Read Nzema 1 Sam 13 Bible Online

1 Sam 13 - Nzema bible

1 Sam 13

¹Sɔɔlo lile ɛvolɛ...[8] la yɛɛ ɔralile belemgbunli a na ɔziele Yizilayɛ maanle ne ɛvolɛ... nee nwiɔ.[9]

²Sɔɔlo yele Yizilayɛma anu apenle nsa; ɔvale apenle nwiɔ ɔ nee bɛ woale Mekemahye yɛɛ Bɛtɛle mɔɔ wɔ awoka ne mɔ azo la. Ɔvale apenle ko ne ɔmanle Dwɔnatan vale bɛ hɔle Gebɛya mɔɔ wɔ Bɛngyaman maanzinli nu la. Na menli mɔɔ hale la Sɔɔlo manle bɛziale bɛhɔle sua nu.

³Dwɔnatan hunle Filisitia ɛlɔnema ne mɔɔ wɔ Giba la safohyenle kpanyinli ne. Ɛhye kpondenle Filisitia maanle ne anu. Sɔɔlo zoanle menli manle bɛhɔwule aweɛne tendenle nu wɔ maanle ne anu amuala bɛvɛlɛle Hibuluma kɛ bɛhɔ konle.

⁴Yizilayɛma kɔsɔɔti dele kɛ Sɔɔlo ɛhu Filisitiama safohyenle kpanyinli ne mɔɔ nea bɛ ɛlɔnema ne anwo zo la, na Filisitiama ɛyɛ Yizilayɛma anwo ɛlɔne, yemɔti bɛ kɔsɔɔti bɛrabokale Sɔɔlo wɔ Gelegale.

⁵Filisitiama boɔboale bɛ nwo kɛ bɛ nee Yizilayɛma kaho. Bɛvale ɛlɔnema mɔɔ ka konle ehwili la apenle ngoko abulasa, ɛlɔnema mɔɔ ka mgbɔnwɔ la apenle nsia, yɛɛ ɛlɔnema mɔɔ dua aze la kɛyɛ kɛ ɛnweazo ɛnwea. Bɛrayɛle azokoɛleɛ wɔ Mekemahye, wɔ Bɛtehavɛn aduduleɛ afoa nu.

⁶Bɛmianle bɛ nwo bɛ nee Yizilayɛma honle kpalɛ. Mɔɔ Yizilayɛma nwunle kɛ konle ne ɛyɛ ɛsesebɛ ɛmaa bɛ la, bie mɔ nriandile hɔveale mbɔne nu, awolɛ nu, adokule nu, bula nu nee sɛka nu.[10]

⁷Bie mɔ pɛle Azule Dwɔdan ne hɔle Gaade nee Geleade maanle ne mɔ anu. Ɛnee Sɔɔlo tɛbɔ Gelegale na ɛzulolɛ ɛha menli mɔɔ nee ye lua la amuala.

⁸ Samoɛle hilele Sɔɔlo kenle nsuu kɛ ɔbara; mɔɔ Sɔɔlo hendɛle Samoɛle toonwo kenle nsuu na yeamba Gelegale la, ye menli ne bɔle ɔ bo kɛ bɛbɔ asande.

⁹Yemɔti Sɔɔlo zele menli ne kɛ, “Bɛva ɛyelalɛ nee anzonudwolɛ azubɔdeɛ ne mɔ bɛrɛlɛ me.” Na ɔbɔle ɛyelalɛ azu.

¹⁰Ɔwiele azu ne bɔ ala la yɛɛ Samoɛle yele ɔ nyunlu a. Sɔɔlo hɔyiale ye na ɔyɛle ye akɔaba.

¹¹Na Samoɛle bizale ye kɛ, “Duzu debie a wɔyɛ la?” Sɔɔlo buale kɛ, “Kɛmɔ kenle ne mɔɔ ɛhilele la dwule na wɔamba, na menli ne kpondɛ abɔ asande, na Filisitiama noko ɛboɔboa bɛ nwo wɔ Mekemahye azokoɛleɛ ne la, yɛɛ menzele kɛ,

¹²‘Ɔnrɛhyɛ na Filisitiama arateta yɛ wɔ Gelegale ɛke bɛ nee yɛ aho, yɛɛ metɛsɛlɛle Ɛdɛnkɛma moalɛ biala;’ yemɔti menlile me ti anwo membɔle ɛyelalɛ azu ne.”

¹³Na Samoɛle zele Sɔɔlo kɛ, “Wɔli edwɛkɛ ɛtane. Wɔanli Ɛdɛnkɛma wɔ Nyamenle ne mɛla mɔɔ ɔmanle wɔ la azo; anrɛɛ Ɛdɛnkɛma kɛmaa wɔ nee ɛ bo zo amra kɛzie Yizilayɛ maanle ne dahuu,

¹⁴ na kɛkala, wɔ belemgbunlililɛ ne ɛnrɛhɔ zolɛ bieko. Ɛdɛnkɛma ɛnyia sonla mɔɔ ɔdaye ɔkulo la, yeye ye kɛ ɔzie ye menli ne, ɔboalekɛ wɔdu ɔ nloa wɔdo.”

¹⁵Samoɛle vile Gelegale hɔle Gebɛya mɔɔ wɔ Bɛngyaman abusua ekpunli ne maanle nu la. Sɔɔlo dianle ye ɛlɔnema mɔɔ nee ye lua la; bɛkɛyɛ ɛya nsia.

¹⁶Na Sɔɔlo nee ɔ ra Dwɔnatan nee menli mɔɔ nee ye lua la dɛnlanle Giba mɔɔ wɔ Bɛngyaman abusua ekpunli ne maanle nu la; yɛɛ Filisitiama dɛnlanle bɛ azokoɛleɛ ne wɔ Mekemahye.

¹⁷Filisitia ɛlɔnema ne hyɛle bɛ nwo ekpunli nsa. Ekpunli ko hɔle Ɔfela, wɔ Hyuale maanle nu,

¹⁸ko hɔle Bɛte Hɔlɔn, yɛɛ ko ne noko hɔle ɛweɛne ne mɔɔ nee Zɛboyem Bɔnza ne nee fienemgbole ne anye bɔ zolɛ la azo, na bɛwuale Yizilayɛma bɛkpokpole bɛ bɔkɔɔ.

¹⁹Mekɛ ne anu ɛnee dwinvolɛma mɔɔ fa mbulalɛ di adwinli la bie ɛnle Yizilayɛ maanle ne anu, ɔboalekɛ Filisitiama amkponle Hibuluma ammaa bɛanyɛ bie na bɛava bɛ nee bɛ aho.

²⁰(Yemɔti Yizilayɛnli biala mɔɔ kpondɛ kɛ ɔsi ye funduazɛlɛ gye anzɛɛ koanlɛ anzɛɛ akuma anzɛɛ ɛdedadeɛ la kɔ Filisitiama ɛkɛ ne kɔtua ezukoa kolaa na bɛazi bɛamaa ye.

²¹Bɛsi akuma anzɛɛ bɛyɛ ɛnlankɛ empele ko boɛ a bɛdie dwɛtɛ ekyi ko; yɛɛ saa bɛsi funduazɛlɛ gye anzɛɛ koanlɛ a bɛdie dwɛtɛ ngyikyi nwiɔ.)

²²Yemɔti kenle ne mɔɔ konle ne zile la, ɛnee Sɔɔlo ɛlɔnema ne biala ɛnlɛ konle debie biala kɛ Sɔɔlo nee ɔ ra Dwɔnatan ala.

²³Filisitiama manle menli hɔzinzale adenle ne mɔɔ la Mekemahye awoka ne mɔ avinli la.