Read Nzema Maa 9 Bible Online

Maa 9 - Nzema bible

Maa 9

¹Gedɛyɔn ara Abemɛlɛke hɔle Hyikɛm wɔ ɔ nli amediema ne mɔ ɛkɛ, nee ɔ nli anwo amra amuala ɛkɛ, na ɔzele bɛ kɛ

²bɛbizebiza Hyikɛm ezuavolɛ ne kɛ, “Boni yɛɛ bɛkulo a? Bɛkulo kɛ Gedɛyɔn amra abulasuu ne kɛzie bɛ anzɛɛ sonla kokye ala a kɛzie bɛ a? Eza bɛhakye kɛ bɛ mogya ko ne ala bie a le me.”

³Ɔ nli amediema ne mɔ vale mɔɔ ɔhanle ɔhilele bɛ la hɔbɔle Hyikɛm ezuavolɛ ne amaneɛ. Na bɛ kɔsɔɔti bɛ kunlu dwole fɔɔnwo kɛ Abemɛlɛke ala a sie bɛ a, ɔluakɛ bɛhanle kɛ, “Yɛdayɛ ko ne ala bie a le ye.”

⁴Na bɛvale dwɛtɛ fufule abulasuu wɔ Beeyale-bilete bozonle sua ne abo bɛmanle ye, na ɔvale ɔbɔle kpamgbanvolɛma bie ɛkpa ɔmanle bɛdoale ɔ bo zo.

⁵Ɔ nee bɛ hɔle ɔ ze awuke nu wɔ Ɔfela na ɔhunle ɔ mediema ne mɔ, mɔɔ le Gedɛyɔn amra mrenya abulasuu ne kɔsɔɔti wɔ bolɛ ko azo; ɔhale Dwotam, mɔɔ le Gedɛyɔn ara kazima ne angomekye, ɔluakɛ ɔnriandile ɔveale.

⁶Hyikɛm ezuavolɛ ne nee Bɛtemelo ezuavolɛ ne kɔsɔɔti bɔle nu na bɛvale Abemɛlɛke bɛziele bɛ belemgbunli wɔ oku baka ne mɔɔ gyi Hyikɛm la abo.

⁷Mɔɔ Dwotam dele ɛhye la, ɔhɔle Gɛlaezem Boka ne azo na ɔdeanle nu ɔzele bɛ kɛ, “Bɛmɛ Hyikɛm amra, bɛdie me, na Nyamenle adie bɛdabɛ.

⁸Kenle ko mbaka kɔsɔɔti hɔle ayia kɛ bɛkaye bɛ nuhua ko bɛazie ye bɛ belemgbunli. Bɛzele ɔlivi baka kɛ, ‘Di yɛ belemgbunli.’

⁹Na ɔlivi baka zele bɛ kɛ, ‘Saa menwɔli bɛ belemgbunli a, ɛnee ɔwɔ kɛ megyakyi ma ne mɔɔ meso memaa bɛfa bɛyɛ nwole bɛwula menli nee awozonle ne mɔ anyunlunyia la ɛzolɛ, na meanyia adenle meakpɔsa bɛ nwo zo.’

¹⁰Mbaka ne mɔ hɔzele feege baka kɛ, ‘Bɛla bali yɛ belemgbunli.’

¹¹Na feege baka zele bɛ kɛ, ‘Saa menwɔli bɛ belemgbunli a, ɛnee ɔwɔ kɛ megyakyi me ma fɛlɛko ne mɔɔ meso la.’

¹²Eza mbaka ne mɔ hɔzele vanye baka kɛ, ‘Bɛla bali yɛ belemgbunli.’

¹³Na vanye baka zele bɛ kɛ, ‘Saa menwɔli bɛ belemgbunli a, ɛnee ɔwɔ kɛ megyakyi nwanye ne mɔɔ maa awozonle nee menli anye die la ma ne ɛzolɛ.’

¹⁴Akee mbaka ne mɔ kɔsɔɔti zele mbowule baka kɛ, ‘Wɔmɔ, bɛla bali yɛ belemgbunli.’

¹⁵Na mbowule baka zele mbaka ne mɔ kɛ, ‘Saa nɔhalɛ nu, bɛ kunlu fufule nwohyee, bɛkulo kɛ medi bɛ belemgbunli a, ɛnee bɛravea me alubo ye anu; saa bɛanyɛ ye zɔhane a, senle vi me mbowule ye anu bazɔ ayela Lɛbanɔn sida mbaka kɔsɔɔti.’

¹⁶“Yemɔti, ɛnee bɛdabɛ bɛnea a, nɔhalɛ nu, ɔle kpalɛ kɛ bɛva Abemɛlɛke bɛzie belemgbunli a? Anzɛɛ bɛdabɛ bɛnea a amaamuo kpalɛ a bɛbu bɛmaa Gedɛyɔn nee ye awuke nu amra la, anzɛɛ gyima kpole ne mɔɔ ɔlile ɔmanle bɛ la, nwolɛ amaamuo a bɛbu la ɔ?

¹⁷Bɛhakye kɛ egya honle bɛ ti na ɔvale ye ngoane ɔdole nzeleba ɔliele bɛ ɔvile Medeanema asa anu.

¹⁸Noko ɛnɛ bɛho bɛtia egya, bɛhu ɔ mra abulasuu ne amuala wɔ bolɛ ko azo, na bɛva Abemɛlɛke, mɔɔ le akɛlɛ ralɛ la bɛzie Hyikɛm belemgbunli,

¹⁹ɔboalekɛ ɔle bɛ nwo sonla. Saa bɛdabɛ bɛnea bɛ ti anu, na bɛli nɔhalɛ kɛ bɛwula Gedɛyɔn nee ye awuke nu amra anyunlunyia ɛnɛ ɛdeɛ a, ɛnee Abemɛlɛke ati, bɛli fɛlɛko na ɔdaye noko ɔli fɛlɛko wɔ bɛ ti.

²⁰Na saa tɛ ye zɔhane ɛdeɛ a, ɛnee senle vi Abemɛlɛke anu ɛzɔ ɛyela Hyikɛm nee Bɛtemelo amra, na senle noko vi Hyikɛm nee Bɛtemelo ezuavolɛ ne anu ɛzɔ ɛyela Abemɛlɛke.”

²¹Na Dwotam nriandile hɔle Biyɛ, ɔhɔdɛnlanle ɛkɛ, ɔluakɛ ɔsulo ɔ diema Abemɛlɛke.

²²Abemɛlɛke ziele Yizilayɛma ɛvolɛ nsa.

²³Na Nyamenle manle mgbonde dɔle Abemɛlɛke nee Hyikɛm amra avinli na bɛdele Abemɛlɛke anwo atua.

²⁴Ɛhye zile, amaa Gedɛyɔn amra abulasuu ne mogya agua Abemɛlɛke nee Hyikɛm amra mɔɔ zile ye adua manle ɔhunle bɛ la ati zo.

²⁵Na Hyikɛm ezuavolɛ manle menli hɔdɛle Abemɛlɛke wɔ awoka ne mɔ azo, na bɛzale adendulɛma mɔɔ vale adenle ne azo la bɛliele bɛ ninyɛne. Na bɛrabɔle Abemɛlɛke amaneɛ.

²⁶Na Yibɛde ara nrenya Geeyale nee ɔ mediema ne mɔ dule radɛnlanle Hyikɛm, na Hyikɛm amra vale bɛ rɛle wulale ye nu.

²⁷Bɛ kɔsɔɔti bɛhɔle bɛ vanye ɛya ne mɔ anu bɛhɔtetele vanye ma bɛrayɛle nwanye bɛvale bɛdole ɛkponle kpole bie. Bɛhɔle bɛ nyamenle sua ne abo bɛlile, bɛnlonle na bɛlile Abemɛlɛke ngoamɛ, bɛhehanle ɛtane ɛtane bɛtietiale ye.

²⁸Geeyale zele kɛ, “Abemɛlɛke a le nwane, yɛɛ yɛmɛ Hyikɛm ezuavolɛ, duzu menli a le yɛ mɔɔ ɔwɔ kɛ yɛsonle ye a? Anzɛɛ tɛ Gedɛyɔn ara ye nee ye abɔlɔba Zibɛle a zonlenle Heemɔ mɔɔ kyekyele Hyikɛm la ɛlɔnema la ɔ? Duzu ati bɔbɔ yɛɛ ɔwɔ kɛ yɛsonle Abemɛlɛke a?

²⁹Me kunlu a anrɛɛ menli ɛhye mɔ kɔsɔɔti wɔ me bo, anrɛɛ metu Abemɛlɛke ebia ne azo. Anrɛɛ menwɔze Abemɛlɛke kɛ, ‘Boɔboa wɔ ɛlɔnema ne anloa na finde maamgbole nu maa yɛho.’ ”

³⁰Mekɛ mɔɔ Zibɛle, mɔɔ nea suakpole ne azo la dele edwɛkɛ mɔɔ Yibɛde ara Geeyale hanle la, ɛya hunle ye kpole kpalɛ.

³¹Ɔzoanle menli ɔmanle bɛhɔbɔle Abemɛlɛke amaneɛ wɔ Alɛma. Ɔse, “Nea, Yibɛde ara Geeyale nee ɔ mediema ne mɔ ɛra Hyikɛm. Bɛlɛmaa ezuavolɛ ne akpamo bɛamaa bɛadu wɔ.

³²Yemɔti ɛnɛ nɔe, ɛ nee wɔ ɛlɔnema bɛrazia adenle nu.

³³Na ye alehyenlɛ nu, mɔɔ maanle nu kɛtete la wɔahɔnwinwi bɛ wɔ suakpole ne azo; na saa Geeyale nee menli mɔɔ nee ye lua la se kɛ bɛba bɛ nee wɔ araho a, wɔadua bɛ kakɛ, kɛmɔ ɔfɛta la.”

³⁴Abemɛlɛke nee ye ɛlɔnema ne dwazole nɔe ne; bɛhyɛle bɛ nwo ekpunli nna na bɛhɔziale Hyikɛm kandiba ne.

³⁵Geeyale hɔgyinlanle suakpole ne anlenkɛ kpole ne anloa. Abemɛlɛke nee ye ɛlɔnema ne vi ɛleka mɔɔ bɛvea la vindele.

³⁶Geeyale nwunle ɛlɔne ne la ɔzele Zibɛle kɛ, “Nea, menli vi awoka ne mɔ azo ɛlɛtolo ara!” Zibɛle zele ye kɛ, “Awoka ne mɔ azo ɛlawolɛ ne mɔ a ɛyɛ ɛ nye zo kɛ menli a.”

³⁷Geeyale zile zolɛ bieko kɛ, “Nea, menli vi avinli nehane ɛlɛba. Ekpunli bieko noko vi oku baka ne mɔɔ bɛbɔ menli munzule wɔ ɔ bo la anwo ɛlɛba.”

³⁸Akee Zibɛle zele ye kɛ, “Wɔ mgbole ne mɔɔ ɛka la wɔ nienwu? Tɛ wɔmɔ a ɛhanle kɛ, ‘Abemɛlɛke a le nwane, mɔɔ ɔwɔ kɛ yɛsonle ye la?’ Menli mɔɔ ɛgolole bɛ nwo la a ɛlɛba la. Finde tɛtɛlɛ nu lɔ ɛ nee bɛ ɛhɔho.”

³⁹Na Geeyale lile Hyikɛm ezuavolɛ ne ati na bɛ nee Abemɛlɛke honle.

⁴⁰Geeyale dɔle ɛbɔ nu; Abemɛlɛke belele zile ye zo. Menli ne anu somaa bodɛbodale wɔ suakpole ne anlenkɛ kpole ne anloa.

⁴¹Akee Abemɛlɛke dɛnlanle Alɛma. Zibɛle voanle Geeyale nee ɔ mediema ne mɔ; yeammaa bɛandɛnla Hyikɛm bieko.

⁴²Aleɛ hyenle la Hyikɛm ezuavolɛ yɛle kɛ bɛfinde bɛahɔ konle ne anloa bieko.

⁴³Abemɛlɛke dele la ɔhyɛle ye ɛlɔnema ne anu ekpunli nsa na bɛhɔziale Hyikɛm amra. Mɔɔ ɔnwunle kɛ bɛvi suakpole ne azo bɛye bɛ ti la, bɛhɔnwinwinle bɛ na bɛhunle bɛ kɔsɔɔti.

⁴⁴Abemɛlɛke nee ye ekpunli ɛdeɛ ne hanle bɛ nwo ndɛndɛ hɔvale suakpole ne anlenkɛ kpole ne. Ekpunli nwiɔ ne noko hɔnwinwinle menli ne mɔ wɔ konle ɛleka ne na bɛhunle bɛ kɔsɔɔti.

⁴⁵Abemɛlɛke nee suakpole ne azo amra honle toonwo aledwolɛ. Ɔhunle menli mɔɔ wɔ zolɛ la kɔsɔɔti na ɔvale suakpole ne; ɔbɔle ye tɔɔ na ɔvale ngyenle ɔkpondenle zolɛ.

⁴⁶Mɔɔ mgbanyima mɔɔ wɔ Hyikɛm aranemgbole ne anu la dele mɔɔ ɛzi la, bɛnriandile bɛhɔveale Beeyale-bilete ɛzonlenlɛ sua ne anu.

⁴⁷Awie hɔhanle hilele Abemɛlɛke kɛ menli mɔɔ wɔ Hyikɛm aranemgbole ne anu la ɛboɔboa bɛ nloa wɔ bozonle sua ne abo.

⁴⁸Yemɔti Abemɛlɛke vale ye ɛlɔnema lile ɔ nzi hɔle Zalemɔn Boka ne azo. Ɔvale akuma ɔpɛle baka ko ngane ne mɔ ko ɔdole ɔ kɔme zo na ɔzele ye ɛlɔnema ne kɛ, “Deɛ ɛhye mɔɔ bɛnwu kɛ meyɛ la, awie biala ɛmaa ɔ nwo ɛyɛ ndɛ ɔyɛ bie.”

⁴⁹Yemɔti awie biala pɛle baka ɛhane ko na bɛlile Abemɛlɛke anzi bɛvale bɛhɔguale aranemgbole ne anloa na bɛdole senle nu, na bɛdabɛ mrenya nee mraalɛ kɛyɛ apenle, mɔɔ wɔ Hyikɛm aranemgbole ne anu la kɔsɔɔti dɔle nzonle.

⁵⁰Akee Abemɛlɛke hɔle Tibɛze, bɛhɔbɔle bɛyiale ye na bɛhonle bɛvale.

⁵¹Aranemgbole bie wɔ Tibɛze suakpole ne azo, yemɔti menli ne mɔ, mraalɛ nee mrenya, nriandile hɔveale zolɛ anwuma.

⁵²Abemɛlɛke hɔle aranemgbole ne anwo na ɔvole ɔhɔle kɛ ɔkado senle wɔ ye anlenkɛ ne anu. Ɔfo la,

⁵³ raalɛ bie gyakyile ɛdibolɛ totohyia bie dole ɔ ti zo manle ɔ ti kpukele.

⁵⁴Abemɛlɛke vɛlɛle ye sonvolɛ ne mɔɔ soa ye konle ninyɛne ne la kɛ, “Ka ɛ nwo, twe wɔ dadeɛ ne ku me ndɛndɛ, anrɛɛ menli kɛze kɛ, ‘Raalɛzinli a hunle ye a.’ ” Amgba noko kpavolɛ ne wɔle Abemɛlɛke dadeɛ hunle ye.

⁵⁵Na mɔɔ Yizilayɛma nwunle kɛ Abemɛlɛke ɛwu la, bɛ kɔsɔɔti bɛziale bɛhɔle bɛ sua zo.

⁵⁶Zɛhae adenle zo a Nyamenle vale duale Abemɛlɛke kakɛ wɔ munzule ɛbɛla ne mɔɔ ɔbɔle ɔtiale ɔ ze, kɛ ɔhunle ɔ mediema abulasuu ne la a.

⁵⁷Eza Nyamenle manle Hyikɛm amra munzule ne mɔɔ bɛbɔle la bɔle bɛ ti. Ɛhye kile kɛ Dwotam mɔɔ le Gedɛyɔn ara ne amonle mɔɔ wale bɛ la ɛdila.