Read Nzema 1 Sam 15 Bible Online

1 Sam 15 - Nzema bible

1 Sam 15

¹ Samoɛle zele Sɔɔlo kɛ, “Ɛdɛnkɛma zoanle me manle memkpokpale wɔ nwole menziele wɔ Yizilayɛma belemgbunli, zɔhane ati tie Ɛdɛnkɛma nrɛlaleɛ ne.

² Tumivolɛ Ɛdɛnkɛma se, ‘Mebadua Amalɛkema kakɛ, ɔboalekɛ bɛduale Yizilayɛma adenle wɔ mekɛ mɔɔ bɛvi Yigyibiti bɛlɛba la.

³Yemɔti kɔ na kɔhu Amalɛkema kɔsɔɔti, sɛkye bɛ debie biala mɔɔ bɛlɛ la, mmagyakyi debie biala fee; ku mrenya nee mraalɛ, ngakula nee nlɔma, nlankɛ nee mboane, afunlumu nee asoaso kɔsɔɔti. Mmagyakyi ko bɔbɔ.’ ”

⁴Sɔɔlo boɔboale ye ɛlɔnema ne anloa wɔ Tilɛm na ɔdianle bɛ. Yizilayɛ ɛlɔnema mɔɔ dua aze la le apenle ngoko ɛya nwiɔ yɛɛ Dwudama le apenle bulu.

⁵Akee Sɔɔlo hɔle suakpole Amalɛke azo na bɛhɔdɛle bɔnza bie anu.

⁶Na Sɔɔlo zele Kina asa zo ne mɔ kɛ, “Bɛvi Amalɛkema avinli bɛhwe bɛ nwo, anrɛɛ menwɔva bɛ menwɔfonla nu menwɔhu bɛ muala. Ɔluakɛ mɔɔ Yizilayɛma vi Yigyibiti ba la bɛyɛle bɛ nyele.” Yemɔti Kinama ne hwenle bɛ nwo vile Amalɛkema maanle ne anu.

⁷Na Sɔɔlo nee Amalɛkema honle, na ɔlile bɛ nwo zo konim, ɔvi Havela toonwo ɔdwule Hyulu mɔɔ wɔ Yigyibiti aduduleɛ la.

⁸Ɔhyele Amalɛke belemgbunli Egage anyewɔzo, na ɔhunle menli ne kɔsɔɔti.

⁹Na Sɔɔlo nee ye menli ne angu Egage, bɛangu mboane kpalɛ ne mɔɔ ɛlɔ la, nlankɛ kpalɛ nee mboane mralɛ ne mɔ, yɛɛ debie biala mɔɔ le kpalɛ la, bɛanzɛkye ye. Ninyɛne mɔɔ ɛnzonle bolɛ la angome a bɛzɛkyele bɛ a.

¹⁰Ɛdɛnkɛma zele Samoɛle kɛ, “Mevu me nwo kɛ menyɛle Sɔɔlo belemgbunli a,

¹¹ɔluakɛ yehakyi ɔ nzi yezi me. Yeanli me mɛla ne mɔ azo.” Samoɛle vale ɛya, na ɔzɛlɛle Ɛdɛnkɛma nɔe ne toonwo alehyenlɛ.

¹²Samoɛle dwazole ndɛ kɛ ɔkayia Sɔɔlo nwonlomɔ ne ala, na bɛhanle bɛhilele Samoɛle kɛ, “Sɔɔlo ɛhɔ Kamɛle ɛhɔzi ngakyelɛ sɛkɛlɛneɛ ɛwula ɔdaye ɔ nwo anyunlunyia, na yetele zolɛ yehɔ Gelegale.”

¹³Samoɛle hɔle Sɔɔlo anwo ɛkɛ, na Sɔɔlo zele ye kɛ, “O Samoɛle, Ɛdɛnkɛma ɛyila wɔ, meli Ɛdɛnkɛma mɛla ne azo.”

¹⁴Na Samoɛle zele kɛ, “Na duzu nlankɛ nee mboane ɛzunlɛ a mete la?”

¹⁵Sɔɔlo buale ye kɛ, “Bɛ nee bɛ vi Amalɛkema lɔ a ɛra a, menli ne gyakyile nlankɛ nee mboane kpalɛ ne mɔ kɛ bɛ nee bɛ ba na bɛava bɛabɔ azu bɛamaa Ɛdɛnkɛma wɔ Nyamenle ne, na mɔɔ hale la yɛzɛkye bɛ bɔkɔɔ.”

¹⁶Na Samoɛle zele Sɔɔlo kɛ, “Gyinla; maa menga mɔɔ Ɛdɛnkɛma hanle hilele me ɛnɛ nɔe la mengile wɔ.” Sɔɔlo zele kɛ, “Ka kile me.”

¹⁷Na Samoɛle zele ye kɛ, “Ɛdawɔ mumua ne ɛmbu ɛ nwo bie, noko wɔmɔ yɛɛ ɛgyi Yizilayɛ mbusua ekpunli ekpunli ne mɔ ati a. Ɛdɛnkɛma ziele wɔ Yizilayɛ belemgbunli,

¹⁸yɛɛ ɔzoanle wɔ kɛ, ‘Kɔ kɔzɛkye Amalɛkema ɛtanevolɛma. Ɛ nee bɛ ɛho toonwo kɔkpula kɛ bɛ bo zo kɛbɔ tɔɔ la.’

¹⁹Na duzu ati yɛɛ wɔandie Ɛdɛnkɛma ane ɛ? Duzu ati yɛɛ ɛvenle bɛ ninyɛne ne mɔ na ɛyɛle ɛtane wɔ Ɛdɛnkɛma anyunlu a?”

²⁰Sɔɔlo buale Samoɛle kɛ, “Mendiele Ɛdɛnkɛma ane. Mengɔle ye ɛzoanlɛ ne, mengyele Belemgbunli Egage anyewɔzo membale na mengunle Amalɛkema mɔɔ ɛha la kɔsɔɔti.

²¹Me menli ne angu nlankɛ nee mboane kyenlera ne mɔ. Bɛyɛ kɛ bɛ nee bɛ ba Gelegale ɛke bɛarabɔ azu bɛamaa Ɛdɛnkɛma wɔ Nyamenle ne.”

²²Samoɛle zele kɛ, “Ɛnee ɛnea a Ɛdɛnkɛma anye die azubɔdeɛ nee ɛyelalɛ azubɔlɛ nwo kpole tɛla kɛ ɛkɛdie ɔ ne la ɔ? Nea, tieyɛ le kpalɛ tɛla azubɔlɛ, yɛɛ ɛtie Ɛdɛnkɛma ane a ɔle kpalɛ ɔtɛla mboane nyinli mɔɔ ɛwie kye la.

²³Atuadelɛ le kɛ mizemiza ɛtaneyɛlɛ, yɛɛ anzosesebɛ le ɛtane kɛ amumuyɛ ɛyɛlɛ nee awozonle ɛzonlenlɛ. Kɛmɔ wɔkpo Ɛdɛnkɛma edwɛkɛ ne la, ɔdaye noko yekpo wɔ kɛ ɛnle belemgbunli.”

²⁴Sɔɔlo zele kɛ, “Meyɛ ɛtane, ɔluakɛ mebulu Ɛdɛnkɛma mɛla ne azo yɛɛ meandie ɛ ne, ɔboalekɛ menzulole menli ne na mendiele bɛmɛ.

²⁵Yemɔti mesɛlɛ wɔ, fa me ɛtane kyɛ me, na ɛ nee me ɛhɔ Gelegale maa mengɔnzonle Ɛdɛnkɛma bieko.”

²⁶Na Samoɛle zele Sɔɔlo kɛ, “Me nee wɔ ɛnrɛhɔ, ɔluakɛ wɔkpo Ɛdɛnkɛma anloa edwɛkɛ, na ɔdaye noko yekpo wɔ kɛ ɛnle Yizilayɛma belemgbunli bieko.”

²⁷ Mɔɔ Samoɛle hakyile ɔ nwo kɛ ɔkɔ la, Sɔɔlo zɔle ye tɛladeɛ ne anu na ɔsuanle.

²⁸Na Samoɛle zele ye kɛ, “Ɛdɛnkɛma ɛza wɔ ɛlie Yizilayɛ belemgbunlililɛ ne ɛvi ɛ sa nu ɛnɛ na yeva yemaa sonla mɔɔ le kpalɛ tɛla wɔ la.

²⁹Yizilayɛ Nyamenle Bedevinli ne ɛmbɔ adalɛ yɛɛ ɔngakyi ɔ nloa, ɔluakɛ ɔnle kɛ dasanli mɔɔ kakyihakyi ye adwenle la.”

³⁰Sɔɔlo buale ye kɛ, “Meyɛ ɛtane ɛdeɛ, noko di me eni ekyii bɔbɔ wɔ me mgbanyima ne mɔ nee Yizilayɛma anyunlu. Ɛ nee me ɛhɔ Gelegale maa mengɔnzonle Ɛdɛnkɛma wɔ Nyamenle ne.”

³¹Samoɛle nee ye hɔle Gelegale na Sɔɔlo zonlenle Ɛdɛnkɛma.

³²Samoɛle zele kɛ, “Bɛva Amalɛke Belemgbunli Egage bɛrɛla ɛke.” Egage vale anwondɛlɛ rale. Ɔzele kɛ, “Nɔhalɛ nu, ewule ɛkpa me ti.”

³³Na Samoɛle zele ye kɛ, “Kɛmɔ wɔ dadeɛ ne ɛmaa mrɛladane mraalɛ amra ɛvi bɛ sa la, zɔhane ala yɛɛ ɛdawɔ ɛ nli balɛ ɔ sa mgbane wɔ mrɛladane mraalɛ avinli a.” Na Samoɛle pepɛle ye nzokanzoka wɔ Gelegale wɔ Ɛdɛnkɛma anyunlu ɛkɛ.

³⁴Akee Samoɛle hɔle Releema; Sɔɔlo noko hɔle ye sua zo Gebɛya.

³⁵Samoɛle annwu Sɔɔlo bieko toonwo ɔdaye Samoɛle ɔwule, noko ɔlile Sɔɔlo anwo nyane. Ɛdɛnkɛma vule ɔ nwo kɛ ɔyɛle Sɔɔlo Yizilayɛ belemgbunli a.