Read Nzema Yek 11 Bible Online

Yek 11 - Nzema bible

Yek 11

¹Akee bɛvale baka mɔɔ zɔho kpɔma na bɛfa bɛsuzu debie la bɛmanle me na bɛzele me kɛ, “Dwazo na suzu Nyamenle Ɛzonlenlɛ Sua ne nee azukponle ne, na tia menli mɔɔ ɛlɛsonle sua ne anu la.

² Anrɛɛ mmasuzu alie nwo ɛkɛ ne ɛboka nwolɛ, ɔboalekɛ bɛva ɛkɛ ne bɛmaa bɛdabɛ mɔɔ bɛnzonle Nyamenle la. Zɛhae menli barava Suakpole Nwuanzanwuanza ye siane abulanla nee nwiɔ na bɛazie menli mɔɔ wɔ zolɛ la.

³Mebamaa me dasevolɛma nwiɔ aheda ɛrele arabɔ Nyamenle edwɛkɛ ne nolo kenle apenle ko ɛya nwiɔ abulasia (1260).”

⁴Dasevolɛma nwiɔ ne a le “ɔlivi” mbaka nwiɔ ne nee kɛnlaneɛ mbaka nwiɔ ne mɔɔ gyigyi Awulae mɔɔ lɛ azɛlɛ ye la anyunlu ɛkɛ ne la.

⁵Saa awie se kɛ ɔsɛkye bɛ a, senle vi bɛ nloa anu finde na ɔsɛkye bɛ kpɔvolɛma ne mɔ; saa awie bɔ kpɔkɛ kɛ ɔsɛkye bɛ a bɛbahu ye.

⁶ Bɛlɛ tumi bɛto anwuma nu mɔɔ ezule ɛndɔ mekɛ tendenle biala mɔɔ bɛlɛka Nyamenle nrɛlaleɛ ne la. Eza bɛlɛ azɛlɛ ye azo nzule biala anwo zo tumi, bɛkola bɛkakyi ye bɛmaa ɔyɛ mogya; yɛɛ bɛlɛ tumi bɛfa ewule ngakyile biala bɛbato azɛlɛ ye azo wɔ mekɛ biala mɔɔ bɛkulo la.

⁷ Saa bɛwie nrɛlaleɛ ne ka a, nane ne mɔɔ vi azɛlɛ kuma ne mɔɔ ɛnlɛ ɔ bo la anu la bavinde na ɔ nee bɛ araho. Ɔbali bɛ nwo zo konim na yeahu bɛ,

⁸ na bɛ avunli baha suakpole ne mɔɔ bɛbɔle bɛ Awulae ne meanubaka nu wɔ zolɛ la guabile ne azo. Suakpole zɔhane duma, bɛbavɛlɛ ye kɛ, sɛbe, Sodɔm anzɛɛ Yigyibiti.

⁹Menli vi maanle maanle zo, aneɛ aneɛ nu, mbusua ekpunli ekpunli nee menli ngakyile kɔsɔɔti anu baranlea bɛ avunli ne kenle nsa nee foa, na bɛnrɛmaa adenle bɛnrɛmaa bɛnrɛzie bɛ.

¹⁰Menli mɔɔ wɔ azɛlɛ ye azo la bali fɛlɛko kɛ menli nwiɔ zɔhane ɛwu a. Bɛbali fɛlɛko, bɛ nye balie, na bɛava ahyɛlɛ ninyɛne bɛamaa bɛ nwo ngoko, ɔboalekɛ Nyamenle kpɔmanvolɛma nwiɔ zɔhane yɛle ngyegyelɛ kpalɛ manle aleɛabo amra amuala.

¹¹ Na kenle nsa nee foa ne anzi, ngoane ɛnwomenle vi Nyamenle ɛkɛ rawolole bɛ nu, na bɛdwazole, na ɛzulolɛ kpole hanle bɛdabɛ mɔɔ bɛnwunle bɛ la amuala.

¹² Nyamenle kpɔmanvolɛma nwiɔ ne dele kɛ ɛnelɛ kpole bie vi anwuma, ɔse, “Bɛrɛla anwuma ɛke!” Na mɔɔ bɛ kpɔvolɛma ne mɔ anye gyi bɛ nwo ala la, amungu ravale bɛ hɔle anwuma.

¹³Mekɛ ne anu ala, azɛlɛ kpusule kpole bie; suakpole ne anu hyɛle bulu na ko zɛkyele bɔkɔɔ. Menli apenle nsuu wule azɛlɛkpusulɛ ne anu. Na menli mɔɔ hale la ahonle dule kpole na bɛyeyɛle Nyamenle mɔɔ wɔ anwuma la.

¹⁴Anwubɛnyunlu ne mɔɔ tɔ zolɛ nwiɔ la awieleɛ ɛne. Akee anwubɛnyunlu ne mɔɔ tɔ zolɛ nsa la a ɛlɛba la.

¹⁵ Akee Nyamenle soanvolɛ ne mɔɔ tɔ zolɛ nsuu la bɔle ye aweɛne tendenle ne anu. Na ɛnelɛ mgbole dɔɔnwo bie vi anwuma hanle kɛ, “Azɛlɛ ye azo tumi muala ɛyɛ Awulae nee yɛ Mɛzaya ne ɛdeɛ; ɔbali belemgbunli ɛvolɛ mɔɔ ɛnlɛ awieleɛ!”

¹⁶Mgbanyima abulanwiɔ nee nna ne mɔɔ dede bɛ arelemgbunli mbia zo wɔ Nyamenle anyunlu ɛkɛ ne la dule guale na bɛbutubutule bɛ nyunlu aze bɛzonlenle Nyamenle

¹⁷bɛhanle kɛ, “Awulae Nyamenle Bedevinli mɔɔ ɛnee ɛwɔ ɛkɛ na ɛwɔ ɛkɛ kɛkala a! Yɛyɛ wɔ mo kɛ wɔmaa wɔ tumi ne zo na wɔbɔ ɔ bo kɛ ɛdi belemgbunli a!

¹⁸Ɛya ɛwolo bɛdabɛ mɔɔ bɛnzonle Nyamenle la, noko wɔ ɛya kenle ne ɛdwu. Mekɛ ɛdwu mɔɔ ɛbua mɔwuamra ndɛne na ɛmaa wɔ sonvolɛma, kpɔmanvolɛma, nee wɔ menli kɔsɔɔti, ngakula nee mgbanyinli, mɔɔ sonle wɔ la ahatualɛ mɔɔ fɛta la a. Mekɛ ɛdwu mɔɔ akee ɔwɔ kɛ ɛsɛkye bɛdabɛ mɔɔ bɛsɛkye azɛlɛ ye la a.”

¹⁹Na bɛbukele Nyamenle Ɛzonlenlɛ Sua ne mɔɔ wɔ anwuma lɔ la, na Ngyekyeleɛ Ɛlɛka ne anwo lale ɛkɛ ne wienyi. Na ɛsɛlɛmanye kpakyekpakyele, maanle nu hulule, azɛlɛ kpusule, na ezuawolɛ dɔle kpole bie.