Read Nzema Wulu 3 Bible Online

Wulu 3 - Nzema bible

Wulu 3

¹Akee Nawome zele Wulutu kɛ, “Me ra raalɛ, ɔwɔ kɛ memaa bɛgya wɔ, amaa wɔanyia awie ɛ nee ye adɛnla.

²Ɛze ɔ? Bowaze mɔɔ ye sonvolɛ mraalɛ a ɛ nee bɛ yɛ gyima la le yɛ hu mɔ busuanli. Ɛnɛ nɔsolɛ ɔbakpogya ma wɔ ɛleka mɔɔ bɛkpogya ye ala la.

³Zɔhane ati nrinzi ɛ nwo, siezie ɛ nwo, na kɔ ɛleka mɔɔ bɛkpogya ma ne la; na anrɛɛ mmamaa ɔnwu wɔ kɔkpula mekɛ mɔɔ ɔkɛli debie na ɔkɛnlo nwanye la.

⁴Yɛ ɛleka mɔɔ ɔbala la nzonlɛ kpalɛ, na saa ɔda a, kɔye ɔ gyakɛ anwo ɛdanlɛ ne na da ɔ gyakɛ anu ɛkɛ, na ɔbahile wɔ debie mɔɔ ɔwɔ kɛ ɛyɛ la.”

⁵Na Wulutu zele ye kɛ, “Mɔɔ wɔha la, mebayɛ.”

⁶Yemɔti Wulutu hɔle ɛleka mɔɔ bɛkpogya ma ne la na ɔhɔyɛle kɛmɔ ɔ hu ɔ nli ne zele ye la.

⁷Bowaze wiele debie di na ɔvale nwanye ekyi ɔhanle ɔ nloa na ɔ nye liele la, ɔhɔlale ye ma ne azo lɔ. Wulutu yɛle nyaa nyaa hɔyele Bowaze agyakɛ anwo ɛdanlɛ ne na ɔlale ɔ gyakɛ anu ɛkɛ ne.

⁸Kɛyɛ alevinli mu nwiɔ avinli yɛɛ Bowaze bɔle mgbatike dwazole a. Na ɔdole ɔ nye la ɔnwunle kɛ raalɛ bie la ɔ gyakɛ anu ɛkɛ.

⁹Na ɔbizale kɛ, “Ɛdawɔ nwane a ɛla ɛkɛ ne la?” Wulutu buale ye kɛ, “Yɛmenle, medame, wɔ sonvolɛ raalɛ Wulutu ɔ. Ɛle me hu kɔliagya mɔɔ wɔmɔ a ɔwɔ kɛ ɛnea me a; yemɔti gya me.”

¹⁰Bowaze zele ye kɛ, “Me ra raalɛ, Ɛdɛnkɛma ɛyila wɔ. Akee wɔhile kɛ ɛlɛ subane kpalɛ wɔdɛla alumua ne kɛ wɔandoɔdoa mgbavolɛ sukoavolɛma anzɛɛ ehyianvolɛma la.

¹¹Kɛkala, me ra raalɛ, mmasulo; debie biala mɔɔ wɔbiza la, mebayɛ meamaa wɔ, ɔluakɛ awie biala mɔɔ wɔ sua ye azo la ze kɛ ɛle raalɛ mɔɔ lɛ subane a.

¹² Ɔle nɔhalɛ kɛ mele kɔliagya, megya wɔ a ɔyɛ boɛ, noko ahenle mɔɔ di agya mumua ne la wɔ ɛkɛ.

¹³Zɔhane ati boa ɛke ɛnɛ nɔe, na saa aleɛ kye na kɔliagya ne se kɛ ɔkɛgya wɔ a, ɛnee ye kpalɛ nu ɔ; maa ɔgya wɔ. Na saa ɔnrɛgya wɔ noko a, ɛnee kɛmɔ Ɛdɛnkɛma de aze la, menwɔgya wɔ. Wɔmɔ da na nwonlomɔ.”

¹⁴Yemɔti Wulutu lale ɔ gyakɛ anu ɛkɛ ne na ɔdwazole nwonlomɔ mangyee ne ala mɔɔ ɛnee maanle nu ɛtɛtetele la kɛ ɔkɔ. Bowaze zele ye kɛ, “Mmamaa awie biala te kɛ raalɛ rale ɛleka mɔɔ bɛkpogya ma ye la.”

¹⁵Eza ɔzele ye kɛ, “Fa wɔ ɛdanlɛ ne mɔɔ gua ɛ nwo zo la bɛla na tɛlɛ nu.” Wulutu dɛlɛle ye ɛdanlɛ ne anu, na Bowaze zule ma kilo abulanwiɔ guale nuhua na ɔkyekyele ɔzoale ye. Na Wulutu hɔle sua nu.

¹⁶Wulutu dwule sua nu la, ɔ hu ɔ nli ne bizale ye kɛ, “Me ra raalɛ, kɛ ɔde ɛ?” Wulutu hanle debie biala mɔɔ nrenya ne ɛyɛ ɛmaa ye la hilele ye.

¹⁷Na ɔvale ɔzɔle zolɛ kɛ, “Ɔzele me kɛ, ‘Menrɛmaa ɛnrɛva ɛ sa mgbane ɛnrɛhɔhile ɛ hu ɔ nli.’ Yemɔti ɔzule ma kilo abulanwiɔ ɔmanle me.”

¹⁸Na Nawome zele ye kɛ, “Me ra raalɛ, sie ɛ nwo diinyi kɔkpula mekɛ mɔɔ yɛkɛnwu edwɛkɛ ne guabelɛ la. Ɔluakɛ nrenya ne ɛnrɛla, kɛ ɔkɛyɛ biala la, ɔwɔ kɛ ɔnwu edwɛkɛ ne guabelɛ ɛnɛ kenle ko ye ala.”