Read Nzema Yek 19 Bible Online

Yek 19 - Nzema bible

Yek 19

¹Ɛhye anzi mendele debie bie mɔɔ le kɛ menli dɔɔnwo ane wɔ anwuma, bɛse, “Bɛye yɛ Nyamenle ne ayɛlɛ! Ngoanelielɛ, anyunlunyia, nee tumi le yɛ Nyamenle ne ɛdeɛ!

² Ɔluakɛ ye ndɛnebualɛ le nɔhalɛ, ɔle fɔɔnwo! Yebua tuutuunli ne mɔɔ ɛlie duma na yeva ye adwɔmanebɔlɛ yezɛkye ewiade la ewule fɔlɛ. Nyamenle ɛdea ye, ɔluakɛ yehu Nyamenle sonvolɛma ne mɔ amuala.”

³Eza bɛdeanle nu kɛ, “Bɛye Nyamenle ayɛlɛ! Esike ne mɔɔ vi suakpole ne ɛyelalɛ nu finde la dwazo bolonwonwo mɔɔ ɔngua ɛlɛ a!”

⁴Mgbanyima abulanwiɔ nee nna ne nee tease abɔdeɛ nna ne dule guale na bɛzonlenle Nyamenle wɔ ye belemgbunli ebia kpole ne abo, na bɛhanle kɛ, “Amen! Bɛye Nyamenle ayɛlɛ!”

⁵Ɛnelɛ bie vi belemgbunli ebia kpole ne anwo hanle kɛ, “Bɛmaa menli muala, mgbole nee ngyikyi, nee sonvolɛma mɔɔ sonle yɛ Nyamenle ne la ɛye yɛ Nyamenle ne ayɛlɛ!”

⁶Akee mendele debie bie mɔɔ le kɛ menli dɔɔnwo ane, kɛ azule kpole bie mɔɔ lua awolɛ zo ɛlɛsonyi gua, na ɔlɛkulu kɛ bokile ezule la, bɛse, “Bɛye Nyamenle ayɛlɛ! Ɔluakɛ Awulae, yɛ Nyamenle Bedevinli ne le Belemgbunli!

⁷Bɛmaa yɛ nye ɛlie na yɛli fɛlɛko; bɛmaa yɛyeyɛ ye kɛ ɔle kpole! Ɔluakɛ Boaneralɛ ne atɔfolɛlielɛ mekɛ ne ɛdwu, na ye atɔfolɛ nrenya ne ɛziezie ɔ nwo ɛwie.

⁸Bɛmaa ye lenen ɛdanlɛ kɛnlɛma anye nwohyee kɛ ɔheda.” (Ɛdanlɛ kɛnlɛma ne a le Nyamenle menli ne ɛbɛla kpalɛ mɔɔ bɛbɔle la.)

⁹Na Nyamenle soanvolɛ ne zele me kɛ, “Kɛlɛ ɛhye: Nyilalɛ ɛha bɛdabɛ mɔɔ bɛdo ɛsalɛ bɛvɛlɛ bɛ kɛ bɛrɛla Boaneralɛ ne atɔfolɛlielɛ ne abo la.” Ɔzele medame noko kɛ, “Ɛhye le Nyamenle ɔdaye ɔ nloa edwɛkɛ fɔɔnwo.”

¹⁰Ɛhye ati mendule mendɔle ɔ gyakɛ anu kɛ mesonle ye, na ɔzele me kɛ, “Mmayɛ! Medame mele sonvolɛ kɛ ɛdawɔ nee ɛ mediema mɔɔ zɔle nɔhalɛ ne mɔɔ Gyisɛse yele hilele bɛ la anu la. Sonle Nyamenle, mmasonle me!” Ɔluakɛ nɔhalɛ ne mɔɔ Gyisɛse yele hilele la a le Nyamenle kpɔmanvolɛma anwosesebɛ ne a.

¹¹ Akee menwunle kɛ anwuma ɛbuke, na nrenya bie de ɛkpɔnwɔ fufule zo gyi ɛkɛ. Nrenya ne mɔɔ de ɛkpɔnwɔ fufule ne azo la bɛfɛlɛ ye Diedinli nee Nɔhavo; ɔfa pɛlepɛle a ɔbua ndɛne, ɔko konle a.

¹² Ɔ nye ma le kɛ senle tafinlima, na ɔbɔ abɔtile dɔɔnwo. Bɛhɛlɛ duma bie wɔ ɔ nwo, na awie biala ɛnze duma holɛ ko ne kɛ ɔdaye ɔ ngomekye ala.

¹³Ye tɛladeɛ mɔɔ ɔwula la anu le mogya ngome. Duma mɔɔ bɛfa bɛfɛlɛ ye la a le “Nyamenle Edwɛkɛ.”

¹⁴Anwuma ɛlɔnema li ɔ nzi, bɛdede mgbɔnwɔ fufule zo na bɛwulowula adɛladeɛ fufule nwohyee.

¹⁵Dadeɛ nlane zia ɔ nloa anu, na yemɔ yɛɛ ɔbava yeali maanle maanle kɔsɔɔti anwo zo konim a. Ɔbava tumi kpole yeazie bɛ, na yeahwihwi Nyamenle Bedevinli ne ɛya kpole ne mɔɔ wɔ ye nwanye melahyinli ne anu la yeagua.

¹⁶Wɔ ye tɛladeɛ ne anu nee ye ɛzɔlɛ nwo, bɛhɛlɛ duma ɛhye, “Arelemgbunli Belemgbunli yɛɛ awulae mɔ Awulae.”

¹⁷ Akee menwunle Nyamenle soanvolɛ ko noko kɛ ɔgyi sɛnzɛne ne azo. Ɔvale ɛnelɛ kpole ɔzele nloma mɔɔ luolua anwomanyunlu la amuala kɛ, “Bɛboɔboa bɛ nloa bɛrɛla Nyamenle ɛkponledolɛ kpole ne abo!

¹⁸Bɛrɛla bɛrali arelemgbunli nwonane, safohyenlema, nee ɛlɔnema nwonane, mgbɔnwɔ nane nee menli mɔɔ dede zo la nwonane, menli ngakyile kɔsɔɔti, ahanra nee alehelɛ, mgbole nee ngyikyi muala nwonane!”

¹⁹Na menwunle nane ne nee ewiade anu arelemgbunli kɔsɔɔti kɛ bɛ nee bɛ ɛlɔnema ɛboɔboa bɛ nloa kɛ bɛ nee mɔɔ de ɛkpɔnwɔ fufule ne azo la nee ye ɛlɔnema baho.

²⁰Bɛhyele nane ne, nee ye kpɔmanvolɛ alane ne mɔɔ ɛlua ngonyiayelɛ zo ɛbɛlɛbɛla bɛdabɛ mɔɔ bɛlɛ nane ne nzonlɛ wɔ bɛ nwo nee bɛdabɛ mɔɔ bɛsonle ye ananze ne la. Bɛvuandinle bɛ mu nwiɔ anyewɔzo bɛguale sendɔlɔra tandane ne mɔɔ lɛ sɔlefa ɛlɛsɔ la anu.

²¹Na mɔɔ de ɛkpɔnwɔ fufule ne azo la vale dadeɛ ne mɔɔ zia ɔ nloa anu la hunle nane ne ɛlɔnema mɔɔ hale la amuala; na nloma ne mɔ amuala ralile bɛ nwonane ne manle bɛ ko yile.