Read Nzema Yek 17 Bible Online

Yek 17 - Nzema bible

Yek 17

¹ Nyamenle soanvolɛma nsuu ne mɔɔ dedɛ dwora ne mɔ la anu ko rale me nwo ɛkɛ na ɔzele me kɛ, “Bɛla maa mengile wɔ kɛ bɛsi bɛadea tuutuunli ne mɔɔ ɛlie duma la, meka suakpole ne mɔɔ ɛlie duma mɔɔ bɛhye ye wɔ azudenle ne mɔ anloa la.

² Ewiade arelemgbunli zukoale ye, nee ye bɔle adwɔmane ɛbɛla, na menli mɔɔ wɔ ewiade la amuala ɛyɛ mgbane kɛ bɛ nee ye ɛbɔ ye adwɔmane ɛbɛla ne a.”

³Sunsum ne rawolole me, na Nyamenle soanvolɛ ne vale me hɔle ɛsɛlɛ bie azo. Ɛkɛ ne, menwunle raalɛ bie kɛ ɔde nane kɔkɔlɛ bie azo. Nane ne bɛhɛlɛhɛlɛ aluma ɛtane ɛtane mɔɔ tia Nyamenle la wɔ ɔ nwo. Nane ne ati le nsuu yɛɛ ye mɛne le bulu.

⁴Raalɛ ne mɔɔ de zolɛ la heda arelemgbunli ɛdanlɛ kɔkɔlɛ, buluwu nee akɔlɛ ɛnlome afonla na yeva ezukoa nvutuke anwoneɛ, mgbɔba, yɛɛ avikpa yeziezie ɔ nwo. Ɔlɛ ezukoa nvutuke dwora ɔ sa nu. Munzule ninyɛne mgbane mgbane mɔɔ le bɛkyi nee ye adwɔmanebɔlɛ nwo ninyɛndane ngome a wɔ nu a.

⁵Bɛhɛlɛ duma bie mɔɔ ye ndelebɛbo vea la bɛgua ɔ nwoma azo. Yemɔ a le, “Babelɔn mɔɔ ɛlie duma, tuutuuma bɛ nli nee ewiade bɛkyi ninyɛndane.”

⁶Na menwunle kɛ raalɛ ne ɛbo. Nyamenle menli ne nee bɛdabɛ mɔɔ bɛ nɔhalɛlilɛ mɔɔ wɔ Gyisɛse anu la ati bɛhunle bɛ la mogya mɔɔ ɔnlonle la a ɛmaa yebo zɔhane a. Menwunle ye la, ɔzinle me nwo.

⁷Nyamenle soanvolɛ ne bizale me kɛ, “Duzu ati a ɛhye ɛzi ɛ nwo ɛ? Mebahile wɔ raalɛ ne, nee nane ati nsuu ne mɔɔ lɛ mɛne bulu ne mɔɔ ɔde zolɛ la abo.

⁸Nane ne mɔɔ ɔde zolɛ la anrɛɛ de aze, na kɛkala yewu. Na ɔvi azɛlɛ kuma ne mɔɔ ɛnlɛ ɔ bo la anu ɔbavinde yeahɔ yeamaa bɛazɛkye ye. Bɛdabɛ mɔɔ bɛwɔ ewiade ye anu na bɛangɛlɛ bɛ aluma wɔ teasema buluku ne anu, kolaa na bɛabɔ ewiade la nwu nane ne a ɔbayɛ bɛ azibɛnwo kɛ mekɛ bie ɛnee nane ne de aze, na kɛkala yewu, na eza ɔbavinde yeara bieko a.

⁹“Ɛhye hyia maa nrɛlɛbɛ nee ndelebɛbo. Adile nsuu ne le awoka nsuu mɔɔ raalɛ ne de zolɛ a. Eza bɛle arelemgbunli nsuu:

¹⁰nuhua nnu ɛbɔ aze, ko tɛdi ye belemgbunli ne, yɛɛ ko ne mɔɔ ɛha la bɔ zo mɔɔ bara a. Saa ɔba a, ɔnrɛli agyinla biala.

¹¹Na nane ne mɔɔ mekɛ bie ɛnee de aze, na kɛkala yewu la a le belemgbunli ne mɔɔ tɔ zolɛ mɔtwɛ la; na ɔdaye noko ɔbara yeamaa bɛazɛkye ye kɛ arelemgbunli nsuu ne mɔ la.

¹² “Mɛne bulu ne mɔɔ ɛnwunle bɛ la le arelemgbunli bulu mɔɔ ɛtɛbɔle bɛ belemgbunlililɛ bo a; bɛbamaa bɛ adenle bɛamaa bɛ nee nane ne ali belemgbunli dɔnehwele ko ala.

¹³Bɛdabɛ bulu ne bɛ muala bɛlɛ adwenle ko, yɛɛ bɛfa bɛ tumi ne nee bɛ belemgbunlililɛ ne bɛmaa nane ne.

¹⁴Bɛ nee Boaneralɛ ne baho; na Boaneralɛ ne bali bɛ nwo zo konim, ɔboalekɛ ɔle awulae mɔ Awulae yɛɛ ɔle arelemgbunli Belemgbunli. Menli mɔɔ li ɔ nzi la bɛkpa nu bɛye bɛ, yɛɛ bɛle menli mɔɔ di nɔhalɛ a.”

¹⁵Nyamenle soanvolɛ ne eza zele me kɛ, “Azule ne mɔ mɔɔ ɛnwunle kɛ tuutuunli ne de ɔ nloa la le maanle maanle, menli, aneɛ ngakyile, yɛɛ mbusua kɔsɔɔti.

¹⁶Mɛne bulu ne mɔɔ ɛnwunle bɛ la, nee nane ne bakpɔ tuutuunli ne; bɛbalie debie biala mɔɔ ɔlɛ la bɛamaa yealɛ ɔ nwo zɔ; bɛbali ye nwonane ne na bɛado ye senle nu bɛayela ye bɔkɔɔ.

¹⁷Ɔluakɛ Nyamenle ɛva ye gyimayɛlɛ nwo adwenle ɛwula bɛ ahonle nu, amaa bɛabɔ nu bɛayɛ ko, wɔ bɛ nyɛleɛ nu na bɛava bɛ tumi ne bɛamaa nane ne ali belemgbunli ahɔkpula mekɛ mɔɔ Nyamenle Edwɛkɛ ne kɛyɛ zɔhane la.

¹⁸“Raalɛ ne noko mɔɔ ɛnwunle ye la a le suakpole ne mɔɔ sie arelemgbunli mɔɔ wɔ azɛlɛ ye azo la amuala la.”