Read Nzema Wulu 2 Bible Online

Wulu 2 - Nzema bible

Wulu 2

¹Nawome ɔ hu Yilemɛlɛke lɛ ye busuanli bie mɔɔ ɛnyia ɔ nwo kpole kpalɛ la wɔ ɛkɛ. Bɛfɛlɛ ye Bowaze.

² Na Mowabenli Wulutu zele Nawome kɛ, “Mebodo wɔ, maa mengɔ ɛya ne mɔ anu lɔ na awie mɔɔ kɛnwu me anwunvɔne la mealuolua ye ɛya ɛdeɛ ne anu saa menwɔnyia mgbɛpɛlɛ bie a.” Nawome zele ye kɛ, “Me ra raalɛ, kɔ.”

³Yemɔti Wulutu hɔle kɛ ɔkakpondɛ mgbɛpɛlɛ wɔ menli bie mɔ anzi. Na ɔrale kɛ amuanrɛɛ ɛya ne mɔɔ ɔhɔle nuhua la le Bowaze mɔɔ le Yilemɛlɛke busuanli la ɛdeɛ.

⁴Bowaze vi Bɛtelɛhɛm rale na ɔrayɛle ye gyimayɛvoma ne mo ɔzele kɛ, “Ɛdɛnkɛma nee bɛ ɛdɛnla.” Bɛliele zolɛ kɛ, “Ɛdɛnkɛma ɛyila wɔ.”

⁵Akee Bowaze bizale ye sonvolɛ ne mɔɔ nea gyimayɛvoma ne anwo zo la kɛ, “Bɛlɛra ɛhye vi nienwu?”

⁶Kpavolɛ ne mɔɔ nea gyimayɛvoma ne anwo zo la buale kɛ, “Mowabe bɛlɛra ne mɔɔ nee Nawome vi Mowabe maanle nu rale la ɛne.

⁷Ɔrazɛlɛle me kɛ, ‘Mekpa wɔ kyɛlɛ, maa menluolua wɔ gyimayɛvoma ye anzi saa menwɔnyia mgbɛpɛlɛ bie a.’ Ɔrale sumunli nwonlomɔ ye na ɔtɛdiele ye ɛnwomenle bɔbɔ. Kɛkala bie yɛɛ yehɔdɛnla kpɔda ne abo lɔ ekyii a.”

⁸Akee Bowaze zele Wulutu kɛ, “Me ra raalɛ, tie mɔɔ meka meahile wɔ la kpalɛ. Mmakɔ ɛya gyɛne nu ɛkɔkpondɛ mgbɛpɛlɛ, yɛɛ mmafi ɛya ɛhye anu noko ɛkɔ fofolɛ nu. Ɛ nee me sonvolɛ mraalɛ ne mɔ ɛwoa ɛke ala.

⁹Di bɛdabɛ mɔɔ bɛlɛte ma ne la anzi kpalɛ na toa bɛ kɔ ɛleka mɔɔ bɛkɔ la. Meha mehile mgbavolɛ ne mɔ kɛ awie biala mmafa ɔ sa ka wɔ. Saa nzuhɔne ɛlɛku wɔ a, kɔ ɛleka mɔɔ nzule ne wɔ la na no mɔɔ mgbavolɛ ne mɔ ɛhɔza ɛra la bie.”

¹⁰Wulutu dule dɔle Bowaze agyakɛ anu na ɔzele kɛ, “Mele ɛyɛvolɛ, na duzu ati a wɔyɛ ahunlunyele kpole ɛhye wɔmaa me a?”

¹¹Na Bowaze buale ye kɛ, “Mɔɔ wɔyɛ wɔmaa ɛ hu ɔ nli, ɔvi mekɛ mɔɔ ɛ hu wule, nee kɛ wɔzi wɔgyakyi ɛ ze nee ɛ nli, ɛvi wɔ maanle nu wɔra menli mɔɔ ɛnze bɛ la avinli la, bɛha ye kɔsɔɔti bɛhile me.

¹²Ɛdɛnkɛma ɛyila wɔ wɔ mɔɔ wɔyɛ la anwo; Ɛdɛnkɛma ɛlo wɔ molozo na Yizilayɛ Nyamenle ne mɔɔ wɔravea ɔ ndɛba abo la ɛva wɔ ɛzie boɛ.”

¹³Wulutu zele ye kɛ, “Yɛmenle, wɔlo me somaa. Wɔkyekye me rɛle na wɔdendɛ wɔhile me kɛ wɔ sonvolɛ raalɛ a le me wɔ mekɛ mɔɔ memboka wɔ sonvolɛ mraalɛ ne mɔ anwo la.”

¹⁴Ɔdwule aleɛlilɛ mekɛ la Bowaze vɛlɛle ye kɛ, “Bɛla, bali debie; anrɛɛ fa wɔ kpanwo ne bɔ subue ye anu.” Yemɔti Wulutu dɛnlanle gyimayɛvoma ne mɔ anwo ɛkɛ ne na Bowaze manle ye abɛlɛ ngyehye manle ɔlile, ɔ ko yile, bie hale.

¹⁵Mɔɔ Wulutu dwazole kɛ ɔkakpondɛ mgbɛpɛlɛ bieko la Bowaze zele ye gyimayɛvoma ne kɛ, “Bɛmaa ye adenle bɛmaa ɔluolua aziakɛ ne mɔ mɔɔ bɛkyekye la avinli ɔsesa mgbɛpɛlɛ; anrɛɛ bɛmmatendɛ ye bɛgua ɔ nyunlu aze. Eza anrɛɛ bɛhwehwe mɔɔ bɛkyekye la bie bɛmaa ye.”

¹⁷Yemɔti Wulutu woale ɛya ne anu kpondɛle mgbɛpɛlɛ toonwo aleɛ muanle nwolɛ. Ɔwozole mɔɔ ɔnyianle ye la ɛnee ɔle asɛɛ kilo bulu.

¹⁸Wulutu vale mɔɔ ɔnyianle ye la hɔle sua zo na ɔvale ɔhilele Nawome. Eza Wulutu vale aleɛ mɔɔ ɔlile la bie hɔmanle Nawome.

¹⁹Nawome bizale ye kɛ, “Nienwu a ɛnɛ ɛhɔsesale wɔ mgbɛpɛlɛ ne a? Nienwu a ɛlile gyima ɛhye a? Nyamenle ɛyila ahenle mɔɔ yɛle wɔ nyele ɛhye la.” Wulutu zele Nawome kɛ, “Nrenya ne mɔɔ ɛnɛ mengɔle ye ɛya nu la bɛfɛlɛ ye Bowaze.”

²⁰ Nawome buale ɔ ra ne aye ne kɛ, “Ɛdɛnkɛma ɛyila ye kɛ ɔdwenle menli mɔɔ ɛwu ɛhɔ nee anyewɔzoamra anwo la. Nrenya ne le yɛ nwo sonla. Ɔle sonla mɔɔ di agya a ɔyɛ boɛ a.”

²¹Mowabenli Wulutu zele kɛ, “Eza bɔbɔ ɔhanle ɔhilele me kɛ mendɛnla ye sonvolɛ mraalɛ ne mɔ anwo ɛkɛ kɔkpula mekɛ mɔɔ bɛkɛwie ye bɛyɔba ne bu la.”

²²Nawome zele Wulutu kɛ, “Me ra raalɛ, ɔle kpalɛ kɛ ɛ nee ye sonvolɛ mraalɛ ne mɔ kɛyɛ gyima; saa ɛluolua awie ɛya nu a bɛkɛyɛ wɔ mgbane mgbane.”

²³Yemɔti Wulutu woale Bowaze sonvolɛ mraalɛ ne mɔ anwo ɛkɛ ne ɔsesale mgbɛpɛlɛ wɔ ɛya ne anu toonwo ma ɛdelɛ ne pɛle nu. Na akee ɔdɛnlanle aze wɔ ɔ hu ɔ nli ne anwo ɛkɛ.