Read Nzema Yek 4 Bible Online

Yek 4 - Nzema bible

Yek 4

¹Ɛhye anzi, mendole me nye, na menwunle kɛ bɛbuke anlenkɛ bie wɔ anwuma lɔ. Na ɛnelɛ ne mɔɔ dielie kɛ aweɛne tendenle, mɔɔ lumuale dendɛle hilele me la zele me kɛ, “Fo bɛla anwuma ɛke maa mengile wɔ mɔɔ bazi ɛhye anzi la.”

² Ɛkɛ ne ala Sunsum ne wolole me na menwunle kɛ awie de belemgbunli ebia kpole zo wɔ anwuma lɔ.

³Ahenle ne mɔɔ de belemgbunli ebia kpole ne azo la anyunlu ta kɛ ezukoa awolɛ ne mɔɔ bɛfɛlɛ bɛ “gyasepa” nee “kanɛlea” la, na nyangondonle kɛnlɛma mɔɔ zɔho ezukoa bolɛ ne mɔɔ bɛfɛlɛ ye “ɛmelade” la ɛdo ɛbɛnra ɛyia belemgbunli ebia kpole ne.

⁴Mgbanyima abulanwiɔ nee nna noko mɔɔ ɛyɛ fufule na bɛbobɔ ezukoa abɔtile la dede arelemgbunli mbia abulanwiɔ nee nna zo ɛbɔ belemgbunli ebia kpole ɛhye ɛyia.

⁵ Ɛsɛlɛmanye kpakye fi belemgbunli ebia kpole ne anwo finde, yɛɛ ɛnelɛ mgbole mɔɔ kulu kɛ bokile ezule la vi ebia kpole ne anwo finde. Tɛkɛ nsuu sɔ belemgbunli ebia kpole ne anwo, na bɛmɛ a le Nyamenle Sunsum nsuu ne.

⁶ Belemgbunli ebia kpole ɛhye anyunlu ɛkɛ ne, debie bie mɔɔ le kɛ nyevile anye kɔngyekɔngye kɛ neanleɛ la la ɛkɛ ne faanwo. Tease abɔdeɛ nna mɔɔ ɛnyelɛ duodua bɛ nyunlu nee bɛ nzi la gyigyi belemgbunli ebia ne anwo wɔ ye tɛbanu nee ye tɛbanu ne amuala.

⁷ Tease abɔdeɛ ne mɔɔ lumua la le kɛ awenade. Mɔɔ tɔ zolɛ nwiɔ la le kɛ ɛnlankɛ nyinli; mɔɔ tɔ zolɛ nsa la anyunlu zɔho sonla nyunlu, yɛɛ mɔ tɔ zolɛ nna la le kɛ kɔleɛ mɔɔ ɛdu faa la.

⁸ Tease abɔdeɛ nna ɛhye mɔ ko biala lɛ ndɛbalɛ nsia mɔɔ ɛnyelɛ duodua bɛ kunlu nee bɛ nzi amuala a. Na alehyenlɛ nee aledwolɛ muala bɛ ne la nu bɛto edwɛne bɛse kɛ, “Nwuanzaanwu, nwuanzaanwu, Awulae Nyamenle Tumivolɛ ne le nwuanzanwuanza. Yemɔ yɛɛ ɔvi tete, ɔwɔ ɛkɛ, na ɔwɔ ɛkɛ kɛkala, na ɔbara a.”

⁹Saa tease abɔdeɛ nna ɛhye mɔ to bɛ anyunlunyia, enililɛ nee moyɛlɛ edwɛne ne maa mɔɔ de aze dahuu na ɔde belemgbunli ebia kpole ne azo la a,

¹⁰ɛnee mgbanyima abulanwiɔ nee nna ne ɛdu ɛgua mɔɔ de belemgbunli ebia ne azo la anyunlu, na bɛsonle mɔɔ de aze dahuu la. Bɛtudu bɛ abɔtile ne mɔ bɛgua belemgbunli ebia ne abo na bɛka kɛ,

¹¹“Yɛ Awulae nee yɛ Nyamenle! Ɛfɛta anyunlunyia, enililɛ, nee tumi. Ɔluakɛ ɛdawɔ a ɛbɔle ninyɛne kɔsɔɔti a. Wɔ ɛhulolɛ zo yɛɛ ɛbɔle bɛ a. Wɔ ɛhulolɛ zo yɛɛ bɛwɔ ɛkɛ a.”