Read Nzema Yek 10 Bible Online

Yek 10 - Nzema bible

Yek 10

¹Akee menwunle Nyamenle soanvolɛ anwo ɛzulolɛ bieko kɛ ɔvi anwuma ɔlɛba. Ɔvea amungu nu na nyangondonle ɛdo ɛbɛnra ɔ ti; ɔ nyunlu ta kɛ sɛnzɛne, na ye ɛnantuo ɛdɔlɔ woonwu kɛ sua sika kpole bie mɔɔ senle la nu la.

²Ɔlɛ nwoma ekyi ko mɔɔ bɛdɛlɛ nu la ɔ sa nu. Ɔvale ɔ gyakɛ fema ne ɔziele nyevile ne azo na yeava bɛne ne yeazie azɛlɛ ye azo,

³na ɔvale ɛnelɛ mɔɔ dielie kɛ awenade ne la ɔdeanle nu kpole bie. Ɔdeanle nu ala la, maanle nu hulule fane nsuu.

⁴Mɔɔ maanle nu hulule fane nsuu la, menyɛle kɛ mekɛlɛ, na mendele kɛ ɛnelɛ vi anwuma, ɔse, “Mɔɔ ɛdele wɔ ɛhululɛ fane nsuu ne anu la maa ɔha ɛ ti anu, mmakɛlɛ!”

⁵ Na Nyamenle soanvolɛ ne mɔɔ menwunle kɛ ɔgyi nyevile nee azɛlɛ zo la manle ɔ sa fema ne zo anwuma

⁶na ɔvuale ɔhilele tease Nyamenle ne mɔɔ bɔle anwuma nee nuhua debie biala, azɛlɛ nee zolɛ debie biala, nee nyevile nee nuhua ninyɛne muala la kɛ, “Aze ɛzilɛ bieko ɛnle ɛkɛ!

⁷Saa Nyamenle soanvolɛ ne mɔɔ tɔ zolɛ nsuu la bɔ ye aweɛne tendenle ne anu a, Nyamenle ngyehyɛlɛ ne mɔɔ vea ɛkɛ ne la bara nuhua, kɛmɔ ɔhanle ɔhilele ye sonvolɛma kpɔmanvolɛma la.”

⁸Akee ɛnelɛ ne mɔɔ mendele kɛ ɔvi anwuma ɔlɛtendɛ yeahile me la zele me bieko kɛ, “Kɔlie nwoma ne mɔɔ bɛdɛlɛ nu, mɔɔ Nyamenle soanvolɛ ne mɔɔ gyi nyevile ne nee azɛlɛ ye azo la lɛ ye ɔ sa nu la.”

⁹Yemɔti mengɔle Nyamenle soanvolɛ ne anwo ɛkɛ na menzele ye kɛ ɔva nwoma ekyi ne ɔmaa me. Na ɔzele me kɛ, “Die na di. Ɔbayɛ ɛ nloa anu menlemenle kɛ dɔdɔ, na ɔdwu ɛ kunlu a ɔbayɛ ɛnwonle.”

¹⁰Menliele nwoma ekyi ne wɔ Nyamenle soanvolɛ ne asa anu na menlile, na ɔyɛle me nloa anu menlemenle. Na mɔɔ ɔdwule me kunlu la ɔyɛle ɛnwonle.

¹¹Na bɛzele me kɛ, “Ɔwɔ kɛ ɛkɔbɔ Nyamenle Edwɛkɛ ne mɔɔ fane maanle maanle, aneɛ aneɛ, menli ngakyile, nee arelemgbunli nwo la nolo bieko.”