Read Nzema Maa 8 Bible Online

Maa 8 - Nzema bible

Maa 8

¹Yifelaem ɛlɔnema ne bɔle Gedɛyɔn somolɛ kɛ, “Duzu amaamuo ɛtane a wɔva wɔbu yɛ la. Duzu ati a ɛ nee Medeanema kaho mɔɔ wɔambɔ yɛ amaneɛ a?” Na bɛhwile ɔ nyunlu kpalɛ.

²Na ɔzele bɛ kɛ, “Mɔɔ meyɛ la nee mɔɔ bɛyɛ la ɛnrɛzɛ. Ekyi bɔbɔ mɔɔ bɛmɛ Yifelaemma bɛyɛ la sɔ ɛnyelɛ tɛla mɔɔ me ɛlɔnema ne amuala ɛyɛ la.

³ Ɔlua Nyamenle tumi zo, bɛhu Medean mgbanyima nwiɔ ne, Ɔlɛbe nee Ziibi. Na duzu bɔbɔ yɛɛ meyɛ mɔɔ nee ɛhye sɛ a?” Ɔhanle ɛhye la, bɛ ɛya ne dwole.

⁴Gedɛyɔn nee ye menli ɛya nsa ne rale Azule Dwɔdan ne anloa na bɛpɛle. Ɛnee bɛvɛ, noko bɛvoanle bɛ kpɔvolɛma ne ndinlizo.

⁵Yemɔti ɔzele menli mɔɔ wɔ Sɛko la kɛ, “Mesɛlɛ bɛ, bɛmaa ɛlɔnema mɔɔ me nee bɛ lua la kpanwo bɛmaa bɛli, ɔluakɛ asɛɛ bɛwie wu. Melua Medean arelemgbunli nwiɔ ne, mɔɔ le Ziba nee Zɛlemɛna ɛhyelɛ.”

⁶Na Sɛko mgbanyima zele ye kɛ, “Ziba nee Zɛlemɛna mumua ne ɛ sa ɛzɔ bɛ nu wɔhye bɛ yɛɛ yɛmaa wɔ ɛlɔnema aleɛ a?”

⁷Gedɛyɔn zele kɛ, “Bɛ mo. Saa Ɛdɛnkɛma maa me sa sɔ Ziba nee Zɛlemɛna nu a, bɛmɛ Sɛkoma, mebava fienemgbole nu mbowule mbaka meabila bɛ toonwo bɛ nzi akpakyekpakye.”

⁸Ɔvi ɛkɛ la, Gedɛyɔn nee ye ɛlɔnema ne hɔle Pɛnuwɛle na ɔhɔzɛlɛle bɛdabɛ noko aleɛ. Na Pɛnuwɛlema noko buale ye, kɛmɔ Sɛkoma buale ye ala la.

⁹Na ɔzele Pɛnuwɛlema kɛ, “Melɛkɔ, na saa mesia meba anzonudwolɛ nu a, mebabubu bɛ tawa ne meagua.”

¹⁰Ɛnee Ziba nee Zɛlemɛna nee bɛ ɛlɔnema ne wɔ Kakɔ. Ɛlɔnema ɛwolaa ne, bɛ nuhua apenle ngoko bulu nee nnu ala a hale a, ɔluakɛ bɛ nuhua apenle ngoko ɛya ko abulanwiɔ ɛdɔ dadeɛ nloa.

¹¹Gedɛyɔn vale Noba nee Dwobɛha aduduleɛ adenle ne azo na ɔhɔle bɛ kpɔvolɛma ɛlɔne ne anwo zo arɛlevilɛ nu.

¹²Ziba nee Zɛlemɛna nriandile; ɔvoanle bɛ toonwo ɔhɔhyele Medean Arelemgbunli Ziba nee Zɛlemɛna, na ɔbɔle bɛ ɛlɔnema ne asande.

¹³Mɔɔ Dwowahye ara Gedɛyɔn vi konle ne anloa sia ara la, ɔluale Hilɛse awoka ne mɔ avinli.

¹⁴Ɔhyele kpavolɛ bie mɔɔ vi Sɛko la na ɔbizale ye edwɛkɛ, na kpavolɛ ne hɛlɛle mgbanyima titile abulasuu nee nsuu ne mɔɔ gyi bɛ ti la aluma manle ye.

¹⁵Gedɛyɔn akee rale Sɛko mgbanyima ne mɔ ɛkɛ. Ɔzele bɛ kɛ, “Bɛnlea, Ziba nee Zɛlemɛna ɛne! Bɛmɛ bɛ ti a bɛzile me amgbu kɛ, ‘Ziba nee Zɛlemɛna mumua ne, wɔhola bɛ kye na wɔaze yɛ kɛ yɛmaa wɔ ɛlɔnema aleɛ, ɔluakɛ bɛwie wu?’ la.”

¹⁶Ɔhyele suakpole Sɛko azo mgbanyima ne mɔ na ɔvale fienemgbole nu mbowule mbaka ɔlile bɛ nwo gyima ɔhilele bɛ debie.

¹⁷Eza ɔbubule Pɛnuwɛle tawa ne ɔguale na ɔhunle suakpole ne azo mrenya kɔsɔɔti.

¹⁸Akee ɔbizale Ziba nee Zɛlemɛna kɛ, “Menli mɔɔ bɛhunle bɛ wɔ Teebɔ la kɛ bɛsi bɛde ɛ?” Bɛbuale ye kɛ, “Kɛmɔ ɛde la, zɔhane ala yɛɛ bɛ ko biala de a; ko biala zɔho belemgbunli ra.”

¹⁹Gedɛyɔn zele bɛ kɛ, “Bɛle me mediema fɔɔnwo mɔɔ me nee bɛ vi ɛkolɛ ko anu a. Meka Ɛdɛnkɛma kɛ saa bɛangu bɛ a, anrɛɛ medame noko menrɛhu bɛ.”

²⁰Na ɔzele ɔ ra nrenya kpanyinli ne mɔɔ bɛfɛlɛ ye Gyita la kɛ, “Dwazo ku bɛ!” Noko kpavolɛ ne andwe ye dadeɛ ne, ɔluakɛ ɔle kakula, yɛɛ ɔsulo.

²¹Na Ziba nee Zɛlemɛna zele Gedɛyɔn kɛ, “Ɛdawɔ mumua ne ku yɛ, ɔluakɛ kɛ nrenya si de la, zɔhane ala yɛɛ ye anwosesebɛ de a.” Yemɔti Gedɛyɔn hunle Ziba nee Zɛlemɛna, na ɔyeyele agudeɛ mɔɔ bɛyɛ ye kɛ siane ɛbule mɔɔ gugua bɛ afunlumu ne mɔ akɔme la.

²²Akee Yizilayɛma ne zele Gedɛyɔn kɛ, “Ɛdawɔ di yɛ nwo zo kpanyinli. Ɛ ra nee wɔ anlɔnra noko zɔhane ala. Ɔluakɛ wɔlie yɛ wɔvi Medeanema asa anu.”

²³Gedɛyɔn buale kɛ, “Menrɛli bɛ nwo zo kpanyinli, yɛɛ me ra noko zɔhane ala. Ɛdɛnkɛma a bali bɛ nwo zo kpanyinli a.”

²⁴Akee Gedɛyɔn zele bɛ kɛ, “Mesɛlɛ bɛ debie ko; ninyɛne mɔɔ bɛnyianle la awie biala ɛyeye asomadeɛ mɔɔ wɔ nu la ɛmaa me.” (Ɔluakɛ Medeanema wula ezukoa nvutuke asomadeɛ, ɔboalekɛ bɛle Yehyemeeyɛle abo zo amra.)

²⁵Bɛzele ye kɛ, “Yɛ kunlu fufule nwohyee, yɛfa bɛ muala yɛamaa wɔ.” Bɛdɛlɛle ɛdanlɛ azɛlɛ ne anwo na awie biala yeyele ye ezukoa asomadeɛ mɔɔ ɔnyianle la guale zolɛ.

²⁶Bɛdilale ɔ nloa la ɔdole asɛɛ kilo abulanwiɔ; ninyɛne ngɛnlɛma mɔɔ bɛfa bɛsiezie sua nu, ndweabane, arelemgbunli ndanlɛ ngɛnlɛma mɔɔ Medean arelemgbunli hedale, nee afunlumu ne mɔ akɔme ndweabane, bɛmɛ bɛmboka nwolɛ.

²⁷Gedɛyɔn vale ezukoa nvutuke ne yɛle ananze ziele ye sua ne anu wɔ ye sua zo Ɔfela. Yizilayɛma kɔsɔɔti kpole Nyamenle na bɛzonlenle ananze ne. Na ɛhye yɛle ɛhane manle Gedɛyɔn nee ye sua nu amra.

²⁸Yemɔti Yizilayɛma lile Medeanema anwo zo konim bɔkɔɔ. Medeanema angola bɛ nwo kputi bieko. Na akee menli ne dɛnlanle anzonudwolɛ nu ɛvolɛ abulanla, ɔhɔdwule mekɛ mɔɔ Gedɛyɔn wule la.

²⁹Akee Dwowahye ara Gedɛyɔn hɔdɛnlanle ɔdaye ye sua zo.

³⁰Gedɛyɔn wole mralɛ mrenya abulasuu, ɔluakɛ ɔgyale mraalɛ dɔɔnwo.

³¹Ɔlɛ ye mgbɔnla wɔ Hyikɛm. Ɔ nee ye wole nrenya ko, na ɔdonle ye Abemɛlɛke.

³²Gedɛyɔn yɛle ɛrelera nwosonwoso na yeawu. Bɛziele ye wɔ ɔ ze Dwowahye nla ne anu wɔ Ɔfela. Ɔfela le Ebayizɛ abo zo amra sua zo.

³³Gedɛyɔn wule ala la yɛɛ Yizilayɛma ati hakyile bieko a. Bɛkpole Nyamenle na bɛzonlenle Beeyale ne mɔ na bɛvale Beeyale-bilete bɛyɛle bɛ nyamenle.

³⁴Yizilayɛma ne angakye kɛ Ɛdɛnkɛma bɛ Nyamenle ne a liele bɛ vile bɛ kpɔvolɛma asa anu wɔ adenle biala anu a.

³⁵Eza bɛangile ahunlunyele biala bɛammaa Gedɛyɔn abo zo amra wɔ moalɛ mɔɔ ɔvale ɔboale bɛ la anwo.