Read Nzema Yek 5 Bible Online

Yek 5 - Nzema bible

Yek 5

¹ Menwunle kɛ ahenle mɔɔ de belemgbunli ebia kpole ne azo la lɛ nwoma ɔ sa fema ne anu; nwoma ne, bɛhɛlɛ ɔ kunlu nee ɔ nzi amuala na bɛva ɛyɛlɛ bɛzɔ ɔ nloa fane nsuu.

²Na menwunle Nyamenle soanvolɛ mɔɔ anwo yɛ ɛzulolɛ la ko, na ɔhanle ye kpole kpalɛ kɛ, “Nwane a fɛta na ɔkɛhola ɔkɛwaye ɛyɛlɛ ne na ɔkɛbuke nwoma ne anu a?”

³Na awie ɛnle anwuma lɔ anzɛɛ azɛlɛ ye azo anzɛɛ ɛbolɔ mɔɔ holale bukele nwoma ne na ɔnleanle nu a.

⁴Na menzunle kpalɛ kɛ awie ɛnle ɛkɛ mɔɔ fɛta na ɔkola ɔbuke nwoma ne na ɔnea nu a.

⁵ Na mgbanyima ne mɔ ko zele me kɛ, “Mmasu. Nea! Dwuda abusua nu awenade ne, mɔɔ le Belemgbunli Devidi ati anwo anlɔnra kpole ne, ɛli konim, na ɔkola ɔwaye ɛyɛlɛ nsuu ne mɔ na ɔbuke nwoma ne anu.”

⁶ Na menwunle kɛ Boaneralɛ ne gyi belemgbunli ebia ne mɔɔ tease abɔdeɛ nna ne nee mgbanyima ne mɔ ɛbɔ ɛyia ye la anyunlu. Ɔzɔho Boaneralɛ ne mɔɔ bɛhu ye la. Ɔlɛ mɛne nsuu yɛɛ ɛnyelɛ nsuu, mɔɔ le Nyamenle Sunsum nsuu ne, mɔɔ bɛzoanle bɛ wɔ ewiade ye amuala anu la.

⁷Boaneralɛ ne hɔliele nwoma ne vile ahenle mɔɔ de belemgbunli ebia kpole ne azo la asa fema ne anu.

⁸ Ɔyɛle ɛhye la, tease abɔdeɛ nna ne nee mgbanyima abulanwiɔ nee nna ne mɔ dule guale Boaneralɛ ne agyakɛ anu. Ko biala lɛ ɛto yɛɛ ezukoa nvutuke dwora mɔɔ ɛyɛlɛ evuanlɛ wɔ nu la. Ɛyɛlɛ ɛhye mɔ a le Nyamenle menli ne dahudahu nzɛlɛlɛ ne a.

⁹ Na bɛdole edwɛne fofolɛ bie kɛ, “Ɛfɛta kɛ ɛkɛlie nwoma ne, ɛkɛwaye ɛyɛlɛ ne, na ɛkɛbuke nwoma ne anu, ɔluakɛ bɛhunle wɔ na ɛvale wɔ mogya ne mɔɔ bɛhwinle bɛguale la ɛkpɔnenle menli. Ɛkpɔnenle bɛ ɛvile abusua ekpunli, aneɛ nee maanle ngakyile kɔsɔɔti anu ɛmanle Nyamenle.

¹⁰ Wɔmaa bɛyɛ arelemgbunli nee Nyamenle sɛlɛvolɛma na bɛbali arelemgbunli wɔ azɛlɛ ye azo.”

¹¹ Mendole me nye bieko, na mendele Nyamenle soanvolɛma apenle apenle nee mgbe mgbe ane. Bɛbɔle bɛyiale belemgbunli ebia kpole ne, tease abɔdeɛ nna ne nee mgbanyima ne mɔ,

¹²na bɛhanle ye kpole kɛ, “Boaneralɛ ne mɔɔ bɛhunle ye la, fɛta tumi, anwonyia, nrɛlɛbɛ nee anwosesebɛ, enililɛ, anyunlunyia nee ayɛlɛyelɛ!”

¹³Na mendele kɛ abɔdeɛ biala mɔɔ wɔ anwuma nee aze, ɛbolɔ nee nyevile nu nee debie biala mɔɔ lɛ ngoane mɔɔ wɔ aleɛabo la amuala se, “Ayɛlɛyelɛ, enililɛ, anyunlunyia nee tumi ɛyɛ mɔɔ de belemgbunli ebia kpole ne azo la nee Boaneralɛ ne ɛdeɛ wɔ melɛ mɔɔ ɛnlɛ awieleɛ!”

¹⁴Na tease abɔdeɛ nna ne liele zo, “Amen.” Na mgbanyima ne mɔ dule guale na bɛzonlenle.