Read Nzema Yek 12 Bible Online

Yek 12 - Nzema bible

Yek 12

¹Akee nwanwane sɛkɛlɛneɛ kpole bie vindele anwomanyunlu. Raalɛ bie mɔɔ ɛva sɛnzɛne ne ɛyɛ ɛdanlɛ ɛheda, ɔ gyakɛ gyigyi siane ne azo, na yeva nwɔlɔra bulu nee nwiɔ yeyɛ abɔtile yebɔ la

²ɛvo awolɛ zo, na ye awolɛ nyane ne ɛmaa ɔlɛsu yeadeɛdea nu.

³ Nwanwane sɛkɛlɛneɛ ɛzulolɛ bieko vindele anwomanyunlu. Nane kɔkɔlɛ anwo ɛzulolɛ bie mɔɔ le kɛ ɛlɛnrɛne la lua anwomanyunlu lɔ. Ɔ ti le nsuu, ye mɛne bulu, yɛɛ etile ko biala bɔ abɔtile.

⁴ Ɔvale ɔ dua ɔhyɛle nwɔlɔra mɔɔ wɔ anwomanyunlu la anu ekpunli nsa na ɔpianle ko ɔguale aze. Akee ɔragyinlanle raalɛ ne mɔɔ ɛvo awolɛ zo la anyunlu ɛkɛ ne kɛ saa ɔwo a yeahye kakula ne yeali.

⁵Raalɛ ne wole ralɛ nrenya, mɔɔ bava tumi kpole azie maanle maanle kɔsɔɔti a. Na bɛvale kakula ne bɛhɔmanle Nyamenle wɔ ye belemgbunli ebia kpole ne azo lɔ.

⁶Raalɛ ne nriandile hɔle ɛsɛlɛ ne azo, ɛleka bie mɔɔ Nyamenle ɛsiezie ɛmaa ye la, ɛkɛ ne yɛɛ ɔbanlea ye gyɛlɛɛnye yeali ye adane kenle apenle ko, ɛya nwiɔ abulasia a (1260).

⁷ Akee konle zile anwuma lɔ. Nyamenle soanvolɛ kpanyinli Maekeɛle nee ɔ sa zo Nyamenle soanvolɛma nee nane anwo ɛzulolɛ ne nee ɔdaye ye soanvolɛma honle.

⁸Maekeɛle nee ɔ sa zo lile nane ne anwo zo konim. Yemɔti bɛdule nane ne nee ye soanvolɛma ne amuala bɛvile anwuma lɔ.

⁹ Bɛvuandinle nane anwo ɛzulolɛ ne mɔɔ le kɛ ɛlɛnrɛne la bɛdole azɛlɛ ye azo. Yemɔ a le mɔmoane ɛwɔlɛ ne mɔɔ bɛfɛlɛ ye Abɔnsam anzɛɛ Seetan, mɔɔ ɛbɛlɛbɛla ewiade amra amuala la. Bɛvuandinle ye soanvolɛma ne mɔ noko bɛguale azɛlɛ ye azo.

¹⁰Akee mendele ɛnelɛ kpole bie vi anwuma, ɔse, “Bɔ zo mɔɔ Nyamenle ngoanelielɛ ne ɛra a! Akee Nyamenle ɛhile ye tumi ne kɛ ɔle Belemgbunli. Akee yehile ye Mɛzaya tumi ne! Ɔluakɛ bɛvuandi mɔɔ gyi Nyamenle anyunlu nɔɔzo nee ewiazo toɔdoa yɛ mediema ne mɔ la bɛde aze.

¹¹Yɛ mediema ne mɔ ɛlua Boaneralɛ ne mogya ne azo nee nɔhalɛ edwɛkɛ ne mɔɔ bɛlile nwolɛ daselɛ la azo ɛli ɔ nwo zo konim, ɔluakɛ bɛanzulo kɛ bɛkɛva bɛ ngoane bɛkɛdo aze.

¹²Zɔhane ati bɛmɛ anwumaneamra, nee bɛdabɛ mɔɔ bɛwɔ zolɛ la amuala, bɛli fɛlɛko! Na bɛmɛ azɛlɛ nee nyevile, bɛ gyakɔ! Ɔluakɛ Abɔnsam ɛdwu ɛra bɛ nwo lɔ, na ɛya kpole wɔ ye nuhua, ɔboalekɛ ɔze kɛ ye mekɛ ɛha ekyi bie ala.”

¹³Mɔɔ nane anwo ɛzulolɛ ne nwunle kɛ bɛvuandi ye bɛde azɛlɛ ye azo la, ɔbɔle ɔ bo kɛ ɔkpondɛ raalɛ ne mɔɔ wole ralɛ nrenya ne la yeahu ye.

¹⁴Na bɛmanle raalɛ ne kɔleɛ ndɛbalɛ mgbole nwiɔ, amaa yeahola tu ɔvi ɛwɔlɛ ne anwo ɛkɛ yeahɔ ɛsɛlɛ zo lɔ, ɛleka mɔɔ bɛbanlea ye gyɛlɛɛnye ɛvolɛ nsa nee foa la, amaa nane ne angola ɔ nwo zo kɔ bieko.

¹⁵Nane ne kpule nzule kɛ azule la kɛ ɔmaa yeava raalɛ ne.

¹⁶Na azɛlɛ boale raalɛ ne. Ɔmemenle nzule ne mɔɔ nane anwo ɛzulolɛ ne kpule la.

¹⁷Nane anwo ɛzulolɛ ne vale raalɛ ne anwo ɛya kpole na ɔhɔle kɛ ɔkadoa ɔ mra mɔɔ ɛha, mɔɔ di Nyamenle mɛla ne azo na bɛdie nɔhalɛ ne mɔɔ Gyisɛse ɛye ɛhile la bɛdi la ɔ nee bɛ ahɔho.

¹⁸Na nane anwo ɛzulolɛ ɛhye ragyinlanle ɛnweakpane ne azo wɔ nyevile ne anloa ɛkɛ.