Read Nzema Maa 6 Bible Online

Maa 6 - Nzema bible

Maa 6

¹Yizilayɛma eza yɛle ɛtane tiale Ɛdɛnkɛma, na Ɛdɛnkɛma manle Medeanema ziele bɛ ɛvolɛ nsuu.

²Medeanema asa homonle Yizilayɛma anwo zo kpalɛ. Yizilayɛma zulole Medeanema manle ɔhɔdwule kɛ bɛhyele bɛ nwo ɛhane, bɛsisile ɛvealeka dɔɔnwo wɔ awoka ne mɔ azo, na bɛvunvunle mbɔne wɔ awolɛ nu bɛveale nu.

³Ɔluakɛ mekɛ biala mɔɔ Yizilayɛma kɛlua aleɛ na ɔkɛyɛ kpalɛ la, ɛnee Medeanema nee Amalɛkema nee Aduduleɛ ɛsɛlɛ ne azo amra ɛva konle ɛdoa bɛ.

⁴Bɛbɔ bɛ nwo atɛnlase wɔ ɛya ne mɔ anu na bɛsɛkye debie biala toonwo bɛkɔkpula Gaza. Bɛfa nuhua debie biala, nlankɛ, mboane, yɛɛ asoaso, na bɛmaa ɔka Yizilayɛma ne kpoholokpo.

⁵Ɔluakɛ saa bɛse kɛ bɛba a bɛfa bɛ nlankɛ nee ndanlɛ azua a bɛba a. Bɛ somaa maa bɛyɛ menyemenye kɛ abɛbɛ la. Menli nee afunlumu mɔɔ kɛra maanle ne anu la, awie ɛngola bɛ tia. Saa bɛba a bɛsɛkye debie biala mɔɔ wɔ ɛya ne mɔ anu la.

⁶Yizilayɛma ɛnnyia gyinlagyakɛ wɔ Medeanema anyunlu. Zɔhane ati bɛzunle bɛvɛlɛle Ɛdɛnkɛma kɛ ɔboa bɛ.

⁷Mɔɔ Yizilayɛma zunle vɛlɛle Ɛdɛnkɛma kɛ ɔboa bɛ, ɔlie bɛ wɔ Medeanema asa anu la,

⁸Ɛdɛnkɛma manle ye kpɔmanvolɛ vale ye nrɛlaleɛ rɛlɛle bɛ kɛ, “Kɛ Ɛdɛnkɛma mɔɔ le Yizilayɛma Nyamenle ne se la ɛne: Menyele bɛ menvile akɛlɛzonlenlɛ nu na menvale bɛ menvile Yigyibiti.

⁹Menliele bɛ menvile Yigyibitima nee menli mɔɔ sisile bɛ la asa anu, na mendule bɛ, menvale bɛ azɛlɛ ne memanle bɛ.

¹⁰Na menzele bɛ kɛ, ‘Mame a mele Ɛdɛnkɛma bɛ Nyamenle ne a, bɛmmasonle Amɔlema nyamenle ne mɔ biala.’ Noko bɛandie me ne.”

¹¹Na Ɛdɛnkɛma soanvolɛ radɛnlanle baka kpole bie abo wɔ Ɔfela. Baka ɛhye le Dwowahye, mɔɔ le Ebayizɛ abo zo amra ne mɔ bie la ɛdeɛ. Mekɛ ne anu ɛnee Ebayizɛ ara Gedɛyɔn vea nwanyeyɛlɛ sua ne anu ɛlɛwozo atoko.

¹²Na Ɛdɛnkɛma soanvolɛ ne yele ɔ nwo hilele ye na ɔzele ye kɛ, “Nrenya katakyie, Ɛdɛnkɛma nee wɔ lua.”

¹³Gedɛyɔn zele ye kɛ, “Yɛmenle, mesɛlɛ wɔ, saa Ɛdɛnkɛma nee yɛ a lua a ɛnee duzu ati a ɛhye mɔ kɔsɔɔti ɛsisi yɛ nwo zo a? Ye nwanwane nyɛleɛ ne mɔ mɔɔ egya mɔ hanle nwolɛ edwɛkɛ hilele yɛ kɛ Ɛdɛnkɛma a yele bɛ vile Yigyibiti la wɔ nienwu? Kɛkala Ɛdɛnkɛma ɛkpo yɛ na yeye yɛ yemaa Medeanema.”

¹⁴Na Ɛdɛnkɛma soanvolɛ ne hakyile ɔ nye zele ye kɛ, “Anwosesebɛ totohyia ɛhye mɔɔ kɛkala wɔnyia ye la, fa kɔ kɔlie Yizilayɛma fi Medeanema asa anu. Mame medame a mezoa wɔ a.”

¹⁵Na Gedɛyɔn buale ye kɛ, “Awulae, mesɛlɛ wɔ, kɛ menwɔzi menwɔyɛ na mealie Yizilayɛma ɛ? Nea, wɔ Manasɛ abusua ekpunli ne anu, me nlenya mɔ ala a ɛnle awie a, yɛɛ wɔ egya sua nu, medame ala a mele ekyi kpalɛ a.”

¹⁶Na Ɛdɛnkɛma soanvolɛ ne zele ye kɛ, “Me nee wɔ bahɔ. Ɛbahu Medeanema kɔsɔɔti kɛ asɛɛ bɛle sonla kokye ala.”

¹⁷Na Gedɛyɔn zele ye kɛ, “Saa mezɔ ɛ nye ɛdeɛ a, ɛnee kile sɛkɛlɛneɛ kɛ amgba ɛdawɔ yɛɛ ɛ nee me ɛlɛtendɛ la.

¹⁸Mesɛlɛ wɔ, mmafi ɛke ɛkɔ, kɔkpula mekɛ mɔɔ menwɔva me aleɛ ahyɛlɛdeɛ menwɔrɛlɛ wɔ la.” Ɛdɛnkɛma soanvolɛ ne zele ye kɛ, “Mebahendɛ toonwo kɔkpula mekɛ mɔɔ ɛkɛzia ɛkɛra la.”

¹⁹Na Gedɛyɔn hɔle sua nu hɔhunle abɔnkye donle subue; ɔvale esamo ɔdonle kpanwo mɔɔ mgbɔvonle ɛnle nu la. Ɔyeyele nane ne ɔguale kɛndɛne nu na ɔvale subue ne ɔguale siase nu, na ɔvale ɔhɔmanle Ɛdɛnkɛma soanvolɛ ne mɔɔ de baka ne abo la.

²⁰Na Nyamenle soanvolɛ ne zele ye kɛ, “Yeye nane ne nee kpanwo ne gua bolɛ ɛhye azo, na wola subue ne gua zolɛ.” Na Gedɛyɔn yɛle ye zɔhane.

²¹Akee Ɛdɛnkɛma soanvolɛ ne vale ye kpɔma ne mɔɔ ɔlɛ la ati hanle nane ne nee kpanwo ne, na senle vi bolɛ ne anu zɔle yelale nane ne nee kpanwo ne. Na Ɛdɛnkɛma soanvolɛ ne minliminlinle ɔ nye zo.

²²Akee Gedɛyɔn liele lile kɛ amgba Ɛdɛnkɛma soanvolɛ ɔ, na ɔzele kɛ, “O, Awulae Nyamenle! Me nee Ɛdɛnkɛma soanvolɛ yɛ nye ɛyɛ nna.”

²³Na Ɛdɛnkɛma zele ye kɛ, “Ka wɔ ahonle to azule nu. Mmasulo, na ɛnrɛwu.”

²⁴Akee Gedɛyɔn yɛle azukponle manle Ɛdɛnkɛma na ɔvɛlɛle ye “Ɛdɛnkɛma le anzonudwolɛ.” Na ɛnɛ nee ɛnɛ ala, ɔtɛgyi Ɔfela. Ɔfela le Ebayizɛma sua zo.

²⁵Kenle ko ne nɔe ne Ɛdɛnkɛma zele Gedɛyɔn kɛ, “Fa ɛ ze ɛnlankɛ nyinli ne mɔɔ tɔ zolɛ nwiɔ mɔɔ ɛli ɛvolɛ nsuu la, bubu ɛ ze mɔ azukponle ne mɔɔ bɛzile bɛmanle Beeyale la, na pɛ bozonle raalɛ Ahyela sɛkɛlɛneɛ baka ne mɔɔ gyi nwolɛ la to.

²⁶Akee fa awolɛ siezie bɛ gyɛlɛɛnye na si azukponle wɔ ezukue ɛhye azo maa Ɛdɛnkɛma wɔ Nyamenle ne. Fa Ahyela baka ne mɔɔ ɛbapɛ la wuda senle na yela ɛnlankɛ nyinli ne fa bɔ azu maa Ɛdɛnkɛma.”

²⁷Zɔhane ati Gedɛyɔn yele ye sonvolɛma ne mɔ anu bulu manle bɛyɛle, kɛmɔ Ɛdɛnkɛma zele ye la; noko kɛmɔ ɛnee ɔsulo ye sua nu amra ne nee ezuavolɛ ne somasoma la ati, kɛ ɔkɛbɔ azu ne ewiazo la, ɔbɔle ye nɔɔzo.

²⁸Nwonlomɔ mangyee ne mɔɔ ezuavolɛ ne vi nla nu dwazole la, bɛnwunle kɛ bɛbubu Beeyale azukponle ne, bɛpɛ Ahyela baka ne mɔɔ gyi nwolɛ la, na bɛva ɛnlankɛ ne mɔɔ tɔ zolɛ nwiɔ ne la bɛbɔ azu wɔ azukponle ne mɔɔ bɛzi la azo.

²⁹Na bɛbizebizale bɛ nwo ngoko kɛ, “Ɛnee nwane yɛɛ ɛli gyima zɛhae a?” Bɛbizebizale dedee la, bɛdele kɛ Dwowahye ara Gedɛyɔn yɛɛ ɛli gyima mɔɔ le zɛhae la.

³⁰Ezuavolɛ ne zele Dwowahye kɛ, “Fa ɛ ra nrenya ne finde maa yɛhu ye, ɔluakɛ yebubu Beeyale azukponle ne na eza yepɛ Ahyela baka ne mɔɔ gyi nwolɛ la.”

³¹Na Dwowahye zele menli ne mɔɔ ɛra ɔ nwo zo la kɛ, “Bɛbagyinla Beeyale agyakɛ anu ɔ? Anzɛɛ bɛbalie ɔ ti ɔ? Awie biala mɔɔ kɛzi ye ɛbolɛ kɛ ɔdie Beeyale ati la bɛbahu ye na aleɛ ahye. Bɛbubu Beeyale azukponle ne, saa ɔle nyamenle a, bɛmaa ɔdaye ɔlie ɔ nwo.”

³²Ɛhye ati ɔvi kenle ko zɔhane bɛdonle Gedɛyɔn, Gyɛlɛbeeyale[3], ɔboalekɛ Dwowahye zele kɛ, “Bɛmaa Beeyale ɛho ɛmaa ɔ nwo”, kɛmɔ Gedɛyɔn ɛbubu ye azukponle ne ɛgua la.

³³Akee Medeanema nee Amalɛkema nee Aduduleɛ ɛsɛlɛ zo amra ne mɔ amuala boɔboale bɛ nloa, bɛpɛle Azule Dwɔdan ne, na bɛyɛle bɛ azokoɛleɛ wɔ Gyɛzɛli Bɔnza ne anu.

³⁴Na Ɛdɛnkɛma Sunsum ne dwule Gedɛyɔn anwo zo. Ɔwule aweɛne nu na Ebayizɛma kɔsɔɔti dwazole doale ye.

³⁵Ɔzoanle menli wɔ Manasɛ, na bɛ kɔsɔɔti bɛralile ɔ nzi. Eza ɔzoanle menli wɔ Ahya, Zɛbulɛn, yɛɛ Nafetalae, na bɛ kɔsɔɔti bɛbɔle nu bɛ nee ye hɔyiale.

³⁶Na Gedɛyɔn hanle hilele Nyamenle kɛ, “Saa ɛse ɛdua me nwo zo wɔalie Yizilayɛma amgba a,

³⁷ɛnee melɛfa dwɛsɛ meagua ɛleka mɔɔ bɛwozo ma ne la. Saa aleɛ kye na ɛbɔlɛ wɔ dwɛsɛ ne azo, na bie ɛnle azɛlɛ ne anwo a, ɛnee menwu kɛ amgba ɛdua me nwo zo wɔalie Yizilayɛma, kɛmɔ ɛdawɔ wɔha la.”

³⁸Na ɔyɛle zɔhane. Aleɛ hyenle na Gedɛyɔn hwinle dwɛsɛ ne anu la, ɛbɔlɛ mɔɔ guale aze la yi kanrɛlɛ.

³⁹Na Gedɛyɔn zɛlɛle Nyamenle kɛ, “Mmafa me nwo ɛya. Maa menga edwɛkɛ kpɔkɛ ko bieko. Mesɛlɛ wɔ, maa menva dwɛsɛ ne menyɛ sɔnea ko bieko. Nzinlii ɛdeɛ ye, mmamaa dwɛsɛ ne doa; maa ɔyɛ resee, na maa ɛbɔlɛ ɛloa azɛlɛ ne anwo.”

⁴⁰Na kenle ko ne nɔe ne, Nyamenle yɛle ye kɛmɔ Gedɛyɔn kpondɛ la. Aleɛ hyenle la ɛnee dwɛsɛ ne le resee, na ɛbɔlɛ ɛloa azɛlɛ ne anwo.