Read Nzema Maa 5 Bible Online

Maa 5 - Nzema bible

Maa 5

¹Akee Dɛbola nee Abenoam ara nrenya Balake dole edwɛne ɛhye kenle ko ne:

²Bɛye Ɛdɛnkɛma ayɛlɛ! Yizilayɛ mgbanyima dele bɛ kunlu, menli ne yeyele bɛ kunlu honle.

³Bɛmɛ arelemgbunli, bɛdie! Bɛmɛ maanle mgbanyima, bɛgyele bɛ nzo. Mebado edwɛne, meabɔ agole meamaa Yizilayɛma Nyamenle ne.

⁴Ɛdɛnkɛma, mekɛ mɔɔ ɛvile Siyɛ, na ɛyele ɛ nwo Yidɔm azɛlɛ zo la, azɛlɛ kpusule, ezule dɔle, yɛɛ ezule vi amungu ne anu zonyinle.

⁵ Awoka ne mɔ kpusule wɔ Saenae Ɛdɛnkɛma, Yizilayɛ Nyamenle ne anyunlu.

⁶Anate ara Hyamega mekɛ zo, Gyeeyɛle mekɛ zo, adendulɛma kpole ademgbole, bɛbule ahane ahane.

⁷Yizilayɛma amuala guale ɛbɔ nu, azua kɔsɔɔti dɔle mgbane, hɔkpulale kɛ Dɛbola dwazole kɛ Yizilayɛ ɔ nli.

⁸Yizilayɛma nyianle bɛ nyamenle gyɛne la yɛɛ konle vale bɛ aze a. Ɛlɔnema apenle apenle abulanla, nuhua ko bɔbɔ anva enyinlike na yeayɛ atwɛ.

⁹Me ahonle la Yizilayɛ safohyenlema anwo, bɛmɛ a bɛdule bɛ nwo bɛmanle menli ne a. Ayɛlɛyelɛ ɛha Ɛdɛnkɛma.

¹⁰Bɛmɛ mɔɔ bɛtɛnla asoaso fufule zo, na bɛtɛnla asoaso mbia fondonloo zo, nee bɛmɛ mɔɔ bɛdua aze la, bɛbɔ nolo!

¹¹Bɛdie edwɛne mɔɔ bɛlɛto ye bula ne mɔ azo, bɛlɛka Ɛdɛnkɛma konimlilɛ nwo edwɛkɛ, Yizilayɛ ɛlɔnema konimlilɛ nwo edwɛkɛ ɔ. Akee Ɛdɛnkɛma menli ne to ɛlɔnwɔne tia kilikili kɔ bɛ sua zo nlenkɛ mgbole nloa.

¹²Dwazo, Dɛbola, dwazo! Dwazo na kpakye ɛ ne nu to edwɛne! Dwazo, Abenoam ara Balake, fa wɔ menli ne mɔɔ wɔhye bɛ nuokɛ la kɔ.

¹³Akɛnrasesebɛma dwazole ye mrenya zo, Ɛdɛnkɛma menli ne diale ye mrenya zo, kɛ bɛ nee katakyie ne kaho.

¹⁴Bɛvi Yifelaem bɛrale bɔnza ne anu, bɛdoale wɔmɔ Bɛngyaman nee ɛ nwo amra, safohyenle mgbanyinli vi Meekɛ rale, yɛɛ Zɛbulɛn konle nu mgbanyima rale.

¹⁵Yesakaa mgbanyima nee Dɛbola rale, na Yesakaa lile nɔhalɛ manle Balake. Bɛ muala bɛlile ɔ nzi bɛhɔle bɔnza ne anu. Noko Wulubɛn abusua ekpunli ne lile abunwiɔ, bɛangola bɛambɔ kpɔkɛ kɛ bɛkɛhɔ.

¹⁶Duzu ati a bɛ nee mboane ne mɔ hale amozi a? Bɛtie mboaneneavolɛma mɔɔ ɛlɛfɛlɛ bɛ mboane la ɔ? Wulubɛn abusua ekpunli ne ɛli abunwiɔ, bɛangola bɛanzi kpɔkɛ kɛ bɛkɛhɔ.

¹⁷Gaade abusua ekpunli ne dɛnlanle Dwɔdan Aduduleɛ, Dan abusua ekpunli ne hale nyevile ne anloa, Ahya abusua ekpunli ne noko dɛnlanle ɛnwea ne anloa, na bɛhale nyevile ne anloa.

¹⁸Na Zɛbulɛn abusua ekpunli ne vale bɛ ngoane dole nzeleba, Nafetalae abusua ekpunli ne yɛle zɔhane ala wɔ konle ne anu.

¹⁹Arelemgbunli rale rahonle; Keena arelemgbunli honle wɔ Teeyanake, wɔ Mɛgedo azule ne anloa; noko dwɛtɛ fufule ɔ, bɛannyia bie.

²⁰Anwuma nwɔlɔra honle, bɛlua anwomanyunlu nehane la, ɛnee bɛ nee Sesɛla ɛlɛko.

²¹Kaehyɔn azuyilɛ ne pianle bɛ hɔle, Azule Kaehyɔn ɔ, ye ɛzenlɛ nu yɛ se. Akee mebava anwosesebɛ meaho meahɔ me nyunlu.

²²Akee mgbɔnwɔ ne mɔ lɛ ɛnriandilɛ rale, bɛsisi bɛ ndwɛlɛ aze zɛhae ala.

²³Ɛdɛnkɛma soanvolɛ ne zele ɔ, “Abule ɛbu Milɔzo, abule ɛbu menli mɔɔ wɔ zo, ɔboalekɛ bɛambamboa Ɛdɛnkɛma, bɛambamboa Ɛdɛnkɛma bɛantia katakyiema.”

²⁴Nyilalɛ ɛha Gyeeyɛle ɛdɛla mraalɛ kɔsɔɔti, Kinanli Hibɛ aye ne. Nyilalɛ ɛha ye ɛdɛla mraalɛ mɔɔ de ndanlɛ azua nu la.

²⁵Sesɛla zɛlɛle nzule, na Gyeeyɛle manle ye meleke. Ɔmanle ye meleke kpalɛ wɔ dwora kɛnlɛma nu.

²⁶Ɔdole ɔ sa ɔvale ndanlɛ sua takola, ɔvale hamenle ɔ sa fema nu; ɔbɔle takola ne ɔmianle Sesɛla ati, ɔgelegelele ɔ ti, ɔbɛtɛle ɔ nwoma.

²⁷Sesɛla anwo golole ye, ɔdɔle aze, ɔlale kɛnlanana wɔ Gyeeyɛle agyakɛ anu. Ɔgolole ɔguale Gyeeyɛle agyakɛ anu, ɔgolole ɔguale, ɔwule.

²⁸Sesɛla ɔ nli nleanle nvɛnzɛlɛ nu, ɔgyinlanle nvɛnzɛlɛ ne anzi ɔbizale kɛ, “Duzu ati a ye konle ehwili ne mɔ ɛhyɛ zɛhae ɛ? Duzu ati a yɛnde ye konle ehwili ne mgbɔnwɔ ne mɔ nganeɛ ɛ?”

²⁹Ye mraalɛ mgbanyima ne buale ye, ɔdaye mumua ne ɔzele ɔ nwo kɛ,

³⁰“Kabezɛ tɛ anwonyia a bɛkpondɛ bɛahyɛ bɛamaa bɛ nwo a, nrenya ko raalɛ ko anzɛɛ nrenya ko mraalɛ nwiɔ. Ndanlɛ mɔɔ sonle bolɛ mɔɔ bɛkpondɛ bɛamaa Sesɛla, nee me kɔme zo aguzo ngɛnlɛma nwiɔ mɔɔ bɛkpondɛ bɛarɛlɛ me.”

³¹O Ɛdɛnkɛma, maa menli mɔɔ kpɔ wɔ la abo zo ɛbɔ, na maa bɛdabɛ mɔɔ bɛkulo wɔ la ɛda wienyi kɛ mangyee sɛnzɛne. Na anzonudwolɛ rale maanle ne anu ɛvolɛ abulanla.