Read Nzema Yek 15 Bible Online

Yek 15 - Nzema bible

Yek 15

¹Akee menwunle debie ɛzulolɛ bie wɔ anwomanyunlu, mɔɔ le kpole na eza ɔyɛ nwanwane a. Menwunle Nyamenle soanvolɛma nsuu kɛ bɛlɛ amaneɛnwunlɛ ngakyile nsuu, mɔɔ le amaneɛnwunlɛ mɔɔ li amozi a, ɔluakɛ saa bɛmɛ bɛwie a ɛnee Nyamenle ɛya kpole ne ɛdwo.

²Eza menwunle debie bie mɔɔ le kɛ nyevile anye kɔngyekɔngye kɛ neanleɛ mɔɔ bɛva senle bɛkpoto nu la. Akee menwunle bɛdabɛ mɔɔ bɛlile nane ne nee ye ananze ne nee nane ne mɔɔ ye duma le nɔma la anwo zo konim la. Bɛdedɛ getaa mɔɔ Nyamenle a ɛva ɛmaa bɛ la bɛ sa nu, na bɛgyigyi nyevile anye kɔngyekɔngye kɛ neanleɛ la anwo.

³ Ɛnee bɛlɛto Nyamenle sonvolɛ Mosisi nee Boaneralɛ ne anwo edwɛne. Bɛse, “Awulae Nyamenle Bedevinli, wɔ nyɛleɛ yɛ ɛzulolɛ, ɔyɛ nwanwane! Damɛnlangoate[8] Belemgbunli, wɔ ndenle le fɔɔnwo nee nɔhalɛ.

⁴ Awulae, nwane a ɛnrɛzulo wɔ a, nwane a kɛzu kpolera kɛ ɛnle kpole a? Ɛ ngomekye a ɛle nwuanzanwuanza a. Maanle maanle kɔsɔɔti badu agua ɛ nyunlu azonle wɔ, ɔboalekɛ awie biala ɛnwu kɛ ɛdi pɛlepɛle.”

⁵Ɛhye anzi memanle me nye zo na menwunle kɛ bɛbuke Ɛzonlenlɛ Sua ne mɔɔ wɔ anwuma lɔ la, na Nyamenle daselɛlilɛ Ndanlɛ Sua ne wɔ nu.

⁶Nyamenle soanvolɛma nsuu ne mɔɔ wula adɛladeɛ fufule nwohyee na bɛva ezukoa nvutuke akyeso bɛhye bɛ avinli la vi Ɛzonlenlɛ Sua ne anu vindele, bɛdedɛ amaneɛnwunlɛ ngakyile nsuu ne bɛ sa nu.

⁷Tease abɔdeɛ nna ne anu ko vale ezukoa nvutuke dwora nsuu ne mɔɔ Damɛnlangoate Nyamenle ne mɔɔ wɔ ɛkɛ dahuu la ɛya ne wɔ nu la manle bɛ.

⁸ Nyamenle anyunlunyia ne nee ye tumi ne manle esike ngome yile sua ne, mɔɔ awie biala ɛngola nu wolo a, kyesɛ amaneɛnwunlɛ ngakyile nsuu ne mɔɔ li amozi, mɔɔ Nyamenle soanvolɛma nsuu ne lɛ la abo ɛdu.