”

⁸Balake buale ye kɛ, “Saa ɛ nee me kɛhɔ ɛdeɛ a, menwɔhɔ, na saa ɛ nee me ɛnrɛhɔ ɛdeɛ a, menrɛhɔ.”

⁹Dɛbola zele ye kɛ, “Me nee wɔ kɛhɔ; noko akee, ɛnrɛnyia ɛ nyunlu wɔ konimlilɛ ne anzi, ɔluakɛ Ɛdɛnkɛma baye Sesɛla amaa raalɛzinli.” Na Dɛbola dwazole na ɔ nee Balake hɔle Kidɛhye.

¹⁰Balake vɛlɛle Zɛbulɛn nee Nafetalae mbusua ekpunli ne mɔ anu amra menli apenle bulu na ɔvale bɛ ɔlile ɔ nzi ɔrale Kidɛhye. Dɛbola nee ye a hɔle a.

¹¹Mekɛ ne anu ɛnee Kinanli Hiba nee Kinama mɔɔ ɛha la avinli ɛtete, na yehɔbɔ ye nzeseɛ wɔ moa moa, baka kpole bie mɔɔ gyi Zeenanem, mɔɔ zua Kidɛhye la abo. Kinama le Hobabe, mɔɔ le Mosisi aye ne adiema nrenya la abo zo amra.

¹²Mɔɔ Sesɛla dele kɛ Abenoam ara Balake ɛboɔboa ɛlɔnema anloa wɔ Teebɔ Boka ne azo la,

¹³ɔvale ye konle mbulalɛ ehwili ɛya ngɔnla ne nee ye ɛlɔnema kɔsɔɔti mɔɔ wɔ Halohyɛte, mɔɔ wɔ bɛdabɛ mɔɔ bɛnle Dwuuma la maanle nu la, na ɔ nee bɛ rale azule Kaehyɔn ne anloa.

¹⁴Na Dɛbola zele Balake kɛ, “Bɛdwazo bɛhɔ, ɔluakɛ ɛnɛ kenle ye, Ɛdɛnkɛma ɛye Sesɛla ɛmaa bɛ. Ɛdɛnkɛma li bɛ nyunlu.” Zɔhane ati Balake vale ye ɛlɔnema apenle bulu ne lile ɔ nzi vi Teebɔ Boka ne azo tolole rale aze.

¹⁵Na Ɛdɛnkɛma manle Balake hanle Sesɛla nee ye ɛlɔnema nee ye konle mbulalɛ ehwili ne mɔ senle dwɛɛ, na bɛhunle bɛ bie mɔ. Sesɛla vi ye konle mbulalɛ ehwili ɛdeɛ ne anu dwule na ɔvale ɔ gyakɛ ɔzɔle zolɛ.

¹⁶Balake voanle Sesɛla ɛlɔnema ne nee konle mbulalɛ ehwili ne mɔ ndinlizo toonwo ɔhɔdwule Halohyɛte, mɔɔ wɔ bɛdabɛ mɔɔ bɛnle Dwuuma la maanle nu la, na bɛ kɔsɔɔti bɛzenle ye dadeɛ ne anloa; sonla ko bɔbɔ anga.

¹⁷Sesɛla guale ndwɛlɛ aze la, ɔvale ɔ ti ɔbɔle Kinanli Hibɛ aye Gyeeyɛle ndanlɛ sua ne anwo, ɔluakɛ ɛnee anzonudwolɛ wɔ Heezɔ Belemgbunli Gyeeben nee Kinanli Hibɛ awuke nu amra avinli.

¹⁸Gyeeyɛle vindele yiale Sesɛla na ɔzele ye kɛ, “Yɛmenle, mmasulo, bɛla; bawolo me ndanlɛ sua ye anu.” Amgba Sesɛla hɔwolole sua ne anu, na Gyeeyɛle vale ndanlɛ hedale ɔ nwo zo.

¹⁹Sesɛla zele Gyeeyɛle kɛ, “Mesɛlɛ wɔ, nzuhɔne ɛlɛku me! Maa me nzule ekyi meno.” Na Gyeeyɛle dule meleke nwoma kodoku ko azo manle ɔnlonle, na eza ɔhedale ɔ nwo zo bieko.

²⁰Sesɛla zele Gyeeyɛle kɛ, “Gyinla ndanlɛ sua ne anlenkɛ ne anloa. Saa awie biala babiza kɛ, ‘Awie wɔ ɛke ɔ?’ a, se ye kɛ, ‘Kyɛkyɛ.’ ”

²¹Ɛvɛlɛ ngome manle Sesɛla lafele botoo zɛhae. Na Hibɛ aye Gyeeyɛle vale ndanlɛ sua mbaka adakola ne mɔ ko nee hamenle, ɔyɛle nyaa ɔvale Sesɛla ati ɔdole aze bɛtɛɛ, na ɔbɔle ye takola nu kyengye ɔbetanle azɛlɛ ne anwo. Na Sesɛla wule.

²²Mɔɔ Balake lɛ ɛnriandilɛ ɛlɛkpondɛ Sesɛla la, Gyeeyɛle yiale ye na ɔzele ye kɛ, “Bɛla, ahenle mɔɔ ɛkpondɛ ye la, mebahile wɔ.” Balake hɔle Gyeeyɛle ndanlɛ sua ne anu, na ɔnwunle kɛ Sesɛla ɛwu, na takola lɛ ye ketekete beta azɛlɛ ne anwo.

²³Kenle zɔhane Nyamenle manle Yizilayɛma lile Keena Belemgbunli Gyeeben anwo zo konim.

²⁴Yizilayɛma asa homonle Keena Belemgbunli Gyeeben anwo zo toonwo hɔkpulale kɛ bɛhunle ɔdaye noko la.