Read Nzema Yek 3 Bible Online

Yek 3 - Nzema bible

Yek 3

¹“Kɛlɛ, ɛhye kɔmaa Saadese asɔne ne Nyamenle soanvolɛ ne. “Nrɛlaleɛ ɛhye vi mɔɔ lɛ Nyamenle Sunsum nsuu ne nee nwɔlɔra nsuu ne la ɛkɛ ne. Meze mɔɔ ɛlɛyɛ la amuala; meze kɛ wɔlie duma kɛ ɛ nye gyi zo, noko wɔwu.

²Tunwue, na miemia mɔɔ ɛlɛ ye la anu kolaa na ɔkɛzɛkye bɔkɔɔ a yeazɛkye. Ɔluakɛ mɔɔ wɔyɛ la amuala, menwu kɛ ɔnli munli nretee zɛhae wɔ me Nyamenle ne anye zo.

³Zɔhane ati, kakye mɔɔ bɛhilehile wɔ nee mɔɔ ɛdele la, di zolɛ, na nu ɛ nwo. Saa wɔanyɛ ɛ nye gyɛlɛmgbɛɛnye a, mebara ɛ nwo zo kɛ awule, na ɛnrɛnwu mekɛ ko ne mɔɔ mebava meara la.

⁴Noko menli ekyi bie wɔ Saadese ɛkɛ ne mɔɔ bɛli bɛ nwo eni a. Bɛtɛyɛle bɛ ndanlɛ ne mɔ evinli. Bɛbayɛ fufule, na bɛ nee me alua, ɔluakɛ bɛfɛta.

⁵ Sonla ne mɔɔ kɛli konim la bɛbayɛ ye fufule nwohyee, na menrɛye ye duma menrɛvi teasema buluku ne anu. Mebaha ye wienyi wɔ Egya nee Nyamenle soanvolɛma anyunlu ɛkɛ ne kɛ bɛle me ɛdeɛ.

⁶“Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la.

⁷ “Kɛlɛ ɛhye kɔmaa Feladɛlefea asɔne ne Nyamenle soanvolɛ ne. “Nrɛlaleɛ ɛhye vi Nwuanzanwuanzanli ne mɔɔ le nɔhalɛnli ne ɛkɛ. Yemɔ yɛɛ ɔlɛ Belemgbunli Devidi sanvɛ ne a. Ɔto nu a, awie ɛmbuke, yɛɛ ɔbuke a, awie ɛndo nu.

⁸Meze mɔɔ ɛyɛ la; meze kɛ wɔ tumi le ekyi bie, noko wɔli me ngilehilelɛ zo na wɔli nɔhalɛ wɔmaa me.

⁹ Tie, menli ekpunli ekyi ne mɔɔ le Seetan ɛdeɛ, alanema ne mɔɔ kile kɛ bɛle Dwuuma noko bɛnle Dwuuma la, mebamaa bɛarabu ndwɛlɛ wɔ ɛ nyunlu, na bɛ muala bɛanwu kɛ mekulo wɔ.

¹⁰Kɛmɔ wɔli me edwɛkɛ zo, wɔnyia abotane la, ngyegyelɛ kpole ne mɔɔ ɛlɛba ewiade arazɔ menli kɔsɔɔti mɔɔ wɔ azɛlɛ ye azo anlea la, mebaye wɔ meavi nu.

¹¹Ɔnrɛhyɛ na meara. Mɔɔ ɛlɛ la sɔ nu boɛ, amaa awie amkpodi wɔ konim ahyɛlɛdeɛ ne anvi ɛ sa nu.

¹² Sonla mɔɔ kɛli konim la, mebayɛ ye me Nyamenle Ɛzonlenlɛ Sua nu sika, na yeadɛnla ɛkɛ ne dahuu. Mebahɛlɛ me Nyamenle ne duma nee me Nyamenle ne suakpole ne, mɔɔ le Gyɛlusalɛm fofolɛ ne, mɔɔ vi me Nyamenle ne ɛkɛ ne wɔ anwuma bara la duma wɔ ɔ nwo. Eza mebahɛlɛ me duma fofolɛ ne ɔ nwo.

¹³“Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la.

¹⁴“Kɛlɛ ɛhye kɔmaa Lawɔdesia asɔne ne Nyamenle soanvolɛ ne. “Nrɛlaleɛ ɛhye vi Amen, nɔhalɛnli ne mɔɔ yɛkola yɛfa yɛ rɛle yɛto ɔ nwo zo, nɔhalɛ dasevolɛ ne, mɔɔ le ninyɛne mɔɔ Nyamenle ɛbɔ la amuala abobɔlɛ la ɛkɛ.

¹⁵Meze mɔɔ wɔyɛ la; meze kɛ wɔmɔ, ɛnle yɔlɔkɔkɔ yɛɛ ɛnle wuluwulu. Me kunlu a anrɛɛ ɛnee ɛle wuluwulu anzɛɛ yɔlɔkɔkɔ.

¹⁶Na kɛmɔ ɛle adodɔlera, na ɛnle wuluwulu anzɛɛ yɔlɔkɔkɔ la, mebakpulu wɔ meagua.

¹⁷Wɔmɔ ɛse, ‘Mede boɛ, menyia me nwo. Mengyia ɛhwee.’ Ɛnze kɛ ɛyɛ anwunvɔne na ɛ nwo yɛ alɔbɔlɛ. Ɛnlɛ bie, ɛlɛ ɛ nwo zɔ, yɛɛ ɛ nye ɛzi.

¹⁸Ɛhye ati metu wɔ folɛ kɛ badɔ ezukoa nvutuke kpalɛ mɔɔ bɛva senle bɛdu nuhua la fi me ɛkɛ, amaa wɔanyia ɛ nwo. Badɔ adɛladeɛ fufule wula keda wɔ amumuyɛ nee wɔ anyiemgba mɔɔ ɛla ali la azo. Badɔ ayile gua ɛ nye zo, amaa wɔanwu debie.

¹⁹ Bɛdabɛ mɔɔ mekulo bɛ la, metwi bɛ nyunlu na metea bɛ. Zɔhane ati bɔ mɔdenle nu ɛ nwo na yɛ gyima ɛsesebɛ.

²⁰Tie, megyi anlenkɛ ne anzi melɛbɔ nu; mɔɔ kɛde me ne na ɔkɛdukue me la, mebara ye ɛkɛ na me nee ye arado ɛsalɛ, na ɔdaye noko ɔ nee me ado ɛsalɛ.

²¹Mɔɔ kɛli konim la, mebamaa ye adenle meamaa yearadɛnla me nwo ɛkɛ ne wɔ me belemgbunli ebia ne azo, kɛmɔ meli konim na mede Egya anwo ɛkɛ ne wɔ ye belemgbunli ebia ne azo la.

²²“Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la.”