Read Nzema Yek 1 Bible Online

Yek 1 - Nzema bible

Yek 1

¹Buluku ɛhye ka ninyɛne mɔɔ Gyisɛse Kelaese yele hilele la anwo edwɛkɛ. Nyamenle manle ɔyele ɔhilele amaa yeaye mɔɔ ɛnrɛhyɛ biala na yeazi la yeahile ye sonvolɛma. Kelaese manle ye soanvolɛ rayele ninyɛne ɛhye mɔ hilele ye sonvolɛ Dwɔn.

²Dwɔn ɛha mɔɔ ɔnwunle ye la amuala. Ɔhanle nɔhalɛ ne, kɛmɔ Gyisɛse Kelaese yele hilele ye la nee nrɛlaleɛ mɔɔ ɔdele ɔvile Nyamenle ɛkɛ ne la amuala.

³Nyilalɛ ɛha sonla ne mɔɔ kɛkpogya ɔ ne zo kɛgenga Nyamenle nrɛlaleɛ ɛhye kɛhile awie mɔ la, yɛɛ nyilalɛ ɛha bɛdabɛ noko mɔɔ bɛkɛdie na bɛkɛva mɔɔ wɔ nu la bɛkɛzie na bɛkɛli zolɛ la! Ɔluakɛ mekɛ mɔɔ ɛhye mɔ basisi la ɛbikye.

⁴Medame Dwɔn a melɛkɛlɛ kɛlata ɛhye meahɔmaa asɔne nsuu ne mɔ mɔɔ wɔ Ehyea maanzinli nu la a: Tete Nyamenle ne mɔɔ ɛnee wɔ ɛkɛ ne, na ɔwɔ ɛkɛ ne kɛkala, na ɔbara la ɛlo bɛ na ɔmaa bɛ anzonudwolɛ. Sunsum nsuu ne mɔ mɔɔ wɔ Nyamenle Belemgbunli Ebia Kpole ne anyunlu la ɛlo bɛ na ɔmaa bɛ anzonudwolɛ.

⁵ Akee Gyisɛse Kelaese, nɔhalɛ dasevolɛ ne, mɔɔ le Ralɛ ne mɔɔ bɛlumua bɛdwazo ye bɛvi ewule nu na ɔsie azɛlɛ ye azo arelemgbunli kɔsɔɔti la ɛlo bɛ na ɔmaa bɛ anzonudwolɛ. Gyisɛse Kelaese kulo yɛ, yeva ye mogya yelie yɛ yevi yɛ ɛtane nu,

⁶ na yeyɛ yɛ arelemgbunli nee sɛlɛvolɛma kɛ yɛzonle ye Nyamenle Selɛ ne. Anyunlunyia nee tumi ɛyɛ ye ɛdeɛ dahuu! Amen.

⁷ Bɛnlea, ɔlua amungu ne mɔ anu ɔlɛba! Awie biala banwu ye, yɛɛ bɛdabɛ mɔɔ bɛwɔle ɔ nvenle foa atwɛ la banwu ye. Ɔdaye ɔ ti, menli ngakyile kɔsɔɔti mɔɔ wɔ ewiade la bazu aye awolɛ. Nɔhalɛ, ɔle zɔhane. Amen.

⁸Kɛ tete Awulae Nyamenle Bedevinli ne mɔɔ ɛnee wɔ ɛkɛ, na ɔwɔ ɛkɛ ne kɛkala, na ɔbara la se la ɛne, “Medame a mele ‘Alefa’[1] ne nee ‘Omiga’[2] ne a.”

⁹Mame a mele bɛ diema Dwɔn. Kelaese ati yɛ muala yɛle ko na yɛlɛ abotane yɛlɛnwu amaneɛ mɔɔ kile kɛ yɛ nwo fɛta ye Belemgbunlililɛ ne a. Bɛvale me bɛradole bɔra ye mɔɔ bɛfɛlɛ ye Patemɔso la azo, ɔluakɛ membɔle Nyamenle edwɛkɛ ne nee nɔhalɛ ne mɔɔ Gyisɛse yele hilele la nolo.

¹⁰Awulae kenle ne, Sunsum ne rale me nwo zo, na mendele ɛnelɛ kpole bie mɔɔ le kɛ aweɛne tendenle la kɛ ɔlɛtendɛ me nzi nehane.

¹¹Ɔse, “Kɛlɛ mɔɔ ɛkɛnwu ye la wɔ buluku nu na fa buluku ne kɔmaa asɔne nsuu ne mɔ mɔɔ wɔ azuamgbole ɛhye mɔ azo la: Ɛfɛsɛse, Semɛna, Pɛgamɛm, Tayataela, Saadese, Feladɛlefea, yɛɛ Lawɔdesia.”

¹²Mengakyile me nwo kɛ menea ahenle mɔɔ ɛlɛtendɛ ahile me la, na menwunle ezukoa nvutuke kɛnlaneɛ mbaka nsuu.

¹³ Debie mɔɔ le kɛ sonla la gyi bɛ avinli, ɔwula tɛladeɛ tendenle mɔɔ dwu ye aze na yeva ezukoa nvutuke akyeso yehye ye avinli.

¹⁴ Ɔ ti enrinli le fufule nwohyee kɛ boane ndɛkɛ, nwohyee kɛ ezukɔtweaba, yɛɛ ɔ nye ma sɔ kɛ senle;

¹⁵ ɔ gyakɛ anwo ta kɛ ayera mɔɔ bɛdu nu na bɛhwi nwolɛ la, na ɔ ne dielie kɛ azule mɔɔ lua awolɛ zo la.

¹⁶Ɔlɛ nwɔlɔra nsuu ɔ sa fema ne anu, yɛɛ dadeɛ anye nwiɔ mɔɔ yɛ nla kɛ wowole la zia ɔ nloa anu. Ɔ nyunlu maanle ne ta kɛ ewia henlema sɛnzɛne.

¹⁷ Menwunle ye la, mempɛle menfinle ɔ gyakɛ anu kɛ asɛɛ mewu la. Na ɔvale ɔ sa fema ne ɔdole me nwo zo na ɔzele me kɛ, “Mmasulo! Mame a mele alumua ne nee awieleɛ ne a.

¹⁸Mame a mele teasenli ne a. Menwule, na kɛkala mede aze dahuu. Melɛ Ewule nee Ɛbolɔ sanvɛ ne.

¹⁹Zɔhane ati, kɛlɛ ninyɛne mɔɔ wɔnwu bɛ la, ninyɛne mɔɔ wɔ ɛkɛ ne kɛkala nee mɔɔ li ɛhye mɔ anzi bara la amuala.

²⁰Nwɔlɔra nsuu ne mɔ mɔɔ ɛnwu bɛ me sa fema ye anu, nee ezukoa nvutuke kɛnlaneɛ mbaka nsuu ne abo a le ɛhye: nwɔlɔra nsuu ne a le asɔne nsuu ne Nyamenle soanvolɛma ne mɔ yɛɛ kɛnlaneɛ mbaka nsuu ne mɔ a le asɔne nsuu ne.