Read Nzema 1 Sam 16 Bible Online

1 Sam 16 - Nzema bible

1 Sam 16

¹Ɛdɛnkɛma bizale Samoɛle kɛ, “Kenle nyɛ yɛɛ ɛfa wɔali Sɔɔlo anwo nyane a? Mekpo ye, ɔnli Yizilayɛ belemgbunli bieko. Dwazo fa ɔlivi nwole gua wɔ ɛweɛne ne anu. Mesoa wɔ wɔ Bɛtelɛhɛmenli Gyɛsi ɛkɛ ne, ɔluakɛ meye ɔ mra mrenya ne mɔ ko kɛ mesie ye belemgbunli.”

²Samoɛle bizale Ɛdɛnkɛma kɛ, “Kɛ menzi mengɔ ye ɛ? Saa Sɔɔlo te nwolɛ bie a, ɔbahu me.” Ɛdɛnkɛma buale ye kɛ, “Fa ɛnlankɛ ekyi ko kɔ, na ka ye kɛ, ‘Mera mebabɔ azu meamaa Ɛdɛnkɛma.’

³Anrɛɛ to ɛsalɛ fɛlɛ Gyɛsi wɔ azubɔlɛ ne abo, na mebahile wɔ debie mɔɔ ɔwɔ kɛ ɛyɛ la. Ahenle mɔɔ mebaye ye meamaa wɔ la, fa nwole gua ɔ ti zo sie ye belemgbunli.”

⁴Samoɛle diele mɔɔ Ɛdɛnkɛma hanle hilele ye la na ɔhɔle Suakpole Bɛtelɛhɛm azo. Mgbanyima ne vale sulosulo rayiale ye, na bɛbizale ye kɛ, “Ɛrale ye anzonudwolɛ nu ɔ?”

⁵Ɔbuale bɛ kɛ, “Ɛhɛe, me nee anzonudwolɛ a rale a; mera kɛ mebabɔ azu meamaa Ɛdɛnkɛma. Yemɔti awie biala ɛde ɔ nwo ɛmaa yɛhɔbɔ azu ne.” Ɔmanle Gyɛsi nee ɔ mra ne mɔ noko dele bɛ nwo, na ɔzele bɛ kɛ bɛhɔ azubɔlɛ ne abo.

⁶Bɛdwule ɛkɛ ne na Samoɛle nwunle Gyɛsi ara Yilayabe la, ɔhanle ye ɔ ti akunlu kɛ, “Nɔhalɛ, ɛhye yɛɛ Ɛdɛnkɛma ɛkpa nu ɛye ye a.”

⁷Na Ɛdɛnkɛma zele ye kɛ, “Mmanea ɔ nyunlu anzɛɛ ye anyinlima ne anwo, ɔboalekɛ tɛ yemɔ yɛɛ meye ye a, ɔluakɛ mennea sonla kɛmɔ dasanli si nea ye la. Dasanli nea sonla ɛnyelɛ zo ala, na mame, menea sonla ahonle nu.”

⁸Akee Gyɛsi vɛlɛle ɔ ra Abenadabe manle Samoɛle nleanle ye. Na ɔzele kɛ, “Kyɛkyɛ, tɛ ɛhye a Ɛdɛnkɛma kpondɛ ye a.”

⁹Eza Gyɛsi vɛlɛle ɔ ra Hyama manle ɔrale, na Samoɛle zele kɛ, “Tɛ ɛhye a Ɛdɛnkɛma kpondɛ ye a.”

¹⁰Gyɛsi manle ɔ mra nsuu ne mɔ amuala rale Samoɛle anyunlu. Na Samoɛle zele ye kɛ, “Tɛ ɛhye mɔ anu biala a Ɛdɛnkɛma kpondɛ ye a.”

¹¹Na Samoɛle bizale Gyɛsi kɛ, “Na ɛ mra ne mɔ, bɛ muala ɛhye ɔ?” Na ɔzele Samoɛle kɛ, “Yeha me awolɛ kazima ne, na yehɔ ɔkanlea mboane ne mɔ.” Na Samoɛle zele Gyɛsi kɛ, “Soa maa bɛhɔva ye, ɔluakɛ ɔtɛbale a yɛtɛbɔle azu ne.”

¹²Yemɔti Gyɛsi zoanle manle bɛhɔvale ye. Ɔle kpavolɛ kɛnlɛma, ɔgyi zolɛ sengɔɔnwo, ɔte kpɔkɛ, yɛɛ ɔ nye ma le nzenzɛɛnye. Ɛdɛnkɛma zele Samoɛle kɛ, “Ɛhye a mekpa nu meye ye a; fa nwole ne kpokpa ye.”

¹³Samoɛle vale ɔlivi nwole ɛweɛne ko ne na ɔwolale ɔguale ɔ ti zo wɔ ɔ mediema ne mɔ anyunlu ɛkɛ. Ɛkɛ ne ala Ɛdɛnkɛma Sunsum ne dwule Devidi anwo zo na ɔvi mekɛ ne anu ɔhale ɔ nwo bɔkɔɔ. Na Samoɛle ziale hɔle Releema.

¹⁴Ɛdɛnkɛma Sunsum ne vile Sɔɔlo anwo; ɔmanle sunsum ɛtane rawolole ye na ɔyɛle ye kɛ sɛnvolɛ bie la.

¹⁵Yemɔti Sɔɔlo sonvolɛma ne mɔ zele ye kɛ, “Nyamenle ɛmaa sunsum ɛtane bie ɛlɛkile wɔ abodelɛ.

¹⁶Yemɔti Nana, yɛsɛlɛ wɔ, maa adenle maa yɛhɔkpondɛ awie mɔɔ ze sanwule bɔ la, amaa saa sunsum ɛtane ne bawolo wɔ a, yeabɔ yeamaa ɛ nwo adɔ wɔ.”

¹⁷Na Sɔɔlo zele ye sonvolɛma ne kɛ, “Bɛhɔkpondɛ sonla mɔɔ ze ye bɔ kpalɛ kpalɛ la na bɛva ye bɛrɛlɛ me.”

¹⁸Mgbavolɛ ne mɔ ko zele kɛ, “Gyɛsi mɔɔ vi Bɛtelɛhɛm la amra mrenya ne mɔ ko ze ye bɔ kpalɛ kpalɛ. Ɔle sonla mɔɔ te kpɔkɛ, ɔ nwo yɛ fɛ, ɔze konle nye zo kpalɛ, ɔ nloa ɛde, yɛɛ Ɛdɛnkɛma Sunsum ne wɔ ye nu.”

¹⁹Yemɔti Sɔɔlo zoanle menli wɔ Gyɛsi anwo lɔ, bɛhɔzele ye kɛ, “Maa ɛ ra nrenya Devidi mɔɔ nea wɔ mboane ne mɔ la ɛrɛla.”

²⁰Gyɛsi wulale kpanwo zoale asoaso, ɔvale nwanye nwoma kodoku ko tɛkɛɛ, yɛɛ abɔnkye ralɛ ɔmanle Devidi vale hɔle Sɔɔlo ɛvɛlɛlɛ ne.

²¹Devidi hɔle na ɔhɔle Sɔɔlo ɛzonlenlɛ gyima nu. Sɔɔlo hulole ye kpole na ɔyɛle ye ye konle ninyɛne soavolɛ.

²²Na Sɔɔlo zoanle manle bɛhɔzele Gyɛsi kɛ, “Maa Devidi ɛwoa me gyima nu ɛke, ɔluakɛ me nye ɛlie ɔ nwo kpole kpalɛ.”

²³Ɔvi mekɛ zɔhane, mekɛ biala mɔɔ Nyamenle kɛmaa sunsum ɛtane ne kɛdwu Sɔɔlo anwo zo la, Devidi bɔ sanwule ne na Sɔɔlo anwo tɔ ye.