Read Nzema Maa 7 Bible Online

Maa 7 - Nzema bible

Maa 7

¹Gedɛyɔn nee ye ɛlɔnema ne amuala dwazole kenle ko aleɛbahye na bɛhɔdɛle Hɛlɔdo Nzubula ne azo. Medeanema azokoɛleɛ ɛdeɛ ne wɔ Gedɛyɔn ɛdeɛ ne sɔlɔ, wɔ Moli Boka ne foa ko bɔnza ne anu.

²Ɛdɛnkɛma zele Gedɛyɔn kɛ, “Wɔ ɛlɔnema mɔɔ meye Medeanema meamaa bɛ la zonle somaa. Saa bɛzonle somaa a bɛbaze kɛ bɛdabɛ bɛ anwosesebɛ a bɛva bɛli konim a, yemɔti bɛnrɛli me eni; bɛbamemaa bɛ nwo zo.

³ Zɔhane ati kpakye nuhua wienyi ka kile bɛ kɛ, ‘Awie biala mɔɔ nea a ɔ nwo ɛnva ye ɛngɔ la ɛzia ɛhɔ sua nu.’ ” Gedɛyɔn zɔle bɛ nleanle na bɛ nuhua apenle ngoko abulanwiɔ nee nwiɔ ziale, na ɔhale apenle bulu.

⁴Eza Ɛdɛnkɛma zele Gedɛyɔn kɛ, “Ɛlɔne mɔɔ ɛha la tɛso somaa. Fa bɛ kɔ Azule ne anloa na medame mebakpa nu meaye bie meamaa wɔ. Bɛ nuhua biala mɔɔ menwɔze wɔ kɛ, ‘sonla ɛhye kɔ bie’ la, ɛ nee ye ɛhɔ. Awie biala mɔɔ menwɔze wɔ kɛ ‘ɔngɔ bie’ la, ɛ nee ye mmakɔ.”

⁵Yemɔti Gedɛyɔn vale ɛlɔnema ne hɔle nzubula ne azo. Ɛdɛnkɛma zele ye kɛ, “Menli mɔɔ kɛva bɛ tafinlima kɛnlo nzule ne kɛ twea ɛlɛno nzule la, kpa bɛ ngome sie ahane. Bɛdabɛ noko mɔɔ bɛkɛhoto kolaa na bɛanlo nzule ne la, kpa bɛ sie foa ko.”

⁶Bɛdabɛ mɔɔ bɛvale bɛ sa bɛvenle nzule ne bɛnlonle la amuala le ɛya nsa ala. Menli mɔɔ hale la amuala hotole kolaa na bɛanlo nzule ne.

⁷Na Ɛdɛnkɛma zele Gedɛyɔn kɛ, “Menli ɛya nsa ne mɔɔ vale bɛ sa venle nzule ne nlonle la, bɛmɛ yɛɛ mefa bɛ mealie Yizilayɛma a; memaa bɛali Medeanema anwo zo konim. Yemɔti menli mɔɔ ɛha la, maa biala ɛzia ɛhɔ sua nu.”

⁸Gedɛyɔn liele bɛ konle ninyɛne ne mɔ, na ɔmanle bɛziale bɛhɔle sua nu, na ɔhale menli ɛya nsa ne ala. Ɛnee Medeanema azokoɛleɛ ne ɛha Gedɛyɔn nee ye ɛlɔnema ne aze wɔ bɔnza ne anu.

⁹Kenle ko ne nɔe ne Ɛdɛnkɛma zele Gedɛyɔn kɛ, “Dwazo na ɛ nee wɔ ɛlɔnema ɛhɔ Medeanema anwo zo. Wɔli konim wɔwie.

¹⁰Saa ɛsulo noko a, ɛnee ɛ nee wɔ sonvolɛ Pula bɛhɔbu bɛzia

¹¹na bɛbade mɔɔ menli ne ɛlɛka la. Ɛhye bamaa wɔazi ahonle ɛ nee bɛ ahɔho.” Yemɔti Gedɛyɔn nee Pula hɔle Medeanema azokoɛleɛ ne kandiba.

¹²Medeanema, Amalɛkema, yɛɛ Aduduleɛ ɛsɛlɛ ne azo amra ne mɔ ɛyɛ menyemenye kɛ azonlɛ la wɔ bɔnza ne anu, yɛɛ afunlumu mɔɔ bɛlɛ la zonle kɛ ɛnweazo anwea.

¹³Mɔɔ Gedɛyɔn hɔdwule la, ɔdele kɛ nrenya bie ɛlɛka ɛlalɛ mɔɔ yeha la yeahile ɔ gɔnwo. Ɔse, “Ayi, meka ɛlalɛ la ɛnee kpanwo mɔɔ bɛva abɛlɛ bɛyɛ la ɛhundo ɛra Medeanema azokoɛleɛ ɛke na yeratia yɛ ndanlɛ azua ne mɔ anu ko yegologolo ye yegua bɔkɔɔ.”

¹⁴Ɔ gɔnwo ne buale kɛ, “Ɛlalɛ ɛhye abo ɛngile debie gyɛne biala. Kpanwo ne kile Yizilayɛnli Dwowahye ara nrenya Gedɛyɔn konle dadeɛ ne. Nyamenle ɛkpogya ɔ sa zo yemaa yeli Medeanema nee yɛ ɛlɔnema ne anwo zo konim.”

¹⁵Mɔɔ Gedɛyɔn dele ɛlalɛ ne nee ɔ bo ɛhilelɛ ne la, ɔyeyɛle Nyamenle. Akee ɔziale ɔhɔle Yizilayɛma azokoɛleɛ lɔ na ɔzele ye ɛlɔnema ne kɛ, “Bɛdwazo, ɔluakɛ Ɛdɛnkɛma ɛye Medeanema pemgbenleamgbe ne ɛmaa bɛ.”

¹⁶Ɔhyɛle ye ɛlɔnema ɛya nsa ne anu ekpunli nsa na ɔvale aweɛne nee dwora mɔɔ tɛkɛ zia nu la ɔmanle awie ko biala.

¹⁷Akee ɔzele bɛ kɛ, “Awie biala ɛnlea me. Debie biala mɔɔ menwɔyɛ la, bɛyɛ bie. Saa yɛdwu bɛ azokoɛleɛ ne kandiba na debie biala mɔɔ menwɔyɛ la, zɔhane ala yɛɛ bɛdabɛ noko bɛyɛ a.

¹⁸Saa me nee me ekpunli ɛdeɛ ne yɛwu yɛ aweɛne ne mɔ anu a, bɛdabɛ noko bɛwu bɛ ɛdeɛ ne mɔ anu bɛdeɛdea nu kɛ, ‘Ɛdɛnkɛma nee Gedɛyɔn bɛ ɛdeɛ ɛne!’ ”

¹⁹Gedɛyɔn nee ye ɛlɔnema ɛya nsa ne mɔɔ hale la dwule menli ne mɔ azokoɛleɛ ne kandiba asɛɛ alevinli mu nwiɔ avinli. Ɛnee bɔ zo mɔɔ sinzavolɛma fofolɛ mɔɔ bahakyi dɛba ne mɔ la ɛra ɔ. Akee bɛwule bɛ aweɛne ne mɔ anu na bɛbobɔle dwora ne mɔ mɔɔ bɛdedɛ la.

²⁰Ɛlɔnema ekpunli nwiɔ ne noko yɛle zɔhane ala. Bɛlɛ bɛ tɛkɛ ne mɔ bɛ sa bɛne ne mɔ anu, yɛɛ aweɛne ne mɔ mɔɔ bɛlɛwu nuhua la wɔ bɛ sa fema ne mɔ anu, na bɛdeɛdeanle nuhua kɛ, “Ɛdɛnkɛma konle dadeɛ ko, Gedɛyɔn konle dadeɛ ko!”

²¹Awie biala andu ɔ bo anvi ɛleka mɔɔ ɔgyi la, noko kpɔvolɛma ɛlɔne ne deɛdeanle nuhua na bɛguale ɛbɔ nu.

²²Mekɛ mɔɔ Gedɛyɔn ɛlɔnema ɛya nsa ne ɛlɛwu bɛ aweɛne ne mɔ anu la, Ɛdɛnkɛma manle kpɔvolɛma ne mɔ pɛle bɛ nwo honle na bɛhunle bɛ nwo. Bɛnriandile toonwo bɛhɔle Bɛte Hyeta wɔ Zalɛtan afoa nu nehane, bɛtelele zolɛ bɛhɔdwule Ebɛle Mɛhɔla mɔɔ zua Tabate ɛweɛne zo la.

²³Na bɛvɛlɛle Yizilayɛma mɔɔ wɔ Nafetalae nee Ahya nee Manasɛ la, na bɛbelele bɛzile Medeanema zo.

²⁴Gedɛyɔn zoanle menli manle bɛhɔbɔle azua mɔɔ gua Yifelaem awoka ne mɔ azo la amaneɛ kɛ, “Bɛtolo aze bɛ nee Medeanema ɛraho. Bɛzia bɛ wɔ Azule Dwɔdan ne nee azudenle ne mɔ anloa toonwo bɛhɔkpula Bɛtebɛla. Bɛmmamaa bɛ adenle bɛmaa bɛpɛ.” Yemɔti Yifelaemma ravale azudenle ne mɔ amuala nee Azule Dwɔdan ne.

²⁵Bɛvoanle bɛ toonwo bɛhyele Medean mgbanyima nwiɔ, mɔɔ le Ɔlɛbe nee Ziibi. Bɛhunle Ɔlɛbe wɔ Ɔlɛbe Bodane ne azo, yɛɛ bɛhunle Ziibi wɔ Ziibi nwanyeyɛlɛ sua ne anu na bɛvale adile nwiɔ ne, Ɔlɛbe nee Ziibi adile ne mɔ bɛrɛlɛle Gedɛyɔn. Mekɛ ne anu ɛnee Gedɛyɔn wɔ Azule Dwɔdan ne anzi mɔɔ di kɔ aduduleɛ la.