Read Nzema Yek 9 Bible Online

Yek 9 - Nzema bible

Yek 9

¹Akee Nyamenle soanvolɛ ne mɔɔ tɔ zolɛ nnu la bɔle ye aweɛne tendenle ne anu. Na menwunle kɛ ɛwɔlɔra bie vi anwuma ɛdu ɛradɔ azɛlɛ ye azo, na bɛva azɛlɛ kuma ne mɔɔ ɛnlɛ ɔ bo la[4] sanvɛ ne bɛwula ɔ sa nu.

²Ɛwɔlɔra ne bukele azɛlɛ kuma ne anlenkɛ ne, na esike mungumungu mɔɔ le kɛ sendɔlɔra esike la vi nu vindele; ɛhye hedale sɛnzɛne ne anye na maanle nu yɛle kisii.

³ Abɛbɛ dɔɔnwo vi esike ne anu dwule aze na bɛmanle bɛ bɔlɔ mɔɔ le kɛ nyamenleakɛlɛ ɛdeɛ ne la.

⁴ Bɛzele bɛ kɛ bɛmmasɛkye ndile anzɛɛ mbaka nee nya amolɛ biala, na bɛkeka menli mɔɔ ɛnlɛ Nyamenle nzonlɛ ne bie bɛ nwoma azo la.

⁵Bɛzele abɛbɛ ne mɔ kɛ bɛmmaku menli ɛhye mɔ, na bɛkeka bɛ toonwo siane nnu. Saa bɛka a ye nyane le kɛ nyamenleakɛlɛ ɛbɔ sonla la.

⁶Mekɛ zɔhane menli bakpondɛ ewule abo zo, na bɛnrɛnwu ye; bɛbahulo kɛ bɛkɛwu, na ewule banriandi bɛ.

⁷ Saa ɛnea abɛbɛ ne mɔ a bɛle kɛ mgbɔnwɔ mɔɔ bɛziezie bɛ kɛ bɛ nee bɛ kɔ konle la. Debie bie mɔɔ le kɛ ezukoa abɔtile la bobɔ bɛ ti, yɛɛ bɛ nyunlu maanle ne le kɛ sonla ɛdeɛ ne la.

⁸ Bɛ ti enrinli le kɛ raalɛ ti enrinli, yɛɛ bɛ gye le kɛ awenade gye.

⁹ Bɛ nwo abonle ne le kɛ asɛɛ bɛwula mbulalɛ adɛladeɛ la na saa bɛtu a bɛ ndɛba anu su kɛ mgbɔnwɔ mɔɔ ɛlɛtwili ehwili ahɔho la.

¹⁰Bɛlɛ dualɛ kɛ nyamenleakɛlɛ, yɛɛ bɛbɔ. Bɛ dua ne mɔ a bɛfa bɛabɔ menli toonwo siane nnu a.

¹¹Bɛlɛ belemgbunli mɔɔ nea bɛ nwo zo a. Yemɔ a le azɛlɛ kuma ne mɔɔ ɛnlɛ ɔ bo la soanvolɛ ne. Ye duma wɔ Hibulu nu a le “Abadɔn.”[5] Giliki nu noko a, bɛfɛlɛ ye “Apɔleɔn”[6]

¹²Alumua anwubɛnyunlu ne awieleɛ ɛne. Ɛhye anzi yeha anwubɛnyunlu ɛzulolɛ nwiɔ mɔɔ bara a.

¹³Nyamenle soanvolɛ ne mɔɔ tɔ zolɛ nsia la bɔle ye aweɛne tendenle ne. Na mendele kɛ ɛnelɛ bie vi ezukoa azukponle ne mɔɔ wɔ Nyamenle anyunlu ɛkɛ ne la mgbɛnezo nna ne mɔ anu vindele.

¹⁴Ɛnelɛ ne zele Nyamenle soanvolɛ ne mɔɔ lɛ aweɛne tendenle ne mɔɔ tɔ zolɛ nsia la kɛ, “Sianyizianyi Nyamenle soanvolɛma nna ne mɔɔ bɛkyekye bɛ wɔ azule kpole ‘Yufileti’ anloa la!”

¹⁵Bɛzianyinle bɛ, ɔluakɛ bɛvale bɛ bɛziele ɛkɛ ne kɛ dɔnehwele ne ala anu, kenle ko ne ala, siane ne ala anu, wɔ ɛvolɛ ne ala anu, bɛhyɛ menli mɔɔ wɔ ewiade la anu nsa na bɛhu nuhua ko.

¹⁶Mendele kɛ sogyama mɔɔ dede mgbɔnwɔ zo la angome le mgbe ngoko ɛya nwiɔ.

¹⁷Wɔ yekile ne anu, menwunle sogyama ne mɔ kɛ bɛdede mgbɔnwɔ ne mɔ azo, na kɛ bɛde la ɛne: bɛwulowula mbulalɛ akɛnrazo enyinlike mɔɔ le woonwu kɛ senle, buluwu kɛ “safaya”, yɛɛ guanye kɛ sɔlefa la. Mgbɔnwɔ ne mɔ ati le kɛ awenade ti, na senle, esike, yɛɛ sɔlefa vi bɛ nloa anu finde.

¹⁸Bɛvale senle ne, esike ne, yɛɛ sɔlefa ne mɔɔ vi mgbɔnwɔ ne mɔ anloa anu finde la bɛhyɛle aleɛabo amra anu nsa na bɛhunle nuhua ko.

¹⁹Mgbɔnwɔ ne mɔ anwosesebɛ wɔ bɛ nloa anu nee bɛ dua ati. Bɛ dua ne mɔ le kɛ nwɔlɛ. Dualɛ ne mɔ dedɛ bɛ ti, na yemɔ yɛɛ bɛfa bɛkeka menli ne mɔ a.

²⁰ Aleɛabo amra mɔɔ hale, mɔɔ ewule ɛhye angu bɛ la, annu bɛ nwo, angyakyi bɛ ɛbɛla ɛtane ne mɔ mɔɔ bɛbɔ la. Bɛangyakyi awozonle ɛzonlenlɛ nee mmonle mɔɔ bɛva ezukoa nvutuke, dwɛtɛ fufule, ayera, bolɛ, nee baka a bɛyɛ, mɔɔ bɛnnwu debie, bɛnde edwɛkɛ na bɛadia la ɛzɔlɛ.

²¹Eza menli ne mɔ annu bɛ nwo wɔ bɛ kɔdiawu nyɛleɛ, ngonyia, awule, nee adwɔmane ɛbɛlabɔlɛ nwo.